అధునిక వంటగది.. మాడ్యులర్ కిచెన్ ప్లానింగ్‌లో ఈ జాగ్రత్తలు తప్పనిసరి!

నేటి కాలంలో ఇల్లు అందంగా ఉండటంతో పాటు సౌకర్యవంతంగా ఉండటం కూడా చాలా ముఖ్యం. ముఖ్యంగా గృహిణులు ఎక్కువ సమయం గడిపే వంటగదిని 'మాడ్యులర్' పద్ధతిలో డిజైన్ చేసుకునేటప్పుడు సరైన గాలి వెలుతురు (వెంటిలేషన్) ఉండేలా చూసుకోవాలి. వంట చేసేటప్పుడు వచ్చే పొగ, వేడి బయటకు వెళ్లడానికి వీలుగా కిటికీలు లేదా చిమ్నీ ఏర్పాటు చేసుకోవడం వల్ల వంటగది ఎప్పుడూ తాజాగా, ఆహ్లాదకరంగా ఉంటుంది.
వంటగదిలో వస్తువుల నిర్వహణ అనేది ఒక కళ. నెలకు సరిపడా సరుకులను భద్రపరుచుకోవడానికి విశాలమైన అల్మారాలు లేదా డీప్ డ్రాయర్లను ఏర్పాటు చేసుకోవడం ఎంతో మేలు. దీనివల్ల సామాన్లు అన్నీ ఒకే చోట సర్దుకోవడానికి వీలవుతుంది. బయట వస్తువులు కనిపించకుండా లోపల భద్రపరచడం వల్ల కిచెన్ ఎప్పుడూ చిందరవందరగా లేకుండా చాలా నీట్‌గా కనిపిస్తుంది, ఇది వంట చేసేవారికి మానసిక ప్రశాంతతను ఇస్తుంది.
చిన్న చిన్న వస్తువులైన చాకులు, స్పూన్‌లు, గరిటెలు వెతకడానికి సమయం వృథా కాకుండా ఉండాలంటే 'కట్లరీ ఆర్గనైజర్లను' ఉపయోగించాలి. ప్రతి వస్తువుకూ ఒక ప్రత్యేక స్థానం ఉండేలా విడివిడి గడులను నిర్మించుకుంటే, అత్యవసర సమయంలో కావాల్సిన వస్తువు వెంటనే చేతికి దొరుకుతుంది. ఇలా పద్ధతిగా సర్దుకోవడం వల్ల వంటగది చూడటానికి ఆధునికంగా ఉండటమే కాకుండా పని కూడా చాలా వేగంగా పూర్తవుతుంది.
ప్రస్తుత కాలంలో మిక్సీలు, గ్రైండర్లు, ఓవెన్లు వంటి ఎలక్ట్రానిక్ పరికరాల వాడకం విపరీతంగా పెరిగింది. అందుకే మాడ్యులర్ కిచెన్ డిజైన్ చేసేటప్పుడే అవసరమైన చోట్ల ప్లగ్ బోర్డులను ఏర్పాటు చేసుకోవాలి. వైర్లు బయటకు కనిపించకుండా, సురక్షితమైన ప్రదేశాలలో సాకెట్లు ఉండేలా ప్లాన్ చేసుకుంటే వంటగది సురక్షితంగా ఉంటుంది. సరైన విద్యుత్ పాయింట్లు లేకపోతే పని చేసేటప్పుడు ఇబ్బందులు ఎదురవుతాయని గుర్తుంచుకోవాలి.