మధ్యలో రెండు ముక్కలుగా చీలిపోయిన కార్గోజెట్...అంతా సేఫ్

ఆశ్చర్యపరిచే ఘటన కోస్టారికా విమానాశ్రయంలో జరిగింది. ఓ రకంగా కోస్టారికాలోని ఎయిర్‌పోర్టులో భయంకరమైన సంఘటన చోటుచేసుకుందని చెప్పవచ్చు. ఓ కార్గో జెన్ రెండుగా ముక్కలైపోయింది. శాన్‌జోస్ అంతర్జాతీయ విమానాశ్రయంలో అత్యవసర ల్యాండింగ్ చేయడంతో డీహెచ్‌ఎల్ కార్గోజెట్ రన్‌వే‌పై రెండు ముక్కలుగా విరిగిపోయింది. టేకాఫ్ అయిన కొద్దిసేపటికే జర్మన్ లాజిస్టిక్స్ దిగ్గజం డీహెచ్‌ఎల్‌కు చెందిన బోయింగ్ 757-200 జెట్ హైడ్రాలిక్ వ్యవస్థలు విఫలమయ్యాయి. ఇది గ్రహించిన పైలట్ విమానాన్ని అత్యవసరంగా ల్యాండ్ చేశారు.

అలా ఎమర్జెన్సీ ల్యాండింగ్ అయిన సమయంలోనే ఇలా జరిగింది. రన్‌వే‌పై దిగిన విమానం నుంచి ముందుగా పొగలు వచ్చాయి. తర్వాత విమానం వెనుక చక్రాలపై గుండ్రంగా తిరుగుతూ రెండుగా విడిపోయింది. అదే టైంలో రన్‌వేపై నుంచి పక్కకు జరిగిపోయింది. అయితే ఆ విమానంలో ఉన్న ఇద్దరు పైలట్లు క్షేమంగానే ఉన్నారు. కోస్టారికా అగ్నిమాపక విభాగం డైరక్టర్ హెక్టర్ చావెస్... పైలట్, కో పైలట్‌లకు ఎటువంటి గాయాలు అవ్వలేదని, క్షేమంగా ఉన్నారని తెలిపారు. అయితే ఈ ఘటనతో ఓ పైలట్‌ భయపడినా.. ఇద్దరూ స్పృహలోనే ఉన్నారని సంబంధిత అధికారులు తెలిపారు. ముందు జాగ్రత్త చర్యగా వారిని వైద్య పరీక్షల కోసం ఆస్పత్రికి తరలించారు.

ఉదయం 10.30 గంటల సమయంలో ఈ ప్రమాదం జరిగింది. అయితే సాంకేతిక లోపం కారణంగా ఇలా జరిగినట్టు అధికారులు చెబుతున్నారు. ఇలా ఎందుకు జరిగిందో తెలుసుకోవడానికి విచారణ జరుపుతామని అధికారులు వెల్లడించారు. ఈ ఘటనతో ఎయిర్‌పోర్టును సాయంత్రం 6 గంటల వరకు మూసివేశారు. కాగా కొన్ని రోజులు క్రితమే దక్షిణకొరియాకు చెందిన రెండు వైమానిక దళ విమానాలు గాలిలోనే ఢీకొన్న సంఘటన జరిగింది. ఆ సంఘటనలో నలుగురు పైలట్లు ప్రాణాలు కోల్పోయారు. సాచియాన్ నగరంలో ఈ ఘటన చోటుచేసుకుంది. ఈ సంఘటనపై కూడా అధికారులు దర్యాప్తు జరుపుతున్నారు.