భారీగా పెరిగిన..క్రిప్టో కరెన్సీ డోజికాయిన్

టెక్ బిలియనీర్ ఎలాన్ మస్క్ మైక్రోబ్లాగింగ్ వెబ్‌సైట్ ట్విట్టర్‌ను కొనుగోలు చేశారు. ఈ డీల్ విలువ 44 బిలియన్ డాలర్లు. దీని వల్ల ఎలన్ మాస్క్ ఫేవరెట్ క్రిప్టో కరెన్సీ డోజికాయిన్ భారీగా పెరిగింది. కొనుగోలు డీల్ వల్ల తొలిగా ఈ క్రిప్టోకు బాగా కలిసొచ్చిందని చెప్పుకోవచ్చు. గత 24 గంటల్లో డోజికాయిన్ ధర ఏకంగా 35 శాతం మేర ర్యాలీ చేసింది. ట్విట్టర్ కొనుగోలు వార్తలు బయటకు వచ్చిన తర్వాతి నుంచి ఈ క్రిప్టో దూసుకుపోవడం ప్రారంభించింది. కాయిన్‌మార్కెట్‌క్యాప్ డేటా ప్రకారం.. డోజికాయిన్ ధర 0.16 డాలర్‌కు చేరింది.

మరోవైపు ఇతర క్రిప్టో కరెన్సీలు చాలా వరకు లాభాల్లోనే కదలాడుతున్నాయి. అయితే ద్రవ్యోల్బణం, ఉక్రెయిన్ సంక్షోభం, ఫెడ్ వడ్డీ రేటు పెంపు అంచనాలు వంటివి కొంత ప్రతికూల ప్రభావం చూపుతున్నాయని నిపుణులు పేర్కొంటున్నారు. గ్లోబల్ క్రిప్టో కరెన్సీ మార్కెట్ క్యాప్ 3 శాతం పెరుగుదలతో 1.86 ట్రిలియన్ డాలర్ల వద్ద ఉంది. మొత్తం క్రిప్టో కరెన్సీ ట్రేడింగ్ వాల్యూమ్ 43 శాతం పెరుగుదలతో 97.88 బిలియన్ డాలర్లకు చేరింది.

టెక్నికల్ చార్ట్ ప్రకారం చూస్తే బిట్ కాయిన్ ధర మరింత తగ్గే అవకాశం ఉంది. ఈరోజు బిట్ కాయిన్ రేటు 40,500 డాలర్ల వద్ద క్లోజ్ కావొచ్చు. ఈ ప్రపంచంలోని మోస్ట్ పాపులర్ క్రిప్టో కరెన్సీ విలువ 40,700 డాలర్ల స్థాయికి చేరకపోతే.. అప్పుడు ఈ క్రిప్టో రేటు 39,500 డాలర్లకు దిగి రావొచ్చు. ఇక్కడి నుంచి మళ్లీ పైకి చేరే ఛాన్స్ ఉంది. ఒకవేళ బిట్ కాయిన్ రేటు పైకి చేరితే.. 41,500, 42 వేల డాలర్ల వద్ద బలమైన నిరోధాన్ని కలిగి ఉంది.

ప్రస్తుతం బిట్ కాయిన్ ధర మన కరెన్సీలో చెప్పుకుంటే 2.38 శాతం పెరుగుదలతో రూ.32.34 లక్షల వద్ద కదలాడుతోంది. మార్కెట్ వాటా 41.35 శాతంగా ఉంది. 0.12 శాతం పెరుగుదల నమోదు అయ్యింది. ఇథీరియం 3.15 శాతం మేర పెరిగింది. రూ.2.39 లక్షల వద్ద ట్రేడ్ అవుతోంది. టెథర్ 0.58 శాతం క్షీణించింది. రూ.79.97 వద్ద ఉంది. ఇక కార్డానో ధర 0.45 శాతం పెరుగుదలతో 70.82 వద్ద ట్రేడ్ అవుతోంది. బినాన్స్ కాయిన్ రేటు రూ. 32,144 వద్ద ఉంది. 0.72 శాతం పెరిగింది. ఎక్స్ఆర్‌పీ 1.7 శాతం పెరుగుదలతో 55కు చేరింది.

మరోవైపు అబు దాబి గ్లోబల్ మార్కెట్ తాజాగా ఫైనార్షియల్ ఫ్రీ జోన్‌లో క్రాకెన్ గ్రూప్‌నకు వర్చువల్ అసెట్ ఎక్స్చేంజ్ ప్లాట్‌ఫామ్ నిర్వహణకు అనుమతులు ఇచ్చినట్లు తెలుస్తోంది. కాగా ఈ సంస్థ వర్చువల్ అసెట్స్‌కు సంబంధించి దిర్హమ్, యూఏఈ కరెన్సీలో ఫండింగ్, ట్రేడింగ్, కస్టోడియల్ సర్వీసులు అందిస్తుంది. అలాగే యూఏఈ ముఖ్య బిజినెస్ హబ్ దుబాయ్ కూడా ఇప్పటికే క్రిప్టో కరెన్సీ సంస్థలను ఆకర్షించేందుకు రూల్స్‌ను జారీ చేసిన విషయం తెలిసిందే.