ట్రంప్‌కు పెద్ద పరీక్ష.. ఇరాన్ వార్‌తో మారుతున్న రాజకీయ సమీకరణాలు

ఇరాన్ సుప్రీం లీడర్ ఆయతొల్లా అలీ ఖమేనీని హతమార్చితే యుద్ధం త్వరగా ముగిసి, ఇరాన్ లొంగిపోతుందనే అంచనాలు వేసిన అమెరికా అధ్యక్షుడు డొనాల్డ్ ట్రంప్‌కు ఇప్పుడు పరిస్థితులు అంత అనుకూలంగా కనిపించడం లేదు.యుద్ధం మొదలై ఇప్పటికే వారం రోజులు దాటిపోయాయి. ఒకవైపు అమెరికా మరియు మిత్రదేశాల ఆయుధ నిల్వలు తగ్గిపోతుండగా, మరోవైపు ఇరాన్ మాత్రం ఎక్కడా వెనక్కి తగ్గే సూచనలు చూపడం లేదు. ఈ పరిస్థితుల్లో యుద్ధం నుంచి ఎలా బయటపడాలన్న దానిపై స్పష్టత లేకపోయినా, ట్రంప్ మాత్రం బాహాటంగా గట్టి ప్రకటనలు చేస్తూ ముందుకు సాగుతున్నట్లు తెలుస్తోంది.ప్రారంభంలో ఈ యుద్ధం నాలుగు నుంచి ఐదు వారాల్లో ముగిసిపోతుందని ట్రంప్ అంచనా వేశారు. కానీ తాజా నివేదికలు మాత్రం అమెరికా ప్రభుత్వం దీర్ఘకాల యుద్ధానికి పెద్దగా సిద్ధంగా లేదని సూచిస్తున్నాయి. యుద్ధం సెప్టెంబర్ వరకు కొనసాగితే అది ట్రంప్ అధ్యక్ష పదవికే సవాలుగా మారే అవకాశముందని విశ్లేషణలు చెబుతున్నాయి. ఇరాన్‌పై దీర్ఘకాల సైనిక చర్యకు ఇజ్రాయెల్‌తో కలిసి ట్రంప్ ప్రభుత్వం సిద్ధమవుతూ గూఢచార కార్యకలాపాలను కూడా పెంచుతోంది. ఈ యుద్ధం ఇప్పటికే మధ్యప్రాచ్యంలో తొమ్మిది దేశాలకు విస్తరించినప్పటికీ, సమస్యకు స్పష్టమైన పరిష్కారం మాత్రం కనిపించడం లేదు. దీంతో వరుసగా రెండోసారి అధ్యక్ష పదవిని దక్కించుకోవాలన్న ట్రంప్ ఆశలకు ఈ పరిస్థితి పెద్ద అడ్డంకిగా మారే సూచనలు కనిపిస్తున్నాయి.అమెరికా అధికారుల అంచనా ప్రకారం ఈ యుద్ధం కనీసం సెప్టెంబర్ వరకు, అంటే అమెరికా మధ్యంతర ఎన్నికలకు రెండు నెలల ముందు వరకు కొనసాగే అవకాశం ఉంది. ట్రంప్ మొదట చెప్పిన నాలుగు–ఐదు వారాల అంచనా కేవలం కొన్ని రోజుల్లోనే మారిపోయిందని విశ్లేషకులు చెబుతున్నారు. ఇదే సమయంలో అమెరికా భారత్‌కు 30 రోజుల పాటు రష్యా చమురు కార్గోలను కొనుగోలు చేసేందుకు తాత్కాలిక మినహాయింపు ఇచ్చింది. హార్ముజ్ జలసంధిలో ఏర్పడిన అంతరాయాల నేపథ్యంలో గల్ఫ్ ప్రాంతం నుంచి ఇంధన సరఫరాలు త్వరలోనే సాధారణ స్థితికి వస్తాయని భావిస్తూ ఈ నిర్ణయం తీసుకున్నట్లు తెలుస్తోంది. అయితే యుద్ధానికి వేగంగా చేసిన సన్నాహాలు, ఇరాన్ ప్రతిఘటనను అమెరికా తక్కువ అంచనా వేసిందనే అభిప్రాయాన్ని కూడా బలపరుస్తున్నాయి.చైనా సహకారంతో ఇరాన్ భారీగా డ్రోన్‌లు, క్షిపణులను కూడబెట్టినట్లు తెలుస్తోంది. ట్రంప్ ప్రభుత్వం అంతగా పరిగణలోకి తీసుకోని ఈ ఆయుధాలను ఇప్పుడు టెహ్రాన్ మధ్యప్రాచ్యంలోని పలు ప్రాంతాల్లో దాడులకు వినియోగిస్తోంది. ఉన్నత స్థాయి కమాండర్లను కోల్పోయినా, ఇరాన్ సైన్యం మాత్రం వ్యూహాత్మకంగా నిర్ణయాలు తీసుకుంటూ ముందుకు సాగుతోంది. గల్ఫ్ దేశాలపై డ్రోన్‌లు, క్షిపణులతో దాడులు కొనసాగిస్తుండటం పరిస్థితిని మరింత ఉద్రిక్తంగా మారుస్తోంది. నాయకత్వాన్ని లక్ష్యంగా చేసుకున్న దాడులకు ప్రతిస్పందనగా అధికారాన్ని దిగువ స్థాయి కమాండర్లకు బదిలీ చేయడం ఇరాన్ వ్యూహంగా కనిపిస్తోంది. నాటో సభ్యదేశమైన టర్కీపై దాడులు జరగడం కూడా ఇరాన్ వెనక్కి తగ్గే ఉద్దేశం లేదని స్పష్టం చేస్తోంది. అంతర్గతంగా ప్రజల్లో అసంతృప్తి పెరుగుతుందని అమెరికా, ఇజ్రాయెల్ చేసిన అంచనాలు కూడా తప్పిపోయాయి. ఈ పరిణామాల నేపథ్యంలో ఈ యుద్ధం ట్రంప్ అధ్యక్ష పదవికే పెద్ద సవాలుగా మారే అవకాశం ఉందని విశ్లేషకులు భావిస్తున్నారు.