అమరావతి రైతుల‌కు ఉప-రాష్ట్రపతి వెంకయ్యనాయుడు భ‌రోసా !

ఆంధ్రప్రదేశ్‌లో కొత్తగా మూడు రాజధానుల అంశం తెరపైకి రావడంతో అమరావతి ప్రాంతం ఆందోళనలు, నిరసనలతో హోరెత్తుతోంది. రాజధాని కోసం తాము భూములిస్తే తమ త్యాగాలను ప్రభుత్వం అపహాస్యం చేస్తోందని వారు మండిపడుతున్నారు. అభివృద్ధి వికేంద్రీకరణ పేరుతో ముఖ్యమంత్రి జగన్‌మోహన్ రెడ్డి రాజధానిని ఇక్కడ నుంచి తరలించడానికి ప్రయత్నిస్తున్నారని ఆ ప్రాంత ప్రజలు ఆరోపిస్తున్నారు. అమరావతినే రాజధానిగా కొనసాగించాలని డిమాండ్ చేస్తూ గత వారం రోజుల నుంచి ఆందోళనలు కొనసాగుతున్నాయి. ఈ నేపథ్యంలో మంగళవారం కృష్ణా జిల్లా ఆత్కూరులోని స్వర్ణభారత్ ట్రస్ట్‌కు విచ్చేసిన ఉప-రాష్ట్రపతి వెంకయ్యనాయుడిని రాజధాని ప్రాంత రైతులు, అమరావతి పరిరక్షణ సమితి సభ్యులు కలిసి వినతిపత్రం అందజేశారు. ఈ సందర్భంగా వెంకయ్య మాట్లాడుతూ.. నవ్యాంధ్ర రాజధాని రైతుల సమస్యలు నాకు తెలుసని, ఈ అంశంలో ఏంచేస్తే బాగుంటుందో, మంచి జరుగుతుందో అదే చేస్తానని అన్నారు. ఎవరికి చెప్పాలో వారికి చెబుతానని, మీ విన్నపంతో పాటు నా అభిప్రాయాన్ని తెలియజేస్తానని రైతులకు భరోసా ఇచ్చారు. దేశంలో ఎక్కడాలేని విధంగా రాజధాని కోసం రైతులు స్వచ్ఛందంగా 33వేల ఎకరాలు ఇచ్చారని, వారి ఆవేదనను అర్థం చేసుకున్నానని అన్నారు. రాష్ట్రాభివృద్ధి కోసం తన వంతు సాయం ఎప్పుడూ చేస్తూనే ఉంటానని.. ప్రస్తుతం రాజ్యాంగ పదవిలో ఉన్నందున వివాదస్పద వ్యాఖ్యలు చేయకూడదని పేర్కొన్నారు. అలాగే స్వర్ణభారత్‌ ట్రస్ట్‌లోనూ ఎలాంటి రాజకీయాలు మాట్లాడకూడదన్న నియమం ఉందని తెలిపారు. తొలుత రైతులను కలవకూడదని భావించినా, వారి పరిస్థితిని చూసి మనసు మార్చుకున్నానని అన్నారు. వెంకయ్యనాయుడికి వినతి పత్రం ఇచ్చిన అనంతరం రైతులు మాట్లాడుతూ... ఆరు రోజులుగా తాము నిద్రాహారాలు మాని రోడ్లపై కాలం వెళ్లదీస్తున్నామని ఆవేదన వ్యక్తం చేశారు. రాష్ట్రాభివృద్ధికి భూములను స్వచ్ఛందంగా ఇచ్చామని, తామంతా చిన్న, సన్నకారు రైతులమని, కేంద్రం తమను ఆదుకునేలా చూడాలని వారు విజ్ఞప్తి చేశారు. ప్రధాని మోదీ వచ్చి రాజధానికి శంకుస్థాపన చేశారని, ప్రభుత్వం మారిన ప్రతిసారీ రాజధాని మారకుండా చూడాలని ఉపరాష్ట్రపతిని రైతులు కోరారు.