నాడు తండ్రి తెస్తే.. నేడు కొడుకు రద్దు చేశాడు

ఏపీ శాసనమండలి రద్దుకు అసెంబ్లీ తీర్మాణించింది. ఆనాడు ఎన్టీఆర్ ముఖ్యమంత్రిగా ఉన్నప్పుడు మండలిని రద్దు చేశారు. ఆ తర్వాత వైఎస్సార్ సీఎం అయ్యాక మండలిని పునరుద్దరించారు. నేడు ఆ మండలిని మళ్లీ వైఎస్ జగన్ రద్దు చేశారు. తండ్రి తెస్తే కొడుకు రద్దు చేశారని అంతా చర్చించారు. మండలి రద్దు పై దీర్ఘంగా ఆలోచనలు చేసినా చివరికి మండలి రద్దుకే సీఎం జగన్ మొగ్గు చూపారు.

ఉమ్మడి ఏపీలో 1958లో ఆర్టికల్‌-168 కింద జూలై 1న శాసనమండలి తొలిసారిగా ఏర్పాటైంది. అప్పటి రాష్ట్రపతి రాజేంద్రప్రసాద్‌, 1958 జులై 8న మండలిని అధికారికంగా ప్రారంభించారు. మండలి ఆవిర్భవించిన 27 సంవత్సరాల తర్వాత అప్పటి ముఖ్యమంత్రి ఎన్టీఆర్‌ రద్దు చేశారు. అనవసరమైనది..జనాభాలో ప్రాతినిధ్యం లేనిదని ఎన్టీఆర్‌ అభిప్రాయపడ్డారు. రాష్ట్ర బడ్జెట్‌పై భారం, చట్టాలు ఆమోదించడంలో జాప్యం కావడంతో రద్దు చేశారు. 1985లో ఎన్టీఆర్‌ సీఎం అయ్యాక వెంటనే మండలిని రద్దు చేయాల్సిందిగా అసెంబ్లీలో తీర్మానం చేశారు. ఈ తీర్మానాన్ని కేంద్రానికి పంపగా.. అదే ఏడాది మే 31న మండలిని రద్దు చేస్తూ కేంద్రప్రభుత్వం గెజిట్‌ నోటిఫికేషన్‌ జారీ చేసింది. దీంతో 1–06–1985న మండలి రద్దయిపోయింది.

ఆ తర్వాత మండలి కోసం 1990 జనవరి 22న అసెంబ్లీలో తీర్మానం చేశారు. 1990 మే 28న పార్లమెంటు ఎగువసభలో తీర్మానం చేసి పాస్‌ చేశారు. 1991లోక్‌సభ రద్దుతో మండలి పునరుద్దరణ తీర్మానం మరుగునపడింది. 2004లో కాంగ్రెస్‌ పార్టీ అధికారంలోకి వచ్చింది. 2004 జులై 8న శాసన మండలి పునరుద్దరణకు ఆంధ్రప్రదేశ్‌ అసెంబ్లీ తీర్మానం చేసింది. 2006 డిసెంబర్ లో పార్లమెంట్‌ ఆమోదం పొందింది. 2007 జనవరి 10న రాష్ట్రపతి ఆమోద ముద్ర వేశారు.

2007 మార్చి 30న ఏపీ శాసనమండలి మళ్లీ ఏర్పాటైంది. శాసనసభతో పాటు మండలి కార్యకలాపాలు ప్రారంభమయ్యాయి. 27 జనవరి 2020 న మండలిని రద్దు చేస్తూ అసెంబ్లీ తీర్మానించింది. దీనిని పార్లమెంటుకు పంపాల్సి ఉంది. సీఎం జగన్ ఏది అనుకుంటే అది చేస్తారని మరోసారి రుజువైందని అంతా చర్చించుకుంటున్నారు. అనుకున్నది చేసే జగన్ మండలి రద్దు నిర్ణయంతో మరోసారి తన పట్టును నిరూపించుకున్నారు.