ఇక ఏ వయస్సులోనూ నిత్య యవ్వనంగా కనిపించవచ్చు

సాంకేతికత అందుబాటులోకి వచ్చాక ఏదైనా సాధ్యం అనిపించే రీతిలో సైన్స్ ఆవిష్కరణలు సాగుతున్నాయి.  ఈ నేపథ్యంలో ఇకపై వయస్సు మీదపడుతోందన్న బెంగ అవసరంలేదని శాస్త్రవేతలు చెబుతున్నారు. వయస్సు మీద పడుతుంది.. చర్మంపై ముడతలు పడుతున్నాయని బాధపడుతున్నారా..? ఇక ఆ బాధ అక్కర్లేదు అంటున్నారు. ఓ బేబీ సినిమాలో చూపించినట్టు.. బామ్మలు అమ్మాయిలుగా, తాతలు అబ్బాయిలుగా మారిపోయే కాలం రాబోతుంది. అది ఎంతో దూరంలో లేదని పరిశోధకులు అంటున్నారు. ఇది ముమ్మాటికి సాధ్యమవుతుందని ఇంగ్లాండ్‌లోని యూనివర్శిటీ ఆఫ్ కేంబ్రిడ్జ్ శాస్త్రవేత్తలు నిరూపించారు. గత 30 ఏళ్లుగా సాగుతున్న ప్రయోగాలు ఫలించే సమయం వచ్చేసింది.

తమ పరిశోధనల్లో మానవుల చర్మంలోని కణాల వయస్సును ఏకంగా 30 ఏళ్లు తగ్గించారు. ప్రయోగంలో భాగంగా 53 ఏళ్ల మహిళ చర్మ కణాలను 30 ఏళ్లకి విజయవంతంగా డీ ఏజ్ చేశారు. సాధారణంగా వయస్సు మీదపడే కొద్దీ ఎవరికైనా సరే శరీరంలో కణాలు సక్రమంగా పని చేయవు. దీంతో ముఖం, చేతులపై ముడతలు వచ్చేస్తాయి. అయితే రీజనరేటివ్‌ బయాలజీ విధానంలో ప్రేరేపిత స్టెమ్‌ కణాల సాయంతో కేంబ్రిడ్జ్ శాస్త్రవేత్తలు ఫైబ్రోబ్లాస్ట్స్‌ కణాల్లోని ప్రొటీన్లను ఉత్తేజితం చేశారు. దాంతో చర్మంలోని కణాల వయస్సును తగ్గించారు. పదేళ్లుగా ఈ ప్రయోగం చేస్తున్నట్టు ప్రొఫెసర్ దిల్‌జీత్‌ తెలిపారు.

ప్రత్యేక కణాలైన ఫైబ్రోబ్లాస్ట్స్‌ కణజాలాల మధ్య బంధాన్ని ఏర్పరించేందుకు సహకరిస్తాయి. ఇందులోని ప్రొటీన్లు నిర్జీవంగా మారుతున్న కణాలను బాగుచేయడం, గాయాలను మాన్పించడంలో కీలక పాత్ర పోషిస్తాయి. ఈ ప్రయోగానికి కేంబ్రిడ్జ్‌లోని బృందం మెచ్యూరేషన్ ఫేజ్ ట్రాన్సియెంట్ రీప్రోగ్రామింగ్ పద్ధతిని ఉపయోగించింది. ఈ పద్ధతి కణం ఐడెంటిటీని చెరిపేసే సమస్యను అధిగమించి.. కణాలు వాటి ప్రత్యేక సెల్ ఫంక్షన్‌ను నిలుపుకుంటూ వాటిని యవ్వనంగా మార్చే సమతుల్యతను కనుగొనడానికి పరిశోధకులను అనుమతిస్తుంది.