రూ.100 తో ఏకంగా ...20 కూరలతో కడుపునిండా భోజనం

ఇరవై కూరలతో కడుపునిండా భోజనం వంద రూపాయలకి ఈ బంపర్ ఆఫర్ ఎక్కడో తెలుసా. నిత్యావసరాల ధరలు ఆకాశాన్నంటిన నేటి కాలంలో ఏదైనా హోటల్‌కి వెళ్లి భోజనం చేయాలంటే రూ.100-150 వరకు సమర్పించుకోవాల్సిందే. అంత తీసుకున్నా వారు నాలుగు కూరలు, చట్నీ, సాంబరు, పెరుగుతో సరిపెట్టేస్తారు. ఖమ్మం జిల్లా కూసుమంచిలోని ఓ హోటల్‌లో అయితే రూ.100లు ఇస్తే చాటు.. ఏకంగా 20 కూరలతో కడుపునిండా భోజనం పెడతారు. సామాన్యులు వెచ్చించగల బడ్జెట్‌లోనే పసందైన భోజనం అందిస్తూ ఆకలి తీరుస్తున్నారు నాగన్న, శివ అనే వ్యక్తులు. వివరాల్లోకి వెళ్తే... ఖమ్మం జిల్లా కూసుమంచిలో ఖమ్మం– సూర్యాపేట రాష్ట్రీయ రహదారి పక్కన ఉన్న ఈ హోటల్‌ను బెల్లంకొండ నాగన్న (రామకృష్ణ ) అనే వ్యక్తి నిర్వహిస్తున్నాడు. 24 కూరల హోటల్‌గా సుపరిచితమైన ఇక్కడికి నిత్యం రహదారి మీదుగా ప్రయాణించే వందల మంది వచ్చి కడుపునిండా భోజనం చేస్తుంటారు. పలువురు సినీ, రాజకీయ రంగాలకు చెందిన వారు కూడా ఈ హోటల్‌లో భోజనం చేసి అభినందించారు. బెల్లంకొండ నాగన్న గత 20 ఏళ్లకు పైగా ఈ హోటల్ నిర్వహిస్తున్నారు. కూసుమంచిలోని సూర్యాపేట రోడ్డులో ఉన్న శివ హోటల్‌ సైతం నాగన్న హోటల్‌ మాదిరిగా 24 కూరలను అందిస్తూ క్రేజ్‌ను సొంతం చేసుకుంది. ఈ హోటల్‌లో వెజ్ కూరలతో పాటు చికెన్‌ కర్రీని అదనంగా వడ్డించడం ప్రత్యేకత. కాలానుగుణంగా అందుబాటులో ఉన్న అన్ని రకాల కూరగాయలు, ఆకు కూరలతో పాటు శివ సొంతంగా కొన్నింటిని పండిస్తూ, మరికొన్ని కొనుగోలు చేస్తూ 20 కూరలకు తగ్గకుండా భోజనాలు అందిస్తున్నారు. వెజిటేరియన్‌ మాత్రమే కాకుండా నాన్‌వెజ్‌లో భాగంగా బిర్యానీ, చికెన్, చేప కూరలను ప్రత్యేకంగా అందిస్తున్నారు. వినియోగదారులను విశేషంగా ఆకట్టుకోవడంతో శివ హోటల్‌ చాలా త్వరగా ఆదరణ పొందింది. మండల ప్రజలతో పాటు ఖమ్మం తదితర ప్రాంతాలకు చెందిన వారు ప్రత్యేకంగా కూసుమంచికి వచ్చి భోజనాలు చేస్తుండటం విశేషంగా చెప్పుకోవచ్చు. నాగన్న, శివ హోటళ్లలో కూరల మెనూ ఇంచుమించు ఒకేలా ఉంటుంది. వాటిలో పప్పు, దోసకాయ, దొండకాయ, గోరుచిక్కుడు, చిక్కుడు కాయ, సొరకాయ, పొట్లకాయ, వంకాయ, క్యాబేజీ, క్యాలీఫ్లవర్, బీట్‌రూట్, బంగాళదుంప, చామగడ్డ, క్యారట్, కాకరకాయ, టమాట, బీర, సొరకాయ, బెండకాయ, పాలకూర, బచ్చలికూర, చుక్క కూర, గోంగూర, మామిడికాయ పచ్చడి, నిమ్మకాయ పచ్చడితో పాటు సాంబారు, పెరుగు వడ్డిస్తారు. కాగా కూరలు సీజన్‌ను బట్టి కొంచెం మారుతుంటాయి. అయినప్పటికీ 20 కూరలకు తగ్గకుండా వడ్డిస్తుండటం ప్రత్యేకత. సామాన్యులకు సైతం అందుబాటులో ఉండేలా భోజనానికి రూ.100లు మాత్రమే తీసుకుంటూ వీరిద్దరు అందరి మన్ననలు పొందుతున్నారు.