రాజకీయ సమస్యలపై కోర్టకు రావడం ఏమిటీ: సీ.జే. ఎన్వీ రమణ

రాజకీయ అంశాలపై కోర్టులకు రావడం ఏమిటీ అని సుప్రీం కోర్టు సీ.జే.ఎన్వీరమణ ఆగ్రహం వ్యక్తంచేశారు. ‘దేశంలో ఉన్న ప్రతిదానికీ’ పిటిషన్లు దాఖలు చేస్తున్నారని సుప్రీంకోర్టు ప్రధాన న్యాయమూర్తి జస్టిస్ ఎన్వీ రమణ తీవ్ర అసంతృప్తి వ్యక్తం చేశారు. ప్రభుత్వం నుంచి పరిష్కారం కోరకుండా రాజకీయ సమస్యలపై కోర్టుకు రావడం ఏంటని నిలదీశారు. అక్రమ వలసదారులను బహిష్కరించాలని కోరుతూ పిటిషన్ దాఖలు చేసిన బీజేపీ నేత, సీనియర్ లాయర్ అశ్వని ఉపాధ్యాయ్.. దీనిని తక్షణ విచారణ జాబితాలో చేర్చాలని కోరారు. ఈ సందర్భంగా ప్రధాన న్యాయమూర్తి తీవ్ర అసహనానికి గురయ్యారు. ‘‘మిస్టర్ ఉపాధ్యాయ్ ప్రతిరోజూ నేను మీ కేసులను మాత్రమే వింటాను.. పార్లమెంటు సభ్యుల సమస్య, నామినేషన్ సమస్య, ఎన్నికల సంస్కరణలు మొదలైన దేశంలోని అన్ని సమస్యలూ మీవే... ఇవన్నీ రాజకీయ సమస్యలు, మీరు ప్రభుత్వం వద్దకు వెళ్లండి.. ఒకవేళ మీరు కోరినట్టుగానే ఈ అంశాలను విచారణకు స్వీకరించి ఆదేశాలు జారీచేయడానికి నేను అంగీకరిస్తే.. రాజకీయ ప్రతినిధులను ఏ ప్రయోజనం కోసం ఎన్నుకుంటున్నాం? లోక్‌సభ... రాజ్యసభ... కాకుండా మనం ఆమోదించాల్సిన బిల్లులు ఏమైనా ఉన్నాయా?’’ అని ప్రశ్నించారు.

సీజేఐ వ్యాఖ్యలపై న్యాయవాది అశ్వినీ ఉపాధ్యాయ్ స్పందిస్తూ.. రాజ్యాంగంలోకి ఆర్టికల్ 32 ఈ ప్రయోజనం కోసమే ఉందని అన్నారు. దీనికి ధర్మాసనం.. చట్టాలు చేయాలా అని ప్రశ్నించింది. ఒకవేళ కేంద్రం ఈ అంశంపై కౌంటర్ దాఖలు చేయడానికి సిద్ధంగా ఉంటే విచారణకు లిస్టింగ్ చేస్తామని ఈ సమయంలో అక్కడ ఉన్న సొలిసిటర్ జనరల్‌ను ఉద్దేశించి ధర్మాసనం వ్యాఖ్యానించింది. అంతకు ముందు ‘‘ఐదు కోట్ల మంది అక్రమ వలసదారులు మన జీవనోపాధి హక్కును హరిస్తున్నారు.. అక్రమవలసదారులను గుర్తించి, అదుపులోకి తీసుకుని దేశం నుంచి బహిష్కరించాలని పిటిషన్‌లో కోరుతున్నాం.. అన్ని రాష్ట్రాలకు నోటీసులు జారీచేయాలి’’ అని ప్రధాన న్యాయమూర్తి జస్టిస్ ఎన్వీ రమణ, జస్టిస్ కృష్ణమురారి, జస్టిస్ హిమా కోహ్లిల త్రిసభ్య ధర్మాసనానికి అశ్వనీ ఉపాధ్యాయ్ పిల్ దాఖలు చేశారు. ఇదిలావుంటే అక్రమ వలసదారులను గుర్తించే ప్రక్రియను చేపట్టి, వారిని ఏడాదిలోగా దేశం నుంచి బహిష్కరించేలా కేంద్ర, రాష్ట్ర ప్రభుత్వాలకు సూచనలు చేయాలని 2017లో అశ్వని ఉపాధ్యాయ్ పిల్ వేశారు. అక్రమ వలసలు, చొరబాట్లను నిరోధించడానికి ప్రస్తుతం ఉన్న చట్టాలను సవరించి, కఠిన నిబంధనలు చేర్చేలా ఆదేశాలు ఇవ్వాలని కోరారు.