రష్యా సైనికులను గడగడలాడిస్తున్న...లేడి సైనికురాలు

రష్యా సైనికులను ఓ లేడి సైనికురాలు గడగడలాడిస్తోంది. రెండో ప్రపంచ యుద్ధంలో జర్మన్ సైనికుల పాలిట సింహస్వప్నంగా మారి.. ఉక్రెయిన్‌ సైన్యానికే హీరోగా నిలిచి ‘లేడీ డెత్‌’గా గుర్తింపు పొందింది లియుడ్మిలా పావ్లిచెంకో. ప్రస్తుతం రష్యాతో జరుగుతున్న యుద్ధంలో ఆమె స్థానాన్ని భర్తీ చేస్తోంది ‘చార్కోల్‌’. ఈ యోధురాలు క్రెమ్లిన్ బలగాలను ధీటుగా ఎదుర్కొంటూ.. వీరోచిత పోరాటం చేస్తోంది. ముఖాన్ని మాస్క్‌తో కప్పి ఉన్న ఈ ధీరవనిత ఫొటోలను ఉక్రెయిన్‌ సైన్యం తాజాగా ఫేస్‌బుక్‌లో షేర్ చేసింది. ఆమె పేరును బయటపెట్టకుండా ‘చార్కోల్‌’ అంటూ పేర్కొంది. రెండో ప్రపంచ యుద్ధంలో వీరోచితంగా పోరాడిన ‘లేడీ డెత్‌’తో ఆమెను పోల్చింది. ఉక్రెయిన్‌ సైన్యం పంచుకున్న వివరాల ప్రకారం.. తన సోదరుడి కోరిక మేరకు చార్కోల్ 2017లో మెరైన్‌ సైన్యంలో చేరారు. రష్యా మద్దతున్న వేర్పాటువాదులకు వ్యతిరేకంగా.. తూర్పు ఉక్రెయిన్ ప్రాంతంలో విశేష సేవలందించారు. పదుల సంఖ్యలో శత్రువులను హతమార్చారు. ఈ ఏడాది జనవరి నాటికి ఒప్పందం ముగియడంతో విధుల నుంచి తప్పుకొన్నారు.

అయితే, ప్రత్యేక సైనిక చర్య పేరుతో ఫిబ్రవరి 24న రష్యా దండయాత్ర మొదలుపెట్టడంతో వెంటనే తిరిగి విధుల్లో చేరిన చార్కోల్.. కదనరంగంలో శత్రు సైన్యాలను చీల్చిచెండాడుతున్నారు. ‘‘వీళ్లు అసలు మనుషులే కాదు.. రాక్షసులని, వారందరినీ మట్టుబెట్టడమే తన కర్తవ్యమని’’ రష్యన్‌ సైనికులను ఉద్దేశించి ఆమె మాట్లాడినట్టు ‘కీవ్‌ ఇండిపెండెంట్‌’ పత్రిక తెలిపింది. ‘‘అందరికీ ఆయుధాలు ఇవ్వండి! వీళ్లు మనుషులు కాదు.. ఫాసిస్టులు కూడా ఇంత నీచంగా ఉండేవారు కాదు.. ఈ పోరాటంలో తప్పకుండా గెలుస్తాం.. వ్యక్తిగతంగా నేను చివరి వరకు నిలబడతాను! ఇప్పుడు మన వాళ్లు కొందరు కళ్లు తెరిచి ఎవరో అర్థం చేసుకున్నందుకు సంతోషం’’ అని వ్యాఖ్యానించారు. రెండో ప్రపంచ యుద్ధంలో సోవియట్‌ యూనియన్ రెడ్‌ ఆర్మీ తరఫున పోరాడిన స్నైపర్‌ లేడీ డెత్‌తో చార్కోల్‌ను పోల్చడం విశేషం. లేడీ డెత్ లియుడ్మిలా పావ్లిచెంకో ఆ యుద్ధంలో 300 మందికి పైగా జర్మన్ సైనికులను మట్టుబెట్టినట్టు ఉక్రెయిన్‌ సైన్యం వెల్లడించింది. ఒడెస్సా, సెవాస్టోపోల్‌ను నాజీల బారి నుంచి కాపాడే పోరాటంలో గాయపడింది. ఆ తర్వాత యుద్ధంలో అమెరికాకు కూడా మద్దతుగా నిలిచింది. లేడీ డెత్‌ సేవలకు ఉమ్మడి సోవియట్ అత్యున్నత పురస్కారం ‘ది హీరో ఆఫ్‌ సోవియట్‌ యూనియన్‌ అవార్డ్‌’ వరించింది. ‘చార్కోల్’ కంటే ముందు ‘ఘోస్ట్ ఆఫ్ కైవ్’ ప్రసిద్ధి చెందడంతో సైనికుల్లో ఆయన ధైర్యాన్ని పెంచాలని ఉక్రేనియన్లు కోరుకున్నారు. దండయాత్ర మొదటి రోజున 10 రష్యన్ జెట్‌లను ఫైటర్ పైలట్ కూల్చివేయడంతో ఘోస్ట్ ఆఫ్ కైవ్‌గా ఘనత పొందాడు. అయితే, ఈ విషయం మాత్రం వాస్తవంగా ధ్రువీకరించలేదు.