తక్కువ ఈఎంఐ ఆఫర్‌తో...కొత్త ఎలక్ట్రిక్ స్కూటర్ కొనుగోలుకు అవకాశం

నేడు ఏ వస్తువునైనా కొనుగోలు చేసేందుకు వీలుగా అనేక మార్గలు మనముందున్నాయి. మీరు కొత్తగా స్కూటర్ కొనుగోలు చేయాలని భావిస్తున్నారా? అది కూడా ఎలక్ట్రిక్ స్కూటర్ కొనేందుకు రెడీ అవుతున్నారా? అయితే మీకు శుభవార్త. మీకోసం ఒక ఆఫర్ అందుబాటులో ఉంది. తక్కువ ఈఎంఐ ఆఫర్‌తో మీరు కొత్త ఎలక్ట్రిక్ స్కూటర్ కొనుగోలు చేయొచ్చు. ఇంకా తగ్గింపు ఆఫర్ కూడా అందుబాటులో ఉంది. ఆఫర్ పూర్తి వివరాలు ఎలా ఉన్నాయో తెలుసుకుందాం. హీరో ఎలక్ట్రిక్ తాజాగా దేశీ అతిపెద్ద బ్యాంక్ స్టేట్ బ్యాంక్ ఆఫ్ ఇండియాతో SBI జతకట్టింది. ఇందులో భాగంగా హీరో ఎలక్ట్రిక్ స్కూటర్ కొనాలని భావించే వారికి సులభంగానే రుణం లభిస్తుంది. అంతేకాకుండా తక్కువ వడ్డీ రేటుకే రుణం లభిస్తుంది. ఇంకా యోనో ద్వారా చెల్లింపులు చేస్తే అదనంగా రూ.2 వేల తగ్గింపు సొంతం చేసుకోవచ్చు. తక్కువ డాక్యుమెంటేషన్‌తో డిజిటల్ మార్గంలో పేపర్‌లెస్ టూవీలర్ లోన్ పొందొచ్చు. అంతేకాకుండా హీరో ఎలక్ట్రిక్ టచ్ పాయింట్లకు వెళ్లి లోన్ కోసం దరఖాస్తు చేసుకోవచ్చు. ఇతర సమాచారం కూడా పొందొచ్చు. ప్రస్తుతం మార్కెట్లో ఈవీలకు అధిక డిమాండ్ ఉందని హీరో ఎలక్ట్రిక్ సీఈవో సహిందర్ గిల్ తెలిపారు. కస్టమర్లు సులభంగానే ఈవీలు కొనుగోలు చేయడానికి ప్రయత్నిస్తున్నామని, తమ డీలర్‌షిప్స్‌లో సులభంగానే లోన్ పొందే వెసులుబాటు ఉందని వివరించారు. పలు రకాల ఫైనాన్స్ సంస్థలు, బ్యాంకులతో భాగస్వామ్యం కుదుర్చుకున్నామని తెలిపారు. ఎస్‌బీఐ చీఫ్ జనరల్ మేనేజర్ (పర్సనల్ బ్యాంకింగ్ బిజినెస్ యూనిట్) దేవేంద్ర కుమార్ మాట్లాడుతూ.. టూవీలర్ ఈవీ మార్కెట్ లీడర్‌గా కొనసాగుతున్న హీరో ఎలక్ట్రిక్‌తో భాగస్వామ్యం కుదుర్చుకోవడం వల్ల కస్టమర్లకు ఆకర్షణీయ ఫైనాన్స్ ఆప్షన్లు అందుబాటులోకి వస్తాయని వివరించారు. యోనో యాప్ ద్వారా అర్హత కలిగిన ఎస్‌బీఐ కస్టమర్లు తక్షణం డిజిటల్ టూవీలర్ లోన్ పొందొచ్చని తెలిపారు. ఎస్‌బీఐ ఈజీ రైడ్ లోన్ కింద 4 ఏళ్ల టెన్యూర్ రుణాలకు రూ.10 వేలకు ఈఎంఐ రూ.251 నుంచి ప్రారంభం అవుతుందని పేర్కొన్నారు. హీరో ఎలక్ట్రిక్ అనేది దేశీ దిగ్గజ ఎలక్ట్రిక్ టూవీలర్ల తయారీ కంపెనీల్లో ఒకటి. లుధియానాలో ఈ కంపెనీకి తయారీ ప్లాంటు ఉంది. ఈ కంపెనీ కస్టమర్లకు పలు రకాల టూవీలర్లను అందుబాటులో ఉంచింది. హీరో ఎలక్ట్రిక్ కంపెనీకి దేశవ్యాప్తంగా 750 సేల్స్ అండ్ సర్వీస్ ఔట్‌లెట్స్ ఉన్నాయి. కంపెనీ 14 ఏళ్లుగా సర్వీసులు అందిస్తోంది.