బెంగళూరు రోడ్లపై...దర్శనమిస్తున్న బైస్కిల్ కార్లు

ఇందన ధరలు విపరీతంగా పెరగడం వల్ల వాటితో నిమిత్తంలేకుండా ఎలాంటి ఖర్చుకాని వాహనాలపై ప్రజలు ఆసక్తిచూపుతున్నారు. పెట్రోల్, డీజిల్ ధరలు బాగా పెరిగాయి. ఇలా పెరుగుతాయని ముందే తెలిసి.. చాలా మంది ఎలక్ట్రిక్ వాహనాలు కొనుక్కుంటున్న విషయం మనకు తెలుసు. ఐతే.. బెంగళూరు రోడ్లపై ఓ వ్యక్తి నడిపిన వాహనం రెగ్యులర్ వాహనం మాత్రం కాదు. దాని పేరు వెలోమొబైల్. దాన్ని బైస్కిల్ కార్ అని పిలుస్తున్నారు. ఇలాంటి వాహనాలు యూరప్‌లో కామన్. మన దేశంలో అరుదు. కానీ ఇంధన ధరలు పెరిగిపోతున్న ఈ రోజుల్లో ప్రజలు ఇలాంటి వాహనాల కొనుగోలుకు ఆసక్తి చూపిస్తున్నారు. బెంగళూరు రోడ్లపై బ్లూ కలర్‌లో మెరిసే వెలోమొబైల్ వెళ్తుండగా చూసిన వారికి అది బాగా నచ్చింది. మనకి కూడా అలాంటిది ఉంటే... పెట్రోల్ ధర ఎంత పెరిగినా తలనొప్పి ఉండదు అనుకున్నారు. కొంతమంది దాన్ని చూసి.. అదేదో సైన్స్ ఫిక్షన్ సినిమాలో వాహనంలా ఉందే అని ఆశ్చర్యపోయారు.

వెలోమొబైల్ అనేది... మూడు చక్రాలతో వెళ్లే వాహనం. మనుషుల పవర్‌తో పనిచేస్తుంది. అంటే సైకిల్ లాగా పనిచేస్తుంది. సైకిల్‌కి పెడల్స్ మధ్యలో ఉంటాయి కదా... దీనికి ముందు ఉంటాయి. తొక్కే వ్యక్తి పడుకున్న యాంగిల్‌లో కూర్చొని... కాళ్లతో పెడల్స్ తొక్కాల్సి ఉంటుంది. తద్వారా వాహనం ముందుకు వెళ్తుంది. సైకిల్‌ నడిపే వ్యక్తికి చుట్టూ రక్షణ ఉండదు. ఈ వాహనం నడిపేవారికి చుట్టూ ప్రొటెక్షన్ కవర్ ఉంటుంది. ఏదైనా ప్రమాదం జరిగితే... కొంత రక్షణ లభిస్తుంది. ఈ ప్రొటెక్షన్ కవర్... విపరీత వాతావరణం నుంచి కూడా కాపాడగలదు. ఇది సైకిల్ లాగా నెమ్మదిగా వెళ్లదు. దీన్ని ఏరోడైనమిక్ షేప్‌లో తయారుచేయడం వల్ల ఇది కొద్దిగా కష్టపడినా చాలు.. ఫ్లాట్ రోడ్డుపై గంటకు 30 నుంచి 50 కిలోమీటర్ల వేగంతో వెళ్తుంది. ఇవి రోజువారీ ఆఫీసులకు వెళ్లేవారికీ, షాపింగ్ చెయ్యాలి అనుకునేవారికీ, చిన్న హాలిడే ట్రిప్ వెయ్యాలి అనుకునేవారికీ, సిటీలో తిరగాలి అనుకునేవారికి బాగా ఉపయోగపడతాయి.