గూగుల్ పేలో ఆ కొత్త సదుపాయం...మనీ ట్రాన్స్ ఫర్ మరింత ఈజీ

గూగుల్ పే  కొత్త కొత్త ఫ్యూచర్లతో ఎప్పటికపుడు తన కష్టమర్లకు చేరువవుతోంది. గూగుల్ పే వాడే వారికి కొత్త సేవలు అందుబాటులోకి వచ్చాయి. కస్టమర్లు యూపీఐ ట్రాన్సాక్షన్లను వేగంగా నిర్వహించడం కోసం కంపెనీ కొత్త వెసులుబాటు తీసుకువచ్చింది. కొత్త ఫీచర్ వల్ల ఎంపిక చేసిన కస్టమర్లు స్కానర్ ఓపెనింగ్, స్కానింగ్ వంటి స్టెప్స్‌ లేకుండా యూపీఐ ద్వారా ఇన్‌స్టంట్ డిజిటల్ పేమెంట్ నిర్వహించొచ్చు. ఈ కొత్త ఫీచర్ పేరు ట్యాప్ టు పే. క్రెడిట్ కార్డు, డెబిట్ కార్డులకు ఈ ఫీచర్ అందుబాటులో ఉంది. ఎన్ఎఫ్‌సీ ఫీచర్ కలిగి ఉన్న కొన్ని ఫోన్‌లు కూడా టచ్ ఆధారిత లావాదేవీని నిర్వహించడానికి డెబిట్ కార్డు లేదా క్రెడిట్ కార్డ్‌ని అనుకరించే ఎంపికను కలిగి ఉన్నాయి. యూపీఐ యూజర్లు ఎవరైనా ఈ కొత్త ఫీచర్ ఉపయోగించొచ్చు. పైన్ ల్యాబ్స్ ఆండ్రాయిడ్ పీఓఎస్ టర్మినల్ ద్వారా ఎన్ఎఫ్‌సీ ఫీచర్ కలిగిన స్మార్ట్ ఫోన్ ఉన్న వారు ఈ కొత్త సదుపాయాన్ని ఉపయోగించుకోవచ్చు. గూగుల్ ప్రస్తుతం రిలయన్స్ రిటైల్‌తో పైలెట్ ప్రాజెక్ట్ కింద ఈ ఫీచర్‌ను పరీక్షిస్తోంది. ఫ్యూచర్ రిటైల్, స్టార్‌బక్స్ మర్చంట్లకు కూడా ఈ ఫీచర్ అందుబాటులోకి వస్తోంది. ఇప్పుడు జీపే ట్యాప్ టు పే ఎలా పని చేస్తుందో ఒకసారి తెలుసుకుందాం.

* యూజర్లు పేమెంట్ నిర్వహించాలని భావిస్తే.. కేవలం వారి ఫోన్‌ను పీఓఎస్ టర్మినల్ వద్ద ట్యాప్ చేస్తే సరిపోతుంది.

* తర్వాత ఫోన్‌లోకి వెళ్లి యూపీఐ పిన్ ద్వారా ట్రాన్సాక్షన్‌ను ఓకే చేయాలి.

* యూపీఐ పిన్ కరెక్ట్‌గా ఎంటర్ చేసిన తర్వాత ట్రాన్సాక్షన్ పూర్తవుతుంది. అయితే ఫోన్‌లో ఇంటర్నెట్ కనెక్టివిటీ ఉండాలి.

ఈ కొత్త ఫీచర్ వల్ల లాభం ఏంటి?

కొత్త పేమెంట్ విధానం యూపీఐ ట్రాన్సాక్షన్ జరిపే ప్రక్రియలో రెండు స్టెప్స్ తొలగించారు. మీరు ఫోన్ ద్వారా స్కానర్ ఓపెన్ చేయాల్సిన పని లేదు. అలాగే స్కాన్ చేయాల్సిన అవసరం లేదు. దీని వల్ల లావాదేవీలు వేగంగా పూర్తి అవుతాయి. ఎక్కువ రద్దీ ఉండే రిటైల్ ఔట్‌లెట్స్‌, షాపుల్లో ట్యాప్ అండ్ పే యూపీఐ సేవలు అందుబాటులో ఉండటం వల్ల ట్రాన్సాక్షన్లు వేగంగా పూర్తి అవుతాయి. క్యూ మేనేజ్‌మెంట్ ఈజీ అవుతుంది. పైన్ ల్యాబ్స్‌తో కలిసి ఈ కొత్త సేవలు అందుబాటులోకి తీసుకురావడం ఆనందంగా ఉందని గూగుల్ ఏపీఏసీ హెడ్ (పే అండ్ నెక్ట్స్ బిలియన్ యూజర్ కార్యక్రమం) సాజిత్ శివనందన్ తెలిపారు. కొత్త సేవల వల్ల యూపీఐ ట్రాన్సాక్షన్లు మరింత పెరిగే అవకాశం ఉంది.