అమెరికాలో వేగంగా వ్యాప్తి చెందుతోన్న చికిత్స లేని హెచ్ఎంపీవీ వైరస్‌

అమెరికా పశ్చిమ తీర ప్రాంతాల్లో, ముఖ్యంగా ఉత్తర కాలిఫోర్నియాలో హ్యూమన్ మెటాన్యుమో వైరస్ (హెచ్ఎంపీవీ) అత్యంత వేగంగా విస్తరిస్తోంది. ఇది కొత్త వైరస్ కాకపోయినప్పటికీ.. దీనికి యాంటీ వైరల్ మందులు లేదా వ్యాక్సిన్లు అందుబాటులో లేవు. దీంతో డాక్టర్లు వ్యాధి లక్షణాలను బట్టి చికిత్స అందిస్తున్నారు. నార్త్ కాలిఫోర్నియాలోని శాన్‌ఫ్రాన్సిస్కో, మారిన్, వల్లెజో, నాపా, నోవాటో, శాంటారోసా, సాక్రమెంటో, డేవిస్ తదితర ప్రాంతాల్లో ఈ వైరస్ ఉధృతి ఎక్కువగా ఉన్నట్లు 'వేస్ట్‌వాటర్ స్కాన్' గణాంకాలు వెల్లడిస్తున్నాయి.

అసలేమిటీ హెచ్ఎంపీవీ వైరస్?

హ్యూమన్ మెటాన్యుమోవైరస్ అనేది శ్వాసకోశ వ్యవస్థపై దాడి చేసే ఒక సింగిల్ స్ట్రాండెడ్ ఆర్‌ఎన్ఏ వైరస్. దీనిని మొదటిసారిగా 2001లో నెదర్లాండ్స్‌లో గుర్తించారు. అంతకు 50-60 ఏళ్ల ముందు నుంచే మనుషులకు ఈ వైరస్ సోకినప్పటికీ.. పాతికేళ్ల క్రితం వరకు దాన్ని గుర్తించలేకపోయినట్లు సైంటిస్టులు చెబుతున్నారు. ఇది మనకు తెలిసిన ఆర్‌ఎస్‌వీ వైరస్ కుటుంబానికే చెందింది. అయితే ఫాక్స్ న్యూస్ నివేదికల ప్రకారం.. ఈ ఏడాది జనవరిలో గరిష్ట స్థాయికి చేరిన ఈ కేసులు.. మార్చి నెలలో కూడా భారీగా నమోదయ్యాయి.

క్లీవ్‌ల్యాండ్ క్లినిక్ సమాచారం ప్రకారం.. ఈ వైరస్ సోకిన వారిలో సాధారణ జలుబు లక్షణాలే కనిపిస్తాయి. ముఖ్యంగా తీవ్రమైన దగ్గు, జ్వరం, ముక్కు కారడం లేదా ముక్కు దిబ్బడ వంటివి వస్తాయి. అలాగే గొంతు నొప్పి, శ్వాస తీసుకోవడంలో ఇబ్బంది, ఒంటిపై దద్దుర్లు రావడం వంటి లక్షణాలు కూడా కనిపిస్తాయి.

చాలా మందిలో ఈ లక్షణాలు స్వల్పంగానే ఉన్నప్పటికీ.. రోగనిరోధక శక్తి తక్కువగా ఉన్నవారు, చిన్న పిల్లలు, వృద్ధుల్లో ఇది తీవ్రమైన శ్వాసకోశ ఇబ్బందులకు దారితీస్తుంది. ప్రపంచవ్యాప్తంగా ఏటా సుమారు 6.5 లక్షల మంది ఈ వైరస్ కారణంగా ఆసుపత్రి పాలవుతున్నారని ప్రముఖ వైద్య నిపుణులు డాక్టర్ మార్క్ సీగల్ తెలిపారు. దురదృష్టవశాత్తూ.. ఈ మెటాన్యుమోవైరస్‌ను నేరుగా నయం చేసే యాంటీ వైరల్ మందులు గానీ, నివారించే టీకాలు గానీ ప్రస్తుతం అందుబాటులో లేవు. బాధితులకు కేవలం సపోర్టివ్ కేర్ మాత్రమే అందించగలరు. పరిస్థితి విషమించకుండా ఉండేందుకు ఆక్సిజన్ థెరపీ, ఐవీ ఫ్లూయిడ్స్, కార్టికోస్టెరాయిడ్స్ వంటి చికిత్సలను వైద్యులు ఉపయోగిస్తున్నారు.

ఈ వైరస్ సోకిన వ్యక్తి తుమ్మినప్పుడు, దగ్గినప్పుడు వచ్చే తుంపర్ల ద్వారా లేదా వైరస్ ఉన్న ఉపరితలాలను తాకడం ద్వారా ఇది ప్రధానంగా వ్యాపిస్తుంది. కాబట్టి తరచుగా చేతులు శుభ్రం చేసుకోవడం, మాస్కులు ధరించడం, సామాజిక దూరం పాటించడం ద్వారా ఈ వైరస్ బారిన పడకుండా జాగ్రత్త పడవచ్చు. చలి కాలంలో ఎక్కువగా వ్యాపించే ఈ వైరస్.. కరోనాలా మరే అవకాశం చాలా తక్కువని వైద్య నిపుణులు చెబుతున్నారు.