కాబోయే ‘అల్లుడు’ అత్తారిల్లు దోచేశాడు !
Andhra Pradesh Telugu | Suryaa Desk | Published : Mon, Dec 23, 2019, 07:01 PM
ఓ ఇంటికి కాబోయే అల్లుడే చోరీకి పాల్పడిన సంఘటన పాతబస్తీలోని కాలాపత్తర్ పరిధిలో చోటుచేసుకుంది. ఈ చోరీకి సంబంధించి పోలీసులు అందించిన వివరాల ప్రకారం హైదరాబాద్ పాతనగర శివారు శాస్త్రిపురం కింగ్కాలనీకి చెందిన సల్మాన్ఖాన్ (27) సేల్స్మెన్గా పనిచేస్తున్నాడు. ఇతనికి కాలాపత్తర్కి చెందిన యువతితో వివాహం చేయడానికి ఇరువైపుల కుటుంబాలు అంగీకారానికి వచ్చాయి.
పెళ్లి ఏర్పాట్లు హడావుడిలో ఉండగా వారింట్లో నగలు, నగదు విషయాలు యువతి ద్వారా తెలుసుకున్న సల్మాన్ఖాన్ అత్తవారి ఇంటికి వెళ్లి చోరీ చేయాలని పథకం వేశాడు. అత్తవారి కుటుంబం దర్గాకు వెళ్లిన సమయాన్ని అదునుగా చేసుకొని తన చోరీ పథకాన్ని అమలు చేశాడు. కాబోయే అత్తవారింట్లోని కిటికీని తొలగించి నిందితుడు సల్మాన్ఖాన్ లోపలకు ప్రవేశించాడు. బీరువాలో భద్రపరిచిన రూ.2.20 లక్షల నగదు, నగలు చోరీ చేశాడు. దర్గా నుంచి వచ్చిన అత్తగారి కుటుంబం చోరీ విషయాన్ని గుర్తించి పోలీసులకు ఫిర్యాదు చేసింది. పోలీసులు కేసు నమోదు చేసుకొని దర్యాప్తు ప్రారంభించారు. సీసీ కెమేరాల ఆధారంగా నిందితుడు సల్మాన్ఖాన్గా గుర్తించి, అరెస్టు చేశారు.
|
|