పెళ్లైన 11 నెలలకే..మిస్టరీగా లోకేశ్వరి మరణం
national | Suryaa Desk | Published : Mon, Jan 27, 2020, 12:51 PM
ఓ వివాహిత అనుమానాస్పద మృతి చెందింది. దీనికి సంబంధించిన వివరాలిలా ఉన్నాయి. కర్ణాటకలోని హోసదుర్గ గ్రామానికి చెందిన లోకేశ్వరికి 11 నెలల క్రితం బెంగుళూరు సమీపంలోని ఆనేకల్ తాలుకా నెరళూరు గ్రామానికి చెందిన నవీన్ తో వివాహం జరిగింది. పెళ్లి సమయంలో లోకేశ్వరి తల్లిదండ్రులు భారీగానే కట్నకానుకలిచ్చి ఘనంగా వివాహం జరిపించారు. ఆ తర్వాత వీరి కాపురం సజావుగానే సాగింది.
శుక్రవారం సాయంత్రం లోకేశ్వరి తల్లిదండ్రులతో ఫోన్ లో మాట్లాడింది. వారితో మాట్లాడినప్పుడు ఏ విషయం కూడా వారితో చెప్పలేదు. సంతోషంగానే వారితో మాట్లాడింది. ఆ తర్వాత శుక్రవారం రాత్రి సమయంలో లోకేశ్వరి ఇంట్లోనే ఉరి వేసుకుని ఆత్మహత్యకు పాల్పడింది. దీనిని చూసిన భర్త నవీన్ పోలీసులకు, లోకేశ్వరి తల్లిదండ్రులకు సమాచారమిచ్చాడు. ఆ తర్వాత పోలీసులు లోకేశ్వరి మృతదేహాన్ని పోస్టుమార్టం నిమిత్తం ఆస్పత్రికి తరలించారు.
తమ కూతురిది ఆత్మహత్య కాదని హత్య అని లోకేశ్వరి తల్లిదండ్రులు పోలీసులకు ఫిర్యాదు చేశారు. దీంతో పోలీసులు నవీన్ ను అదుపులోకి తీసుకొని విచారిస్తున్నారు. మొత్తానికి లోకేశ్వరి మరణం మిస్టరీగా మారింది. పెళ్లైన 11 నెలలకే కూతురు మరణించడంతో తల్లిదండ్రులు విషాదచాయల్లో మునిగిపోయారు.
|
|