ఏపీలో భూముల మార్కెట్ విలువపై.. ప్రభుత్వం కీలక నిర్ణయం

ఆంధ్రప్రదేశ్‌లో భూముల మార్కెట్ విలువ మరోసారి పెరగనుంది. రాష్ట్రవ్యాప్తంగా భూముల మార్కెట్ విలువల సవరణకు ఆంధ్రప్రదేశ్ ప్రభుత్వం రంగం సిద్ధం చేసింది. ఫిబ్రవరి 1, 2026 నుంచి ఈ నిర్ణయం అమల్లోకి రానుంది. ఈ మేరకు ఏపీ రెవెన్యూ శాఖ ప్రత్యేక ముఖ్య కార్యదర్శి సాయిప్రసాద్ మెమో జారీ చేశారు. మరోవైపు రాష్ట్రంలో ఎన్డీఏ కూటమి ప్రభుత్వం అధికారంలోకి వచ్చిన తర్వాత భూముల ధరలను సవరించడం ఇది రెండోసారి. మరోవైపు భూముల మార్కెట్ విలువ పెంపు సగటున 7 నుంచి 8 శాతం వరకు పెరిగే అవకాశం ఉందని అంచనా వేస్తున్నారు. ఇక డిమాండ్ అధికంగా ఉన్న పట్టణ ప్రాంతాలు, కొత్త జిల్లా కేంద్రాల్లో 15 శాతం వరకూ ఉండొచ్చని అంచనా.

మరోవైపు భూముల వాస్తవ ధరలకు, ప్రభుత్వ రికార్డుల్లోని ధరలకు మధ్య ఉన్న భారీ వ్యత్యాసాన్ని తగ్గించేందుకు ఈ నిర్ణయం తీసుకున్నట్లు తెలిసింది. అలాగేభూముల మార్కెట్ విలువ పెంపు నిర్ణయం నుంచి అమరావతికి మినహాయింపు ఇచ్చే అవకాశాలు ఉన్నాయి. అమరావతిలో పెట్టుబడులను ప్రోత్సహించేందుకు ప్రస్తుతానికి అక్కడ రిజిస్ట్రేషన్ విలువల పెంపు మినహాయింపు ఇచ్చే అవకాశాలు కనిపిస్తున్నాయి.

మరోవైపు 2025లో ఏపీ ప్రభుత్వం భూముల మార్కెట్ విలువను పెంచింది. కొత్త జిల్లాలు, వాణిజ్య ప్రాంతాల్లో దీనిని15 శాతం కంటే ఎక్కువగా పెంచింది. భూముల మార్కెట్ విలువ పెంచడం ద్వారా ప్రభుత్వ ఖజానాకు భారీగా ఆదాయం సమకూరనుంది. మరోవైపు స్టాంపులు, రిజిస్ట్రేషన్ల శాఖకు ప్రస్తుత ఆర్థిక సంవత్సరంలో రూ.13,150 కోట్లకు పైగా ఆదాయం వస్తుందని అంచనా.

ప్రభుత్వ నిర్ణయంతో రియల్ ఎస్టేట్ రంగం మీద ప్రభావం పడే అవకాశాలు ఉన్నాయి. ముఖ్యంగా నగరాలు, వాణిజ్య ప్రాంతాలు, గ్రోత్ కారిడార్లలోని రియల్ ఎస్టేట్ రంగంపై ప్రభావం చూపించనుంది. భూముల మార్కెట్ విలువ పెంపుతో రిజిస్ట్రేషన్ ఛార్జీలు, స్టాంప్ డ్యూటీ ఖర్చు పెరిగే అవకాశం ఉంది. దీంతో కొనుగోలుదారులు, అమ్మకందారులపై భారం పడనుంది.

మరోవైపు ఫిబ్రవరి ఒకటి తర్వాత రిజిస్ట్రేషన్ ఛార్జీలు, స్టాంపు డ్యూటీ పెరుగుతుందనే కారణంగా కొనుగోలుదారులు ఇప్పుడే రిజిస్ట్రేషన్లు చేసుకోవడానికి తాపత్రయపడుతున్నారు. మరోవైపు భూయజమానులు మాత్రం భూముల విలువ పెరిగిన తర్వాత విక్రయిస్తే కలిసి వస్తుందనే కారణంతో అమ్మకాలను వాయిదా వేస్తున్నారని రియల్ ఎస్టేట్ వర్గాలు చెప్తున్నాయి.