గ్లోబల్ డెట్ షాక్.. అప్పుల భారంతో కుదేలవుతున్న దేశాలు

అభివృద్ధి చెందిన మరియు అభివృద్ధి చెందుతున్న ఆర్థిక వ్యవస్థల్లో ద్రవ్యపరమైన ఒత్తిళ్లు పెరుగుతున్న నేపథ్యంలో ప్రపంచ దేశాల అప్పులు ఆందోళనకర స్థాయికి చేరుతున్నాయని అంతర్జాతీయ ద్రవ్య నిధి సంస్థ (International Monetary Fund) హెచ్చరించింది.2029 నాటికి ప్రపంచ రుణం జీడీపీలో దాదాపు 100 శాతానికి చేరే అవకాశం ఉందని సంస్థ అంచనా వేసింది. ప్రపంచ ఆర్థిక వ్యవస్థ స్థిరంగా కనిపిస్తున్నప్పటికీ, ప్రభుత్వాల ఆర్థిక పరిస్థితులు క్రమంగా బలహీనపడుతున్నాయని ఐఎంఎఫ్ నివేదిక పేర్కొంది. 2025 నాటికే ప్రపంచ రుణం జీడీపీలో సుమారు 94 శాతానికి చేరినట్లు వెల్లడించింది.నిరంతర బడ్జెట్ లోటు, పెరుగుతున్న వడ్డీ ఖర్చులు, అలాగే భౌగోళిక రాజకీయ ఉద్రిక్తతలు ఈ పరిస్థితికి ప్రధాన కారణాలని పేర్కొంది. ఇటీవలి పశ్చిమాసియా ఘర్షణలు ఇంధన ధరలను పెంచి ప్రపంచ ఆర్థిక వ్యవస్థపై అదనపు భారాన్ని మోపుతున్నాయని నివేదికలో తెలిపింది. దీంతో ఆహారం మరియు ఇంధన ధరలు కూడా ప్రపంచవ్యాప్తంగా పెరుగుతున్నాయి. ఈ ప్రభావం ముఖ్యంగా దిగుమతులపై ఆధారపడే, తక్కువ ఆదాయ దేశాలపై ఎక్కువగా పడుతోందని ఐఎంఎఫ్ హెచ్చరించింది.అయితే ప్రతికూల పరిస్థితుల్లోనూ భారత్‌తో పాటు మెక్సికో, టర్కీ వంటి దేశాలు కొంత స్థిరమైన ఆర్థిక పనితీరు చూపుతున్నాయని నివేదిక పేర్కొంది. భారత్‌లో ఖర్చుల నియంత్రణ మెరుగ్గా ఉండటం, బలమైన వృద్ధి రేటు దీనికి కారణమని ఐఎంఎఫ్ అభిప్రాయపడింది. భారత్ రుణ–జీడీపీ నిష్పత్తి సుమారు 84 శాతం వద్ద ఉన్నట్లు తెలిపింది.భారత్ తర్వాత మధ్యస్థ రుణ భారంతో ఉన్న దేశాల్లో బ్రెజిల్ (90 శాతం), చైనా (100 శాతం), యూకే మరియు కెనడా (105 శాతం), స్పెయిన్ (110 శాతం) ఉన్నాయి. అంతర్జాతీయ సంక్షోభాలు కొనసాగితే ఇంధన ధరలు, ఆర్థిక నిర్వహణపై మరింత ఒత్తిడి పెరిగే ప్రమాదం ఉందని హెచ్చరించింది.గత దశాబ్దంతో పోలిస్తే దేశాల రుణ సామర్థ్యం తగ్గిపోయిందని ఐఎంఎఫ్ పేర్కొంది. ప్రస్తుతం అధిక వడ్డీ రేట్లతో రుణాలు తీసుకోవాల్సి వస్తుండటంతో వడ్డీ భారం వేగంగా పెరుగుతోందని తెలిపింది.అత్యధిక అప్పుల భారంతో ఉన్న దేశాల్లో జపాన్ (జీడీపీలో 240 శాతం), సింగపూర్ (180 శాతం), గ్రీస్ (170 శాతం), ఇటలీ (145 శాతం), అమెరికా (125 శాతం) ఉన్నాయని నివేదిక వెల్లడించింది. మరోవైపు రష్యా, సౌదీ అరేబియా, యూఏఈ, ఆస్ట్రేలియా, జర్మనీ, నెదర్లాండ్స్ వంటి దేశాలు 20–65 శాతం మధ్య తక్కువ రుణ భారాన్ని కలిగి ఉన్నాయని పేర్కొంది.