టూ విల్లర్ వాహనదార్లకు ఇది శుభవార్తే

ప్రముఖ మొబైల్ వాలెట్ సంస్థ మొబిక్విక్ తన కస్టమర్లకు శుభవార్త అందించింది. చోళమండలం జనరల్ ఇన్సూరెన్స్, ఎస్‌బీఐ జనరల్ ఇన్సూరెన్స్ వంటి సంస్థలతో భాగస్వామ్యం కుదర్చుకుంది. ఇందులో భాగంగా టూవీలర్ కలిగిన వారు థర్డ్ పార్టీ, కాంప్రెహెన్సివ్ (సమగ్రమైన) ఇన్సూరెన్స్ పాలసీలను మొబిక్విక్ ద్వారా కొనుగోలు చేయొచ్చు. కేవలం కొన్ని క్లిక్స్‌తోనే సులభంగా ఈ పని పూర్తి చేసుకోవచ్చు. అంతేకాకుండా టూవీలర్ కలిగిన వారు కేవలం వెహికల్ నెంబర్‌ను ఎంటర్ చేసి ఇన్సూరెన్స్ పాలసీని కొనుగోలు చేయొచ్చు. దీని కోసం రిజిస్ట్రేషన్ సర్టిఫికెట్ వంటివి కూడా అవసరం లేదు. ఇంకా యాడ్ ఆన్స్ కూడా ఉంటాయి. జీరో డిప్రిసియేషన్, పర్సనల్ యాక్సిడెంట్, 24 గంటలూ రోడ్ అసిస్టెన్స్ వంటి వాటిని కూడా తీసుకోవచ్చు. దీని వల్ల వాహనదారులకు ప్రతికూల పరిస్థితుల్లో ప్రయోజనం కలుగుతుంది. మొబిక్విక్ కోఫౌండర్, ఎండీ, సీఈవో బిపిన్ ప్రీత్ సింగ్ మాట్లాడుతూ.. ఈ భాగస్వామ్యం వల్ల కేవలం తమ 12 కోట్ల మంది కస్టమర్లు మాత్రమే కాకుండా ఇంకా చాలా మంది ఇన్సూరెన్స్ సేవలు పొందుతారని వివరించారు. అంతేకాకుండా మొబిక్విక్ కస్టమర్లు మొబిక్విక్ జిప్, బై నౌ పే లేటర్ వంటి సర్వీసులను కూడా ఇన్సూరెన్స్ ప్రీమియం చెల్లింపు కోసం ఉపయోగించుకోవచ్చని ఆయన తెలిపారు. చోళమండలం ఎంఎస్ జనరల్ ఇన్సూరెన్స్ కంపెనీ మేనేజింగ్ డైరెక్టర్ సూర్య నారాయణ మాట్లాడుతూ.. దేశంలో చాలా వాహనాలకు ఇన్సూరెన్స్ లేదనే విషయాన్ని చాలా సర్వేలు తెలియజేశాయని గుర్తు చేశారు. మొబిక్విక్‌కు చెందిన డిజిటల్ యూజర్ బేస్‌ను పొందటానికి ఇది మాకు మంచి అవకాశం అన్నారు. రానున్న కాలంలో ఈ ప్లాట్‌ఫామ్‌పై మరిన్ని కొత్త ప్రొడక్టులను, సర్వీసులను అందుబాటులోకి తీసుకువస్తామని తెలిపారు. ఇతర వెహికల్స్‌తో పోలిస్తే టూవీలర్స్‌లో చాలా వాటికి ఇన్సూరెన్స్ లేకపోవడాన్ని గుర్తించామని ఎస్‌బీఐ జనరల్ ఇన్సూరెన్స్ హెడ్ (ఎమర్జింగ్ బిజినెస్, రూరల్ అండ్ అగ్రికల్చర్) ప్రియ కుమార్ తెలిపారు. ఐఆర్‌డీఏఐ డేటా ప్రకారం.. 2018-19 ఆర్థిక సంవత్సరంలో రోడ్లపై 17.59 కోట్ల టూవీలర్లు ఉన్నాయి. ఈ కాలంలో కేవలం 5.9 కోట్ల టూవీలర్ పాలసీలనే విక్రయించారు. కాగా ఇన్సూరెన్స్ పాలసీ తీసుకోవాలని భావించే వారు కొన్ని విషయాలు గుర్తు పెట్టుకోవాలి. పాలసీకి సంబంధించిన పూర్తి వివరాలను తెలుసుకోవాలి. లేదంటే దాన్నిక్లెయిమ్ చేసుకునే సమయంలో ఇబ్బంది పడాల్సి రావొచ్చు.