జుట్టు రాలడం + చుండ్రు + తలలో పేలు మూడింటికీ సింపుల్ చిట్కా

శీతాకాలం వచ్చిందంటే చాలు జుట్టు సమస్యలు ఎక్కువైపోతాయి. ముఖ్యంగా జుట్టు రాలడం, చుండ్రు సమస్యలు ఎక్కువగా ఉంటాయి. ఇక, ఈ రోజుల్లో తలలో పేలు సమస్య కూడా తీవ్రంగా మారుతోంది. ముఖ్యంగా చిన్న పిల్లలు తలలో పేలు సమస్యతో బాధపడుతున్నారు. పెద్దలు కూడా ఈ సమస్య బారిన పడుతున్నారు.

ఈ జుట్టు సమస్యల్ని వదిలించుకోవడానికి మార్కెట్లో దొరికే ఖరీదైన ప్రొడక్ట్స్, ఆయిల్స్ , షాంపూలు, కండీషనర్లు వాడుతున్నారు. అయితే, ఇవి వాడినా ఫలితం ఉండటం లేదు. అంతేకాకుండా ఇంకా ఎన్నో సమస్యలు వస్తున్నాయి. కొన్ని ఇంటి సహజ నివారణలు ఈ సమస్యల్ని తగ్గించడంలో ప్రభావవంతంగా పనిచేస్తాయి.

అలాంటి ఓ సింపుల్ చిట్కాను ప్రముఖ హెయిర్ స్టైలిస్ట్ జావేద్ హాబీబ్ షేర్ చేసుకున్నారు. ఈ చిట్కా పాటించడం చాలా సులభం. ఈ చిట్కాతో జుట్టు రాలడం, చుండ్రు, తలలో పేలు మూడు సమస్యలు పరిష్కారమవుతున్నారు. ఈ చిట్కా కోసం కేవలం రెండంటే రెండు పదార్థాలు చాలు. ఇంతకీ ఆ చిట్కా ఏంటి, దాన్ని ఎలా అప్లై చేయాలి, ప్రయోజనాలేంటో ఇప్పుడు చుద్దాం.

జావేద్ హాబీబ్ ఏం చెప్పారు?

సెలబ్రిటీ హెయిర్ స్టైలిస్ట్ జావేద్ హాబీబ్ గురించి ప్రత్యేకంగా చెప్పాల్సిన పనిలేదు. ఈయన దేశవ్యాప్తంగా వేలాది హెయిర్ సెలూన్లను తెరిచారు. ఇవన్నీ జుట్టుకు సంబంధించి అద్భుతమైన సేవల్ని అందిస్తున్నాయి. ఇక, జావేద్ హాబీబ్ స్వయంగా చర్మం, జుట్టుకు సంబంధించిన అనేక వీడియోల్ని పంచుకుంటారు.

తన ఇన్‌స్టాగ్రామ్ ఖాతాలో కొన్ని చిట్కాలను షేర్ చేస్తారు. ఇవి ఎంతో ప్రభావవంతంగా ఉంటాయి. లేటెస్ట్‌గా చుండ్రు, జుట్టు రాలడం, తలలో పేలు సమస్యలతో చాలా మంది బాధపడుతున్నారని ఆయన పేర్కొన్నారు. ఈ సమస్యల్ని తగ్గించడానికి ఏం చేయాలో కూడా వివరించారు. ఆ చిట్కా ఏంటో తెలుసా?

