మగవాళ్లతో మాట్లాడుతుందని భార్యను చంపేశాడు
Crime | Suryaa Desk | Published : Sun, Apr 24, 2022, 09:06 AM
ఆలూమగల మధ్య గొడవలు దారుణాలకు దారి తీస్తున్నాయి. కలిసి కూర్చుని, మాట్లాడుకుని పరిష్కరించుకోవాల్సింది పోయి మనస్పర్థలు పెంచుకుంటున్నారు. ఇక తమ భార్య వేరే మగవాళ్లతో మాట్లాడుతోందని ఓ భర్త అనుమానం పెంచుకున్నాడు. సెల్‌ఫోన్‌లో ఎవరితో మాట్లాడినా ఆరా తీసేవాడు. తరచూ గొడవపడి, ఆగ్రహం పట్టలేక భార్య ప్రాణాలు తీశాడు. ఈ దారుణ ఘటనకు సంబంధించిన వివరాలిలా ఉన్నాయి.
చెన్నై ట్రిప్లికేన్‌కు చెందిన పుగల్‌కొడి అలియాస్‌ ఢిల్లీ (29) ఫుడ్ డెలివరీ ఎగ్జిక్యూటివ్‌గా పని చేస్తున్నాడు. అతడికి సరిత (21) అనే యువతితో గతేడాది వివాహమైంది. ఆమె ఓ ప్రైవేటు హోటల్‌లో పని చేస్తోంది. సజావుగా సాగుతున్న వీరి సంసారంలో ఫోన్ కాల్స్ చిచ్చు పెట్టాయి. సరిత తరచూ ఇతర మగవాళ్లతో మాట్లాడుతోందని ఢిల్లీ అనుమానించే వాడు. దీంతో ఇద్దరి మధ్య చాలా సార్లు ఈ విషయంలో గొడవలు అయ్యాయి. ఇటీవల కాలంలో సరిత తన స్నేహితుడు జగదీశన్‌తో ఎక్కువ సమయం ఫోన్‌లో మాట్లాడడం ఢిల్లీ గమనించాడు. ఇది తప్పని చెప్పాడు. వారిద్దరి మధ్య మరోసారి గొడవైంది. 17వ తేదీన వీరిద్దరి మధ్య గొడవ పెద్దదైంది. ఆ సమయంలో భార్య సరితను ఢిల్లీ దారుణంగా కొట్టాడు. దీంతో ఆమె గాయాలపాలై ఆసుపత్రిలో చికిత్స పొందుతోంది. శుక్రవారం వారం తుది శ్వాస విడిచింది. దీంతో పోలీసులు ఆమె భర్త ఢిల్లీని అరెస్టు చేసి జైలుకు పంపారు.
|
|