బ్లాక్ మెయిల్ తో నగదు దోచిన కిలేడీ
Andhra Pradesh Telugu | Suryaa Desk | Published : Sun, Aug 30, 2020, 04:23 PM
ఎవరో అపరిచితురాలు ఫోన్ చేసి స్వీట్ వాయిస్తో హాయ్ చెప్పి.. సారీ రాంగ్ నంబర్ అని పెట్టేస్తే మీరు అక్కడితో ఆగిపోండి. తనెవరూ ఎందుకు ఫోన్ చేసిందో తెలుసుకోవాలని ఉత్సాహం ప్రదర్శించారో మీ జేబు గుల్లయ్యే ప్రమాదం ఉంది. ముంబైలో అలాంటి ఘటనే చోటుచేసుకుందని టీఓఐ కథనం పేర్కొంది.
ఆ కథనం ప్రకారం, 25 ఏళ్ల యువకుడికి జులై నెలలో ఓ యువతి ఫోన్ చేసింది. తర్వాత ఇద్దరి మధ్య చాటింగ్ మొదలైంది. ఈ చనువుతో.. ఓ రోజు వీడియో కాల్ చేసి బట్టలు విప్పేయాలని అతణ్ని అడిగింది. ముందూ వెనుకా ఏం ఆలోచించకుండా ఆ యువకుడు దుస్తులు తీసేసి.. ఆమెకు నగ్నంగా ఫోజులిచ్చాడు.
సీన్ కట్ చేస్తే మరుసటి రోజు తన ‘ప్రేయసి’ నుంచి ఓ వీడియో మెసేజ్ వచ్చింది. అది అతడి నగ్న వీడియో కావడంతో షాకయ్యాడు. ఆమె రూ.50 వేలు డిమాండ్ చేయడంతో అతడి కళ్లు బైర్లు కమ్మాయి. అంతలోనే సీబీఐ ఏజెంట్నంటూ ఓ వ్యక్తి ఫోన్ చేశాడు. ఆ న్యూడ్ వీడియో గురించి చెప్పి.. డబ్బులు ఇవ్వకపోతే.. వీడియోను సోషల్ మీడియాలో పెడతామని హెచ్చరించాడు. తన దగ్గర అంత డబ్బు లేదని ఆ ఇద్దరితో బేరామడిన యువకుడు... రూ. 37 వేలు ఇస్తానని చెప్పడంతో వారు అంగీకరించారు. రూ.37 వేలను ఆ యువతి సూచించిన నంబర్కు వ్యాలెట్ ద్వారా పంపాడు.
ఆ తర్వాత మళ్లీ డబ్బులు కావాలంటూ వారి దగ్గర్నుంచి వేధింపులు మొదలయ్యాయి. దీంతో ఇక తన వల్ల కాదని భావించిన ఆ యువకుడు పోలీసులను ఆశ్రయించాడు. కేసు నమోదు చేసిన పోలీసులు విచారణ జరుపుతున్నారు.
|
|