బడ్జెట్ షాక్.. ట్రేడర్ల ఆశలపై 'నిర్మలమ్మ' నీళ్లు.. కుప్పకూలిన స్టాక్ మార్కెట్!

కేంద్ర బడ్జెట్‌లో సెక్యూరిటీ ట్రాన్సాక్షన్ టాక్స్ (STT) తగ్గుతుందని గంపెడాశలు పెట్టుకున్న స్టాక్ మార్కెట్ ఇన్వెస్టర్లకు ఆర్థిక మంత్రి నిర్మలా సీతారామన్ ఊహించని షాక్ ఇచ్చారు. పన్ను భారాల నుంచి ఉపశమనం లభిస్తుందని భావించిన ట్రేడర్లకు, రివర్స్‌లో పన్నులు పెంచుతూ తీసుకున్న నిర్ణయం మింగుడుపడటం లేదు. ముఖ్యంగా డెరివేటివ్స్ విభాగంలో పెరిగిన పన్ను రేట్లు మార్కెట్ వర్గాల్లో తీవ్ర అసహనాన్ని నింపాయి.
కొత్త ప్రతిపాదనల ప్రకారం, ఆప్షన్స్ ట్రేడింగ్‌పై పన్నును 0.1% నుండి 0.15 శాతానికి, అలాగే ఫ్యూచర్స్‌పై 0.05 శాతానికి పెంచుతూ ప్రభుత్వం నిర్ణయం తీసుకుంది. రాయితీలు వస్తాయని ఆశించిన చోట ఇలా అదనపు భారం పడటంతో ట్రేడర్లు ఒక్కసారిగా నీరసించిపోయారు. ఈ పెంపు నేరుగా లాభాల మార్జిన్‌పై దెబ్బకొడుతుందని చిన్న తరహా ట్రేడర్లు ఆందోళన వ్యక్తం చేస్తున్నారు.
ఈ వార్త వెలువడిన వెంటనే దలాల్ స్ట్రీట్‌లో అలజడి రేగింది. పన్ను పెంపుతో అసంతృప్తికి లోనైన ఇన్వెస్టర్లు ఉద్వేగంతో పెద్ద ఎత్తున అమ్మకాలకు దిగడంతో షేర్ మార్కెట్ సూచీలు కుప్పకూలాయి. నిమిషాల వ్యవధిలోనే సెన్సెక్స్, నిఫ్టీలు భారీ నష్టాలను మూటగట్టుకున్నాయి. అమ్మకాల ఒత్తిడికి మార్కెట్ కుదేలవడంతో లక్షల కోట్ల ఇన్వెస్టర్ల సంపద ఆవిరైపోయింది.
అయితే, ఈ కఠిన నిర్ణయం వెనుక ప్రభుత్వానికి ఒక స్పష్టమైన వ్యూహం ఉన్నట్లు విశ్లేషకులు భావిస్తున్నారు. మార్కెట్‌లో విపరీతంగా పెరిగిపోతున్న స్పెక్యులేషన్‌ను (అంచనాల వ్యాపారం) అరికట్టడంతో పాటు, భవిష్యత్తులో రాబోయే అనిశ్చితిని, సంక్షోభ పరిస్థితులను నివారించేందుకే ఈ కఠిన చర్యలు తీసుకున్నట్లు తెలుస్తోంది. మార్కెట్ స్థిరత్వం కోసం ప్రభుత్వం స్వల్పకాలిక అసౌకర్యాన్ని పక్కన పెట్టి దీర్ఘకాలిక ప్రయోజనాలకే మొగ్గు చూపినట్లు కనిపిస్తోంది.