అంబటికి సినిమా చూపిస్తాం.. పెమ్మసాని వార్నింగ్

వైసీపీ నేత, మాజీ మంత్రి అంబటి రాంబాబు వ్యాఖ్యలు ఏపీ రాజకీయాల్లో కాకరేపుతున్నాయి. సీఎం చంద్రబాబును ఉద్దేశించి అంబటి రాంబాబు అనుచిత వ్యాఖ్యలు చేశారంటూ టీడీపీ శ్రేణులు భగ్గుమన్నాయి. గుంటూరులోని అంబటి రాంబాబు ఇంటిని ముట్టడించాయి. ఈ క్రమంలోనే అంబటి రాంబాబు ఇంటిపై కొంతమంది దాడి కూడా చేశారు. అయితే తన వ్యాఖ్యలు చంద్రబాబును ఉద్దేశించి చేసివవి కావని.. తనను తిట్టినవారిని తిట్టే క్రమంలో కోపంలో అన్నానని అంబటి క్లారిటీ ఇచ్చారు. మధ్యలో చంద్రబాబు పేరు వచ్చిందని వివరణ ఇచ్చారు. అయితే చంద్రబాబుపై చేసిన వ్యాఖ్యలకు అంబటి రాంబాబు క్షమాపణ చెప్పి తీరాలని టీడీపీ నేతలు, కార్యకర్తలు డిమాండ్ చేస్తున్నారు.

ఈ క్రమంలోనే అంబటి రాంబాబు వ్యాఖ్యలపై కేంద్ర మంత్రి పెమ్మసాని చంద్రశేఖర్ తీవ్ర ఆగ్రహం వ్యక్తం చేశారు. అంబటి రాంబాబును ఇప్పటివరకు సహనంతో భరించామని.. ఈ రోజు నుంచి అంబటి రాంబాబుకు నిజమైన సినిమా చూపిస్తామంటూ పెమ్మసాని చంద్రశేఖర్ వార్నింగ్ ఇచ్చారు. 24 గంటల్లో తమ రియాక్షన్‌ ఎలా ఉంటుందో తెలుస్తుందని హెచ్చరించారు. బరితెగించి మాట్లాడేవాళ్లు.. భయపడేలా ట్రీట్‌మెంట్‌ ఉంటుందంటూ పెమ్మసాని చంద్రశేఖర్ కీలక వ్యాఖ్యలు చేశారు. చట్టబద్ధంగా వెళ్తే ఏం జరుగుతుందో అంబటి రాంబాబుకు తెలుస్తుందని అన్నారు.

మరోవైపు అంబటి రాంబాబుపై హోం మంత్రి అనిత ఫైర్ అయ్యారు. వైసీపీ నేతలు దిగజారి రాజకీయం చేస్తున్నారని విమర్శించారు. గతంలో తాను అంబటి రాంబాబుగారు అని మాట్లాడేవ్యక్తినని.. గారు అనే పదానికి అర్హత లేని వ్యక్తి అంబటి రాంబాబు అంటూ వంగలపూడి అనిత మండిపడ్డారు. చంద్రబాబుపై మాట్లాడిన తీరు సరైంది కాదన్న అనిత.. చంద్రబాబు గురించి అంబటి రాంబాబు అత్యంత నీచంగా మాట్లాడారని అన్నారు. విధ్వంసం సృష్టించే ప్రయత్నం జరుగతోందని.. శాంతి భద్రతలకు విఘాతం కల్గిస్తే సహించేది లేదన్నారు.

అంబటి రాంబాబు లాంటి వారి గురించి మాట్లాడాలంటే సిగ్గు అనిపిస్తోందన్న హోం మంత్రి.. వైసీపీ హయాంలో టీడీపీ నేత పట్టాభి ఓ పదం ఉపయోగిస్తే టీడీపీ పార్టీ ఆఫీస్ మీద దాడి చేశారన్నారు. చంద్రబాబు గురించి ఇష్టానుసారంగా మాట్లాడితే కచ్చితంగా చర్యలు ఉంటాయని.. కేసు నమోదు చేస్తామని హోం మంత్రి అనిత వెల్లడించారు. చంద్రబాబును అంటే రాష్ట్రాన్ని అన్నట్లేనని అన్నారు. చంద్రబాబును అన్యాయంగా జైలులో పెట్టినందుకు వైసీపీ 151 నుంచి 11 సీట్లకు వచ్చిందని.. మంచి వ్యక్తిని మళ్లీ టచ్ చేస్తున్నారంటూ హోం మంత్రి అనిత విమర్శించారు.