నోపార్కింగ్ చోటు కారు నిలిపారు...క్రేన్ దాన్ని లాక్కేలింది

నోపార్కింగ్ చోట కారు ఆపి వ్యాపారం లావాదేవీలు నడుపుతున్న వారిపై ట్రాఫిక్ పోలీసులు కాస్త కఠినంగా వ్యవహరించారు. వాహనదారులు నిబంధనలకు విరుద్ధంగా రోడ్లపై పార్కింగ్ చేస్తే వారిపై సంబంధిత అధికారులు చర్యలు తీసుకుంటారు. ఒకవేళ ఆ వాహనాల్లో ఎవరూ లేకపోతే వాటిని అక్కడ నుంచి తొలగిస్తారు. తర్వాత ఆ వాహనదారులకు వార్నింగ్ ఇచ్చి, అవసరమైతే జరిమానాలు కట్టించుకుని తిరిగి వాహనాలు అప్పగిస్తారు. అలాగే ఉత్తర్ ప్రదేశ్‌లో కూడా నో పార్కింగ్ ఏరియాలో పెట్టినందుకు ఓ కారును క్రేన్‌తో తొలగించే ప్రయత్నం చేశారు. ఇక్కడ ట్విస్ట్ ఏమిటంటే ఆ కారులో ఇద్దరు వ్యక్తులున్నారు. వారి ఎంత మొత్తుకున్నా క్రేన్‌‌తో లాక్కెళ్లిపోయారు. సునీల్, అతని స్నేహితుడు లక్నోలోని హజ్రత్‌గంజ్‌లోని జన్‌పథ్‌లో కొన్ని వస్తువులను తీసుకోవడానికి కారులో వెళ్లారు. అయితే ఓ ప్రాంతంలో కారును ఆపి కిందకు దిగకుండా ఏ వస్తువులు తీసుకోవాలో చర్చించుకుంటున్నారు. ఇంతలో వారి ప్రమేయం లేకుండా కారు కదలడం మొదలైంది. ఓ క్రేన్ వారి కారును లాక్కెళ్లిపోయింది. అది గుర్తించిన వారు అరవడం మొదలుపెట్టారు. ఆపమంటూ గట్టిగా కేకలు వేశారు. వారి మాటలను, అరుపులను ఆ సిబ్బంది పట్టించుకోలేదు. వారి కారు నో పార్కింగ్‌ ఏరియాలో ఉండటాన్ని కాంట్రాక్ట్‌ సిబ్బంది గమనించి వెంటనే క్రేన్‌ వాహనంతో అక్కడకు వచ్చారు. కారు లోపల వ్యక్తులు ఉన్నప్పటికీ దానిని లాక్కెళ్లారు. నిజానికి నిబంధనల ప్రకారం నో పార్కింగ్ జోన్‌లో పార్క్ చేసిన వాహనాల్లో ఒక వ్యక్తి కూర్చుని ఉంటే వాహనాన్ని లాగకూడదు. ఈ నేపథ్యంలో దీనిపై లక్నో మున్సిపల్ కమిషనర్ దర్యాప్తునకు ఆదేశించారు. దర్యాప్తు పూర్తైన తర్వాత సంబంధిత క్రేన్‌ కాంట్రాక్టర్‌పై చర్యలు తీసుకుంటామన్నారు. కాగా స్థానికులు ఈ ఘటనకు సంబంధించి ఫోటోలు, వీడియోలు తీసి సోషల్ మీడియాలో షేర్ చేశారు.