నూతన సంవత్సర వేడుకలపై ఆంక్షలు : ఎస్‌పి అమిత్‌ బర్దార్‌

శ్రీకాకుళం : కోవిడ్‌ వ్యాప్తి నేపథ్యంలో కొత్త సంవత్సర వేడుకలపై ఆంక్షలు విధించారు. 31వ తేదీ రాత్రి పది గంటల తర్వాత రోడ్ల పైకి ఎవరూ రావద్దని ఎస్‌పి అమిత్‌ బర్దార్‌ స్పష్టం చేశారు.  నగరంలోని జిల్లా పోలీస్‌ కార్యాలయంలో గురువారం నిర్వహించిన సమావేశంలో వార్షిక నేర నివేదికను ప్రవేశపెట్టారు. ఈ సందర్భంగా ఆయన మాట్లాడుతూ బహిరంగ ప్రదేశాల్లో పార్టీలు, కేక్‌ కటింగ్‌లు వంటి వేడుకలు నిర్వహించవద్దని సూచించారు. 31వ తేదీ రాత్రి గస్తీని ముమ్మరం చేస్తున్నామన్నారు. రోడ్లపై తిరుగుతూ హడావుడి చేసే వారిపై కఠిన చర్యలు తీసుకుంటామన్నారు. రెస్టారెంట్లు, వైన్‌ షాపులు ప్రభుత్వం నిబంధనల మేరకు వాటికి కేటాయించిన సమయం వరకే పరిమితమై ఉండాలని స్పష్టం చేశారు. బహిరంగంగా ఎక్కడా డిజె, ఇతర సౌండ్‌ సిస్టమ్‌లు పెట్టకూడదన్నారు. అర్ధరాత్రి పార్టీలకు, ఈవెంట్లకు అనుమతి లేదన్నారు. మద్యం మత్తులో రోడ్డుపై వీరంగం చేసినా,ఫ్లై ఓవర్‌, బైపాస్‌ రోడ్లపై రేసింగ్‌ లు నిర్వహించినా కఠిన చర్యలు తప్పవని హెచ్చరించారు. మైనర్‌ పిల్లలకు వారి తల్లిదండ్రులు వాహనాలు ఇవ్వద్దని సూచించారు. జిల్లావ్యాప్తంగా ప్రత్యేక నిఘా, బందోబస్తు ఏర్పాటు, డ్రంకన్‌ డ్రైవ్‌పై స్పెషల్‌ డ్రైవ్‌, ప్రత్యేక చెక్‌పోస్టులు ఏర్పాటు చేసి పకడ్బందీగా చర్యలు చేపడతామన్నారు. హోటళ్లు, రెస్టారెంట్లు, దాబాల నిర్వాహకులు కోవిడ్‌ నిబంధనలు కచ్చితంగా పాటించాల్సిందేనని స్పష్టం చేశారు. ప్రజలందరూ సహకరించాలని కోరారు.

జిల్లాలో ఈ ఏడాది నేరాలు పెరగ్గా, ప్రమాదాలు తగ్గాయన్నారు. యి. గతేడాది జిల్లాలో నేరాలు గత ఏడాది పోలిస్తే ఈ ఏడాది పెరిగాయి. 2020లో మొత్తం నేరాలు 2,697 కాగా ఈ ఏడాది 2,894 నమోదయ్యాయని తెలిపారు. గతేడాది రెండు అత్యాచార కేసులు నమోదు కాగా, ఈ ఏడాది తొమ్మిది నమోదయ్యాయన్నారు. ఈ ఏడాది 40 శాతం చోరీ కేసుల్లో నిందితులను పట్టుకున్నామని చెప్పారు. ఈ ఏడాది చోరీల్లో రూ.2,83,95,579 తస్కరించగా, రూ.1,52,99,039 స్వాధీనం చేసుకున్నట్లు తెలిపారు. గతేడాదితో 842 రోడ్డు ప్రమాదాలు సంభవించగా, 281 మంది మృత్యువాత పడ్డారని, ఈ ఏడాది 42 రోడ్డు ప్రమాదాలు తగ్గాయని వివరించారు. పోలీసులు కల్పిస్తున్న అవగాహన కార్యక్రమాలు, కృషి ఫలితంగా సైబర్‌ కేసులు తగ్గాయని తెలిపారు. జిల్లావ్యాప్తంగా డయల్‌ 100కు 7,342 ఫోన్‌ కాల్స్‌ వచ్చాయని వివరించారు.