జావేద్ హాబీబ్ చెప్పిన సింపుల్ చిట్కాకి కావాల్సిన పదార్థాలు

ఈ సింపుల్ చిట్కా కోసం మీకు రెండంటే రెండు పదార్థాలు చాలు. అవేంటో కాదు ఒకటి కొబ్బరి నూనె. మరొకటి కర్పూరం బిళ్లలు. చాలా ఇళ్లలో పూజ కోసం కర్పూరాన్ని ఉపయోగిస్తారు. కర్పూరం మంచి వాసన కలిగి ఉంటుంది. అంతేకాకుండా జుట్టుకు ఎంతో మేలు చేస్తుందని జావేద్ హాబీబ్ అంటున్నారు. కర్పూరంలో టెర్పీన్, లినాలూల్, పినీన్, లిమోనీన్ వంటి సమ్మేళనాలు ఉంటాయి. కర్పూరం జుట్టుకు ప్రయోజనకరంగా పరిగణించబడుతుంది

కొబ్బరి నూనె

కొబ్బరి నూనెలో జుట్టుకు మేలు చేసే గుణాలు ఎన్నో ఉన్నాయి. ఇది శతాబ్ధాలుగా జుట్టు ఆరోగ్యానికి, బలానికి వాడుతున్నారు. కొబ్బరి నూనెలో ప్రోటీన్, విటమిన్ ఈ ఉంటాయి. అంతేకాకుండా యాంటీ మైక్రోబియల్ గుణాలు ఉంటాయి. ఇందులో లారిక్ ఆమ్లం ఉంటుంది. ఇవి జుట్టుకు పోషణనిస్తాయి. జుట్టుకు దీన్ని అప్లై చేయడం వల్ల సహజ తేమ లభిస్తుంది. ఇది జుట్టును లోతుగా పోషిస్తుంది. ఇందులో ఉండే యాంటీ ఆక్సిడెంట్ లక్షణాలు జుట్టును పొడిబారకుండా కాపాడతాయి.

ఈ చిట్కా ఎలా పాటించాలి?

ఇందుకోసం ఒక గిన్నెలో కొబ్బరి నూనెను తీసుకోండి. కొబ్బరి నూనెకు ఓ రెండు నుంచి మూడు కర్పూరం బిళ్ళల్ని యాడ్ చేయాలి. ఈ రెండింటి మిశ్రమాన్ని బాగా కలపాలి. ఆ తర్వాత జుట్టుకు బాగా అప్లై చేయాలని జావేద్ హాబీబ్ వివరించారు. జుట్టు కుదళ్ల నుంచి చివర్ల వరకు అప్లై అయ్యేలా అమలు చేయాలని తెలిపారు. జుట్టుకు అప్లై చేసిన తర్వాత ఈ మిశ్రమాన్ని తలపై 15 నిమిషాలు పాటు అలాగే ఉంచండి.

ఆ తర్వాత జుట్టును షాంపూతో వాష్ చేసుకోవాలి. ఈ చిట్కాతో జుట్టు రాలడం, చుండ్రు, తలలో పేలు సమస్యలకు వెంటనే ఉపశమనం లభిస్తుందని జావేద్ హాబీబ్ చెబుతున్నారు. ఈ చిట్కాను వారానికి రెండు సార్లు పాటిస్తే మంచి ఫలితాలుంటాయని ఆయన అభిప్రాయం.

ముందుగా ప్యాచ్ టెస్ట్ చేసుకోవడం మర్చిపోవద్దు. కొబ్బరి నూనె, కర్పూరం మీ జుట్టుకు హానికరం కాదు. కానీ మీకు స్కాల్ప్ అలెర్జీ లేదా సున్నితమైన తల చర్మం ఉంటే.. ప్యాచ్ టెస్ట్ లేకుండా వాటిని అప్లై చేయవద్దు. మీకు ఏవైనా సమస్యలు ఉంటే.. వెంటనే చర్మ, జుట్టు నిపుణుడ్ని సంప్రదించండి. అంతేకాకుండా తగినంత నిద్ర, సమతుల్య ఆహారం, ఒత్తిడి నియంత్రణ కూడా జుట్టు ఆరోగ్యానికి చాలా ముఖ్యం. ఈ మూడు సూత్రాలు కూడా పాటిస్తే జుట్టు బలంగా మారుతుంది.