కాసుల వర్షం కురిపిస్తున్న జీఎస్టీ..ఏ మార్చి వరకు ఎంత వచ్చిందంటే

జీఎస్టీ కేంద్రానికి కాసుల వర్షం కురిపిస్తోంది. వస్తు సేవల పన్ను (జీఎస్‌టీ) వసూళ్లు కొత్త రికార్డ్ స్థాయికి చేరాయి. మార్చి నెలల జీఎస్‌టీ వసూళ్లు రూ. 1.42 లక్షల కోట్లుగా నమోదు అయ్యాయి. జనవరి నాటి రూ. 1.40 లక్షల కోట్ల కన్నా ఇవి ఎక్కువ కావడం గమనార్హం. ఎకనమిక్ రికవరీ, ఎగవేత కార్యకలాపాలు అడ్డుకోవడం, ఫేక్ బిల్లర్లపై కఠిన చర్యలు తీసుకోవడం వంటి వాటి వల్ల జీఎస్‌టీ వసూళ్లు పెరిగాయని ఆర్థిక మంత్రిత్వ శాఖ పేర్కొంటోంది. స్థూల జీఎస్‌టీ వసూళ్లు 2022 మార్చిలో రూ. 1.42 లక్షల కోట్లుగా ఉన్నాయి. గత ఏడాది ఇదే నెలతో పోలిస్తే వసూళ్లలో 15 శాతం పెరుగుదల నమోదు అయ్యింది. 2020 మార్చి నెల వసూళ్లతో పోలిస్తే ఇవి ఏకంగా 46 శాతం అధికం కావడం గమనార్హం. ఇదిలావుంటే ప్రస్తుత కలెక్షన్లను గమనిస్తే.. జీఎస్‌టీ వసూళ్లు వరుసగా 6వ నెలలో కూడా రూ. 1.3 లక్షల కోట్ల మార్క్‌ను అధిగమిస్తూనే వస్తున్నాయని చెప్పుకోవాలి. మార్చి నెల వసూల్లలో దిగుమతి వస్తువల నుంచి పొందే ఆదాయం 25 శాతం ఎక్కువగా ఉంది. డొమెస్టిక్ ట్రాన్సాక్షన్ (దిగుమతి సేవలు సహా) ద్వారా పొందే ఆదాయం 11 శాతం మేర పెరిగింది. గత ఏడాది ఇదే నెలలో పోలిస్తే ఈ మేరకు పెరుగుదల నమోదు అయ్యింది. 2021-22 ఆర్థిక సంవత్సరపు నాలుగో త్రైమాసికంలో నెలవారీ సగటు జీఎస్‌టీ కలెక్షన్ రూ. 1.38 లక్షల కోట్లుగా ఉన్నాయి. తొలి, రెండో, మూడో త్రైమాసికాల్లో అయితే సగటు నెలవారీ జీఎస్‌టీ వసూళ్లు వరుసగా రూ. 1.1 లక్షల కోట్లు, రూ. 1.15 లక్షల కోట్లు, రూ. 1.3 లక్షల కోట్లుగా ఉన్నాయి. మొత్తం వసూళ్లలో సెంట్రల్ గూడ్స్ అండ్ సర్వీసెస్ ట్యాక్స్ (సీజీఎస్‌టీ) కలెక్షన్స్ రూ. 25,830 కోట్లుగా ఉన్నాయి. స్టేట్ గూడ్స్ అండ్ సర్వీసెస్ ట్యాక్స్ (ఎస్‌జీఎస్‌టీ) వసూళ్లు రూ. 32,378 కోట్లుగా నమోదు అయ్యాయి. ఇంటిగ్రేటెడ్ గూడ్స్ అండ్ సర్వీసెస్ ట్యాక్స్ (ఐజీఎస్‌టీ) వసూళ్లు రూ. 74,470 కోట్లుగా ఉన్నాయి. ఇక సెస్ రూపంలో రూ. 9417 కోట్లు లభించాయి. ఇదిలావుంటే కేంద్ర ప్రభుత్వం ఐజీఎస్‌టీ ద్వారా సీజీఎస్‌టీకి రూ.29,816 కోట్లను, ఎస్‌జీఎస్‌టీకి రూ.25,032 కోట్లను సెటిల్ చేసింది. ఇదే నిరంతం జరిగే ప్రక్రియనే. అలాగే మోదీ సర్కార్ జీఎస్‌టీ పరిహారం కింద మార్చి నెలలో రూ.18,252 కోట్లను చెల్లించింది. రాష్ట్రాలకు, కేంద్రపాలిత ప్రాంతాలకు ఈ పరిహారం లభిస్తుంది.