ఓ బుడ్డోడి ఐడియా...యావత్తు ప్రపంచాన్ని ఆకట్టుకొంది

బుడ్డోడే కదా అని తేలికగా తీసుకొంటే మనం పొరబడినట్లే. ఎందుకంటే ఓ బుడ్డోడి వీడియో చూస్తే ఇది అర్థమవుతుంది. యుగాలుగా మనిషి చేపలు పట్టేందుకు ఎన్నో టెక్నిక్స్ వాడుతున్నాడు. గేలాలు, వలలు వేస్తున్నాడు. పడవల్లో వెళ్లి పట్టుకుంటున్నాడు. ఇలా ఎన్నో. ఐతే... ఓ చిన్నారి వాడుతున్న టెక్నిక్స్ మాత్రం నెక్ట్స్ లెవెల్లో ఉంది. అతని దేశీ జుగాడ్ అందర్నీ ఆశ్చర్యపరుస్తోంది. చేపలు పట్టడం ఇంత తేలికా అని నెటిజన్లు స్పందించడమే కాదు... ఆ పిల్లాణ్ని ప్రశంసలతో ముంచెత్తుతున్నారు. స్వయంగా మహీంద్రా కంపెనీ చైర్మన్ ఆనంద్ మహీంద్రా.. ఆ చిన్నారి ఆశ్చర్యపరిచే జుగాడ్ వీడియోను ట్విట్టర్‌లో షేర్ చేశారు. తన మెయిల్ ఇన్‌బాక్స్‌లో ఎలాంటి వివరాలూ లేకుండా ఈ వీడియోను పంపారని క్యాప్షన్‌లో తెలిపారు. "ఇలాంటి వీడియో గందరగోళంలో ఉన్న ఈ ప్రపంచంలో గొప్ప శాంతి అనుభూతిని ఇస్తుంది" అని ఆనంద్ మహీంద్రా అన్నారు. "సంకల్పం + సరళత + ఓర్పు = విజయం" అని తెలిపారు. ఆ వీడియోని మనం గమనిస్తే.. ఓ చిన్నారి... ఓ సంచి, చేపలకు ఆహారం, గేలం దారం, సుత్తితోపాటూ... కలపతో తయారుచేసిన దేశీ జుగాడ్‌ని చెరువు ఒడ్డుకి తెచ్చాడు. దానికి మధ్యలో చక్రం లాంటిది ఉంది. దాన్ని అక్కడి మట్టిలో బలంగా పాతాడు. దానికి మధ్యలో గేలం దారం ఉంది. ఆ దారానికి చివర ఉన్న కొక్కేలకు మూడు ఆహార ముద్దలను సెట్ చేశాడు. వాటిని బలంగా నీటి మధ్యలోకి విసిరాడు. ఆ తర్వాత ప్రశాంతంగా కూర్చున్నాడు. అంతలో గేలం కదలడం గమనించాడు. వెంటనే జుగాడ్ చక్రానికి ఉన్న గేలం దారాన్ని వెనక్కి లాగాడు. అలా లాగుతూ ఉంటే... రెండు పెద్ద చేపలు గేలంతో వచ్చాయి. అవి ఒక్కోటీ దాదాపు 2 కేజీల బరువు ఉండొచ్చు. వాటిని సంచిలో వేసుకొని తీసుకుపోయాడు. ఏప్రిల్ 1న షేర్ చేసిన ఈ వీడియోని ఇప్పటివరకు 11 లక్షల మందికి పైగా చూశారు. 77 వేల మందికి పైగా లైక్ చేశారు. చాలా మంది యూజర్లు పిల్లాడి దేశీ జుగాడ్‌ను ప్రశంసిస్తున్నారు. కొంతమంది మాత్రం చేపల్ని అలా పట్టుకోవడం బాధాకరం అంటున్నారు. వాటిని చంపి తినేబదులు శాఖాహారం తినడం మేలు అంటున్నారు. మరికొందరు... ఒకరి బాధ మరొకరికి ఆనందం కావడం సహజం అని అంటున్నారు. ఈ వీడియో ఎక్కడిది అనేది తెలియకపోయినా చిన్నారిని చూస్తుంటే భారతీయుడి లాగే కనిపిస్తున్నాడు. దీనిపై కచ్చితమైన ఆన్సర్ లేదు.