సీనియర్ సిటిజన్లకు గుడ్ న్యూస్

సీనియర్ సిటిజన్లు అధిక వడ్డీని పొందే స్పెషల్ ఫిక్స్‌డ్ డిపాజిట్ పథకాల్లో చేరేందుకు గడువును బ్యాంకులు పెంచాయి. 60, అంతకంటే ఎక్కువ వయసు ఉండేవారి కోసం బ్యాంకులు స్పెషల్ FDలను గత ఏడాది మే నెలలో అందుబాటులోకి తీసుకువచ్చాయి. వీటిలో చేరేందుకు 2021, మార్చి 31ని ఆఖరి తేదీగా నిర్ణయించాయి. తాజాగా ఈ గడువును బ్యాంకులు జూన్ 30 వరకు పొడిగించాయి. ఐదు, అంతకంటే ఎక్కువ సంవత్సరాల గడువుతో స్పెషల్ FDలను బ్యాంకులు అందిస్తున్నాయి. ఈ పథకాల కింద సీనియర్ సిటిజన్లు సాధారణ FD రేటు కంటే ఎక్కువ వడ్డీని పొందవచ్చు. ఇప్పటివరకు స్టేట్ బ్యాంక్ ఆఫ్ ఇండియా, బ్యాంక్ ఆఫ్ బరోడా, ఐసీఐసీఐ బ్యాంక్, హెచ్‌డీఎఫ్‌సీ బ్యాంకులు మాత్రమే సీనియర్ సిటిజన్ల కోసం స్పెషల్ FD స్కీమ్‌లను ప్రవేశపెట్టాయి. వీటిపై వివిధ బ్యాంకులు ఎక్కువ వడ్డీని అందిస్తున్నాయి.

-స్టేట్ బ్యాంక్ ఆఫ్‌ ఇండియా సీనియర్ సిటిజన్ల కోసం ‘వి కేర్ డిపాజిట్’ ఫిక్స్‌డ్ డిపాజిట్ ప్లాన్‌ను ప్రవేశపెట్టింది. ఈ పథకంలో చేరిన 60 సంవత్సరాలు పైబడిన వ్యక్తులు ఐదు సంవత్సరాలు లేదా అంతకంటే ఎక్కువ కాలానికి తీసుకునే ఎఫ్‌డీలపై అదనంగా 0.3 శాతం వడ్డీని పొందుతారు. ప్రస్తుతం ఈ బ్యాంకు 10 సంవత్సరాల FD లపై 6.2 శాతం వడ్డీ రేటును అందిస్తోంది.

-ఐసీఐసీఐ బ్యాంక్ సీనియర్ సిటిజన్ల కోసం ప్రత్యేకంగా 'గోల్డెన్ ఇయర్స్' పథకాన్ని అందుబాటులోకి తీసుకువచ్చింది. దీని ద్వారా ఐదు నుంచి 10 సంవత్సరాల గడువు ఉండే ఫిక్స్‌డ్ డిపాజిట్లపై వయోవృద్ధులకు ఏటా అదనంగా 0.3 శాతం వడ్డీని అందిస్తోంది.

-హెచ్‌డీఎఫ్‌సీ బ్యాంకు ‘సీనియర్ సిటిజన్ కేర్ ఎఫ్‌డీ’ని గత ఏడాది ప్రారంభించింది. ఈ స్పెషల్ ఎఫ్‌డీ పథకంలో ఇన్వెస్టర్లకు 0.25 శాతం ఎక్కువ వడ్డీని అందిస్తోంది.

-బ్యాంక్ ఆఫ్ బరోడా కూడా సీనియర్ సిటిజన్ల కోసం స్పెషల్ FD పథకాన్ని ప్రవేశపెట్టింది. 5-10 సంవత్సరాల గడువుతో ఉండే ఈ ఫిక్స్‌డ్ డిపాజిట్ పథకాలపై బ్యాంక్ ఆఫ్ బరోడా అదనంగా 1 శాతం వడ్డీ రేటును అందిస్తుంది.