పెట్రోల్ మాత్రమే కాదు, తాగే నీటిపైనా యుద్ధ ప్రభావం

రష్యా-ఉక్రెయిన్ యుద్ధం తర్వాత, ఇప్పుడు ఇజ్రాయెల్-ఇరాన్ మధ్య ఉద్రిక్తతలు ప్రపంచ వ్యాప్తంగా ఆందోళన సృష్టిస్తున్నాయి. పశ్చిమ ఆసియాలోని ఈ పరిస్థితే కేవలం ఇంధన ధరలను మాత్రమే కాదు, సామాన్యుడు తాగే నీటిని కూడా ఖరీదైనవిగా మారుస్తోంది. హోర్ముజ్ జలసంధి ద్వారా రవాణాకు అంతరాయం ఏర్పడటంతో ముడి చమురు ధరలు బ్యారెల్‌కు 119 డాలర్లకు చేరాయి. దీని ప్రభావంతో భారత్‌లో బాటిల్ వాటర్ ధరలు పెరుగుతున్నాయి.నీటి ధర పెరుగుదలకు ప్రధాన కారణం నీరు కాదు, ఆ నీటిని నింపే ప్లాస్టిక్ బాటిల్. ప్లాస్టిక్ తయారీకి వాడే PET (పాలిథిలిన్ టెరెఫ్తాలేట్) రెసిన్ గుళికలు ముడి చమురు నుంచి తయారవుతాయి. చమురు ధరలు పెరగడంతో, ఈ ముడిపదార్థాల ధరలు భారీగా పెరిగాయి. మార్కెట్ లీడర్ బిస్లేరి ఇప్పటికే వాటర్ బాటిళ్ల ధరలను 11 శాతం పెంచింది. 12 లీటర్ బాటిల్ బాక్స్ ధర రూ. 24 పెరిగింది. ప్యాకేజింగ్ ఖర్చులు 70 శాతం పెరగడంతో, లీటర్ బాటిల్ ధర రూ. 20కి చేరిందని బిస్లేరి సీఈఓ ఏంజెలో జార్జ్ తెలిపారు. PET ప్రిఫార్మ్స్ ధర కిలోకు రూ. 115 నుండి రూ. 180కి పెరిగిందని, సరఫరాలో కొరత ఏర్పడిందని మహారాష్ట్ర బాటిల్డ్ వాటర్ మాన్యుఫ్యాక్చరర్స్ అసోసియేషన్ వెల్లడించింది.ఈ PET ప్యాకేజింగ్ ధర పెరగడం కేవలం తాగునీటికి మాత్రమే పరిమితం కాదు. సాఫ్ట్ డ్రింక్స్, ఫుడ్ డెలివరీ, ఫార్మాస్యూటికల్స్, కాస్మెటిక్స్ వంటి పరిశ్రమలు కూడా దీని ప్రభావం ఎదుర్కొంటున్నాయి. భారతదేశంలో స్వచ్ఛమైన నీటి లభ్యత ఇప్పటికే సవాలుగా ఉంది. దేశంలోని దాదాపు 70 శాతం భూగర్భ జలాలు కలుషితమై ఉన్నాయి. ఈ పరిస్థితిలో, పట్టణాల్లో 15 శాతం, గ్రామీణ ప్రాంతాల్లో 6 శాతం గృహాలు తమ ప్రాథమిక దాహం తీర్చుకోవడానికి బాటిల్ వాటర్ పైనే ఆధారపడుతున్నాయి.పెరిగిన ఖర్చులను భరించలేక, మహారాష్ట్ర వంటి రాష్ట్రాల్లో దాదాపు 20 శాతం తయారీ ప్లాంట్లు తాత్కాలికంగా ఉత్పత్తిని నిలిపివేశాయి. యుద్ధ పరిస్థితులు ఇలాగే కొనసాగితే, రాబోయే రోజుల్లో బాటిల్ వాటర్ ధరలు మరింత పెరగే అవకాశం ఉందని నిపుణులు హెచ్చరిస్తున్నారు.