పెట్రోల్ బంకుల్లో ఈ సేవలన్నీ ఉచితమే

ఇటీవల కేంద్ర, రాష్ట్ర ప్రభుత్వాలు వ్యాట్, ట్యాక్స్ రూపంలో ధరలు పెంచి లీటర్ పెట్రోల్, డీజిల్ రూ.100 దాటేందుకు కారణమయ్యాయి. వ్యాట్ రూపంలో చెల్లిస్తున్న పైసలతో వినియోగదారులకు కొన్ని సేవలు కల్పిస్తారు. వాటి గురించి చాలా మందికి తెలియదు. పెట్రోల్ బంకుల్లో వినియోగదారులకు 6 సేవలు ఫ్రీగా కల్పిస్తారు. వాటి గురించి తెలుసుకుందాం.

పెట్రోల్ బంకుల్లో స్వచ్చమైన మంచినీరు అందించాలి. లేకపోతే మీరు చమురు సంస్థలకు ఫిర్యాదు చేయవచ్చు.

అన్ని బంకుల్లో మూత్రశాలలు, మరుగుదొడ్లు ఉంటాయి. వాటిని ఫ్రీగా ఉపయోగించుకోవచ్చు. కొన్ని చోట్ల నిర్వాహకులు వాహనదారులకు అనుమతివ్వడం లేదు. అలా చేస్తే మీరు నేరుగా పెట్రోలింగ్ సంస్థలకు ఫిర్యాదు చేయవచ్చు. లీటర్‌ పెట్రోల్, లేదా డీజిల్‌ కొనుగోలు చేస్తే అందులో మనం బంకులకు 4 నుంచి 8 పైసల వరకు మరుగుదొడ్లు, మూత్రశాలల నిర్వహణకు చెల్లిస్తున్నాం.

ఎమర్జెన్సీ సమయంలో మీరు ఫోన్ ఉపయోగించుకునే సదుపాయం బంకుల్లో ఉంటుంది. బంకుల్లో ఉండే ల్యాండ్ లేదా మొబైల్ ఫోన్ల ద్వారా మీరు ఫ్రీగా ఫోన్ చేసుకోవచ్చు. కొన్ని సార్లు దూరం వెళ్తున్న సమయంలో మీ దగ్గర ఫోన్ లేకపోతే బంకులోకి వెళ్లి ఫ్రీ ఫోన్ ను ఉపయోగించుకోవచ్చు.

టైర్లలో గాలి నింపటానికి గాలి శాతం తనీఖీ చేసుకోవటానికి అనువుగా బంకుల్లో కచ్చితంగా యంత్రాన్ని అందుబాటులో ఉంచాలి. గాలి నింపేందుకు కూడ ఓ వ్యక్తి ని అందుబాటులో ఉంచాలి. బంకులో పెట్రోల్, డీజిల్‌ కొనుగోలు చేయకున్నా, వాహనదారులు కోరితే టైర్లలో గాలి తనీఖీ చేయాలి. ఇటీవల కాలంలో వాహనాల టైర్లకు ప్రత్యామ్నయంగా నైట్రోజన్‌ నింపుతున్నారు. ట్యూబ్‌లెస్‌ టైర్లు వస్తున్నాయి. వాటిలో నైట్రోజన్‌ నింపాలి. లేకపోతే ఫిర్యాదు చేయవచ్చు.

ప్రతి బంకులో ఫిర్యాదు పెట్టే లేదా రిజిష్టర్‌ను అందుబాటులో ఉంచాలి. అందులో వినియోగదారుడు తమ ఫిర్యాదులను నమోదు చేయొచ్చు. ప్రథమ చికిత్స కిట్‌ సౌకర్యం ప్రతి బంకు వద్ధ ఉండాలి. ప్రజలకు అవసరమైనప్పుడు వాటిని ఉపయోగించుకునే వీలుంటుంది. ఈ ప్రథమ చికిత్స పెట్టెలో ఆరోగ్యాన్ని రక్షించే మందులు ఉండాలి. దీంతో పాటు అన్ని మందులపై గడువు తేదీ కూడ రాసి ఉంచాలి. పాత మందులు ఉండకూడదు.

పెట్రోల్, డీజీల్‌ నాణ్యత ప్రమాణాలను తెలుసుకునే హక్కు వినియోగదారులకు ఉంటుంది. పెట్రోల్, డీజిల్‌ నాణ్యత పరిమాణాన్ని తెలుసుకునేందుకు పరికరాలను సిద్ధంగా ఉంచాలి. వాటి ద్వారా నాణ్యత ను పరీక్షించేందుకు హక్కు మనకు ఉంటుంది. అదే విధంగా పెట్రోల్, డీజీల్‌ తక్కువగా వస్తుందనే అనుమానం వచ్చినా పరీక్షించుకోవచ్చు.

ఈ సౌకర్యాలన్ని బంకులలో ఉండాలి. కానీ నిర్వాహకులు ఇవి ఏం పెట్టకుండానే బంకులను నిర్వహిస్తుంటారు. ప్రజలు కూడా వారి హక్కులను తెలుసుకోకుండా ఇబ్బంది పడుతుంటారు. ఈ సౌకర్యాలు లేకపోతే మీరు ఏ బంక్ దగ్గర ఆగారో ఆ బంకు సంస్థకు ఫిర్యాదు చేయవచ్చు.