ఎన్నార్సీ కాంగ్రెస్ సమయంలోనే వచ్చింది...

పౌరసత్వ సవరణ చట్టానికి వ్యతిరేకంగా వస్తున్న నిరసనలపై ప్రధాని నరేంద్ర మోదీ స్పందించారు. దిల్లీ రాంలీలా మైదాన్‌లో జరుగుతున్న సభలో ప్రధానమంత్రి నరేంద్ర మోదీ ప్రసంగించారు.'మీకు నేను నచ్చకపోతే నన్ను ద్వేషించండి. నా దిష్టిబొమ్మలు దహనం చేయండి. అంతే తప్ప పేదవాళ్ల ఆటో రిక్షాలు, వారి ఆస్తులను తగలబెట్టకండి' అంటూ విజ్ఞప్తి చేశారు. పేద ప్రజలు, పోలీసులను కొట్టడం ద్వారా ఏం పొందుతారని ప్రశ్నించారు. తమ ప్రభుత్వం మతం, కులం గురించి ఎప్పుడు అడగలేదని.. పేదరిక నిర్మూలనకు తాము క‌ృషి చేస్తున్నామని అన్నారు. బీజేపీ ప్రభుత్వం తీసుకొచ్చిన పథకాలు ప్రతీ ఒక్కరికీ అందుతున్నాయన్నారు. 'సబ్‌కా సాత్ సబ్‌కా వికాస్' అన్న నినాదానికి తాము కట్టుబడి ఉన్నామని చెప్పారు. ఢిల్లీ అసెంబ్లీ ఎన్నికల ప్రచారంలో భాగంగా రామ్‌లీలా మైదానంలో నిర్వహించిన విశాల్ ర్యాలీలో మోదీ మాట్లాడారు.
"నగరాల్లో ఉంటున్న కొంతమంది చదువుకున్న నక్సలైట్లు, అర్బన్ నక్సలైట్లు ముస్లింలందరినీ డిటెన్షన్ సెంటర్లకు పంపిస్తారని వదంతులు వ్యాప్తి చేస్తున్నారు. ఈ డిటెన్షన్ సెంటర్ అంటే ఏంటని చదువుకున్న వాళ్లు కూడా అడుగుతుంటే నాకు ఆశ్చర్యంగా ఉంది. రాజ్యాంగ సవరణ, ఎన్ఆర్సీ అంటే ఏంటో మరోసారి చదవండి. కాంగ్రెస్, అర్బన్ నక్సలైట్లు వ్యాప్తి చేస్తున్న వదంతులు పూర్తిగా అబద్ధం. దేశాన్ని నాశనం చేయాలనే దురుద్దేశంతోనే వారు ఇలా చేస్తున్నారు" అని మోదీ అన్నారు.
"ఎన్నార్సీ కాంగ్రెస్ సమయంలోనే వచ్చింది. అప్పుడు వాళ్లు నిద్రపోతున్నారా? మేం ఎన్నార్సీని కాబినెట్లో గానీ, పార్లమెంటుకు గానీ తీసుకురాలేదు. మీకు యాజమాన్య హక్కులు ఇవ్వడానికి మేం చట్టం ఆమోదించితే, అదే సెషన్లో మిమ్మల్ని బయట పంపించడానికి మేం చట్టం కూడా తీసుకువస్తామా?"
"ఒక చిన్న వ్యత్యాసం ఉంది. చొరబాటుదారులు ఎప్పుడూ తమ గుర్తింపు బయటపెట్టరు. శరణార్థి ఎప్పుడూ తన గుర్తింపు దాచుకోడు. ఈ చొరబాటుదారుల్లో చాలా మంది బయటికొచ్చి మాట్లాడుతున్నారు. వాళ్లు నిజం ఎందుకు మాట్లాడ్డం లేదు. వాస్తవాలు బయటికి వస్తాయని వాళ్లు భయపడుతున్నారు" అని మోదీ అన్నారు.