రష్యా రక్షణ మంత్రి సెర్గీ షోయిగుకు గుండెపోటు

రష్యా రక్షణ మంత్రి సెర్గీ షోయిగు గుండె పోటుకు గురయ్యారు అన్న వార్తలు చక్కర్లు కొడుతున్నాయి. ఉక్రెయిన్‌పై రష్యా దండయాత్ర మొదలై 50 రోజులు దాటిపోయింది. అయినా, ఉక్రెయిన్ మాత్రం తలొగ్గలేదు సరికదా.. రష్యా సైన్యాలను తుత్తనీయులు చేస్తోంది. దీంతో ఇరు దేశాల మధ్య భీకర పోరాటం సాగుతోంది. దీంతో యుద్ధంలో ఇరు దేశాలూ భారీ నష్టాన్ని చవిచూస్తున్నాయి. యుద్ధంలో క్రెమ్లిన్ ఇప్పటివరకు పైచేయి సాధించలేకపోయింది. ఆర్థికంగా కూడా పశ్చిమ దేశాల ఆంక్షల కారణంగా ఇబ్బందులు పడుతోంది.ఈ నేపథ్యంలో ఆసక్తికరమైన ఓ విషయం వెలుగులోకి వచ్చింది. యుద్ధం మొదలైనప్పటి నుంచి రష్యా రక్షణశాఖ మంత్రి సెర్గీ షోయిగు బయట ప్రపంచానికి కనిపించడం లేదు. ఆయన తీవ్రమైన గుండెపోటుకు గురయ్యారని పలు కథనాలు వెలువడుతున్నాయి.

అయితే సాధారణ కారణాలతో ఆయనకు గుండెపోటు రాలేదని అంతర్జాతీయ మీడియా కథనాలు పేర్కొంటున్నాయి. ఉక్రెయిన్‌పై రష్యా యుద్ధంలో 20 మంది జనరల్స్ అరెస్ట్ అయ్యారనే వార్తల నేపథ్యంలో ఈ విషయం బయటకు రావడం గమనార్హం. అంతర్జాతీయ మీడియా కథనాల ప్రకారం.. కొన్ని వారాలుగా రష్యా రక్షణ మంత్రి సెర్గీ షోయిగు క్రియాశీలకంగా లేరు. కనీసం మీడియా సమావేశాల్లో కూడా ఎక్కడా కనిపించడం లేదు. బొత్తిగా నల్లపూస అయిపోయిన ఆయన బాహ్య ప్రపంచానికి కనిపించక కొన్ని వారాలు గడిచిపోయిందని చెబుతున్నాయి.

షోయిగు గుండెపోటు కథనాలకు బలం చేకూర్చేలా రష్యా - ఇజ్రాయెల్ వ్యాపారవేత్త లియోనిడ్ నెజ్విలిన్ సంచలన వ్యాఖ్యలు చేశారు. అధినేత వ్లాదిమిర్ పుతిన్‌కు, ఆయన సన్నిహిత సలహాదారులు, సైనిక అధికారుల మధ్య దూరం పెరిగిందని అన్నారు. వీరిమధ్య అగాధాన్ని తెలియజేసే గతంలో జరిగిన సంఘటనలను కూడా ఆయన ప్రస్తావించారు. దీంతో పుతిన్, రక్షణ అధికారుల మధ్య విభేధాలపై పెద్ద ఎత్తున చర్చ నడుస్తోంది.

ఇదిలావుంటే మూడోసారి 2012లో పుతిన్ అధ్యక్షుడిగా ఎన్నికైన తర్వాత రష్యా రక్షణ మంత్రిగా సెర్గీ షోయిగు బాధ్యతలు చేపట్టారు. 2014లో ఉక్రెయిన్ నుంచి క్రిమియాను స్వాధీనం చేసుకోవడంలో ఆయన కీలకంగా వ్యవహరించారు. అయితే, ఇటీవల కాలంల రష్యా అధ్యక్షుడు పుతిన్‌, షోయిగుకు అంతగా పొసగడం లేదని కథనాలు చెబుతున్నాయి.

ఇదే సమయంలో, ఉక్రెయిన్‌పై దండయాత్ర ప్రారంభానికి రెండు రోజుల ముందు వ్లాదిమిర్ పుతిన్, భద్రత అధికారుల సంభాషణకు సంబంధించిన ఓ వీడియో సోషల్ మీడియాలో హల్‌చల్ చేసింది. డొనెట్స్క్, లుహాన్స్క్‌లను స్వతంత్ర ప్రాంతాలపై గుర్తించే విషయంలో మీ వైఖరి ‘స్పష్టంగా చెప్పండి’రష్యా విదేశీ నిఘా విభాగం చీఫ్ సెర్గీ నారిష్కిన్‌ను పుతిన్ కోరడం ఈ వీడియోలో కనిపించింది.

నారిష్కిన్‌ను పుతిన్ తన సన్నిహిత సహాయకులలో ఒకరిగా పరిగణించనప్పటికీ ఉన్నత స్థాయి అధికారిని బహిరంగంగా ఇబ్బంది పెట్టడానికి వెనుకాడలేదు. అలాగే, సోషల్ మీడియాలో వైరల్ అవుతున్న మరో ఫోటో ఓ సమావేశంలో రష్యా రక్షణ మంత్రి సెర్గీ షోయిగు, ఇతర అధికారులకు పుతిన్ దూరంగా కూర్చున్నట్లు చూపిస్తుంది.