ఫ్రాన్స్ ఎన్నికల్లో...హిజాబ్ అంశం

ఫ్రాన్స్ దేశంలోనూ మత కోణంలో ఎన్నికలు జరుగుతున్నాయి. ప్రస్తుతం హిజాబ్ అంశం... మన దేశంలోనే కాదు... ఫ్రాన్స్‌లోనూ హాట్‌టాపిక్‌గా మారింది. త్వరలో అక్కడ ఎన్నికలు జరగబోతున్నాయి. ఎన్నికల ప్రచారంలో నేతలు ముస్లింలు ధరించే హిజాబ్‌, పైకప్పు, బుఖాలపై పలు హామీలు గుప్పిస్తున్నారు. అధికారంలోకి వస్తే హిజాబ్, బురఖా, తలకప్పు ధరించే ముస్లింలకు జరిమానా విధిస్తామని అధ్యక్ష పదవికి పోటీ చేస్తోన్న అభ్యర్థి మెరైన్ లే పెన్ హామీ ఇచ్చారు. నేషనల్ ఫ్రంట్ పార్టీ నుంచి మెరైన్ లే పెన్ అధ్యక్ష పదవికి పోటీ చేస్తున్నారు.

ఈ నేపథ్యంలో అక్కడి ప్రజలను ఆకర్షించేందుకు మెరైన్ లే పెన్ రకరకాల హామీలను ఇస్తున్నారు. అందులో భాగంగా శుక్రవారం ఆమె బురఖా, తలకప్పులు ధరించే ముస్లింలకు ఫైన్ విధిస్తానని అన్నారు. తన అధికారంలో కార్లలో సీటు బెల్టులు ధరించని వారి నుంచి ఎలాగైతే జరిమానా వసూలు చేస్తారో.. హిజాబ్ ధరించే వారి నుంచి జరిమానా వసూలు చేస్తారని మెరైన్ లే పెన్ అన్నారు. అంతేకాదు తను చేపట్టే చట్టాలు వివక్షాపూరితమైనవి, వ్యక్తిగత స్వేచ్ఛకు భంగం కలిగించేవిగా ఉండి.. రాజ్యాంగపరమైన సవాళ్లను నివారించడానికి తాను ప్రజాభిప్రాయ సేకరణలు చేస్తానని మెరైన్ చెప్పారు.

నిజానికి పశ్చిమ ఐరోపాలోనే ఫ్రాన్స్‌ దేశంలో ఎక్కువ మంది ముస్లిం జనాభా ఉన్నారు. కానీ ఇటీవలి కాలంలో ముస్లింల పై వివక్ష ఎక్కువ అయింది. ప్రస్తుతం అక్కడ హిజాబ్, హెడ్‌స్కార్ఫ్ పాఠశాలల్లో, ఇతర ప్రభుత్వ భవనాల్లో ధరించడంపై నిషేధం ఉంది. పోలీసు అధికారుల వంటి రాష్ట్ర ఉద్యోగులు కూడా దానిని ధరించడం నిషేధం. ఈ నేపథ్యంలోనే మెరైన్ లే పెన్ ఇలాంటి హామీలను గుప్పించారు.

మెరైన్ లే ఎవరు..?

మెరైన్ లే పెన్ ఓ న్యాయవాది. నేషనల్ ఫ్రంట్ పార్టీ వ్యవస్థాపకుడు జీన్-మేరీ లే పెన్ కుమార్తెగా ప్రసిద్ధి చెందింది. 2011లో నేషనల్ ఫ్రంట్ పార్టీ నాయకత్వాన్ని స్వీకరించింది. అప్పటి నుంచి మెరైన్ తన అధ్యక్ష ఎన్నికల ప్రచారంలో పాల్గొనడం ఇది మూడోసారి. 2017లో అధ్యక్ష పదవికి పోటీ చేసి ఓడిపోయారు. ఈ ఎన్నికల్లో నేషనల్ ఫ్రంట్‌ పార్టీ తన పంథా మార్చుకుంది. అన్ని వర్గాల ప్రజలు కలుపుకుపోయే విధంగా ప్రచారాలు చేస్తోంది. ఇప్పటి వరకు అక్కడ అధికారంలోకి ఉన్న మాక్రోన్ ప్రభుత్వంపై ప్రజల్లో అసంతృప్తి ఉంది. కోవిడ్ నియంత్రణ, దేశంలో ఆరోగ్య వ్యవస్థపై భారం వంటి విషయాల్లో ప్రజలకు ప్రభుత్వంపై వ్యతిరేకత ఏర్పడింది. ఇది ప్రతిపక్ష పార్టీ నేషనల్ ఫ్రంట్ పార్టీకి అనుకూలంగా మారింది. దాంతో అక్కడ ఈ ఎన్నికలు కీలకంగా మారాయి.