Tollywood – RSS: బ్యాక్‌డోర్ మీటింగ్‌? స్టార్ హీరోలతో ఆర్ఎస్ఎస్ చీఫ్ సీక్రెట్ టాక్!

టాలీవుడ్‌లో తాజాగా జరిగిన ఒక కీలక సమావేశం ఇప్పుడు హాట్ టాపిక్‌గా మారింది. ఈ అరుదైన భేటీకి స్టార్ హీరో విక్టరీ వెంకటేష్ నివాసం వేదికైంది. రాష్ట్రీయ స్వయంసేవక్ సంఘ్ (ఆర్ఎస్ఎస్) సర్సంఘచాలక్ మోహన్ భగవత్ హాజరైన ఈ సమావేశంలో సినీ పరిశ్రమకు చెందిన ప్రముఖులు పాల్గొనడం ఇండస్ట్రీలో ఆసక్తిని రేకెత్తిస్తోంది.హైదరాబాద్‌లోని విక్టరీ వెంకటేష్ ఇంట్లో జరిగిన ఈ సమావేశంలో టాలీవుడ్ అగ్ర హీరోలు, ప్రముఖ నిర్మాతలు పాల్గొన్నారు. ఈ సందర్భంగా ఆర్ఎస్ఎస్ చీఫ్ మోహన్ భగవత్ సినీ ప్రముఖులతో కలిసి దేశంలో ప్రస్తుతం నెలకొన్న పరిస్థితులు, సాంస్కృతిక విలువలు, అలాగే కళా రంగం పోషించాల్సిన పాత్రపై చర్చించినట్లు తెలుస్తోంది.ఈ ప్రత్యేక భేటీలో సినిమా రంగానికి చెందిన వివిధ తరాల ప్రతినిధులు పాల్గొనడం విశేషంగా మారింది. హీరోలు కింగ్ నాగార్జున, విక్టరీ వెంకటేష్, నేచురల్ స్టార్ నాని, యువ హీరో తేజ సజ్జా ఈ సమావేశంలో పాల్గొన్నారు. అలాగే మైత్రీ మూవీ మేకర్స్ అధినేత నవీన్ యెర్నేని (రవి), సాహు గారపాటి సహా పలువురు అగ్ర నిర్మాతలు ఈ కార్యక్రమంలో భాగమయ్యారు.సాధారణంగా ఆర్ఎస్ఎస్ ప్రముఖులు నగరానికి వచ్చినప్పుడు వివిధ రంగాలకు చెందిన నిష్ణాతులతో భేటీ అవుతుంటారు. అందులో భాగంగానే ఈసారి టాలీవుడ్ ప్రముఖులతో ఈ సమావేశం ఏర్పాటు చేసినట్లు సమాచారం. ఎటువంటి ఆర్భాటం లేకుండా, పూర్తిగా రహస్యంగా జరిగిన ఈ భేటీ ఇప్పుడు సోషల్ మీడియాలో విస్తృత చర్చకు దారి తీస్తోంది.ముఖ్యంగా ‘హను-మాన్’ వంటి చిత్రంతో దేశవ్యాప్త గుర్తింపు పొందిన తేజ సజ్జా కూడా ఈ సమావేశంలో పాల్గొనడం గమనార్హం. దీనిని కేవలం మర్యాదపూర్వక కలయికగానే అభివర్ణిస్తున్నప్పటికీ, టాలీవుడ్ పెద్దలు మరియు ఆర్ఎస్ఎస్ అగ్రనేత మధ్య జరిగిన ఈ చర్చలు భవిష్యత్తులో చిత్రాలపై ఏవైనా ప్రభావం చూపుతాయేమో అన్న ఆసక్తి నెలకొంది.