అంగారకుడిపై సూర్యోదయ, సూర్యాస్తమయం...ఫోటోలివిగో

అంగారకుడిపై అనేక పరిశోధనలు చేస్తున్న శాస్త్రవేతలు తాజాగా ఓ అద్భుతాన్ని కనుగొన్నారు. అంగారకుడిపై జీవం జాడలను అన్వేషించడమే కాకుండా, భూమి లోపలి పొరల్లో నీరు లేదా మంచు ఉందా? భవిష్యత్తులో మానవ నివాసానికి యోగ్యమైందేనా? అనేది తెలుసుకోడానికి శాస్త్రవేత్తలు విస్తృతంగా పరిశోధనలు చేస్తున్నారు. 2030 త‌రువాత మార్స్‌పై తొలి మానవసహిత యాత్రను చేపట్టాలనే కృతనిశ్చయంతో ఉన్నారు పరిశోధకులు. ఇప్పటికే అమెరికా అంతరిక్ష పరిశోధన సంస్థ (నాసా), చైనాలకు చెందిన రోవర్లు అక్కడ అధ్యయనం నిర్వహిస్తున్నాయి. తాజాగా, అంగారకుడిపై సూర్యోదయ, సూర్యాస్తమయానికి సంబంధించిన అనేక ఫోటోలను అమెరికా పంపిన ఇన్‌సైట్ ల్యాండర్ బంధించింది.

ఇన్‌సైట్ ల్యాండర్‌లోని రోబోటిక్ ఆర్మ్ కెమెరా సాయంతో ఏప్రిల్ 10న ఫోటోలను తీసింది. ఈ ఫోటోలను జెట్ ప్రొపల్షన్ ల్యాబొరేటరీ విడుదల చేసింది. 2018 మే 5న అట్లాస్-5 ద్వారా ప్రయోగించిన ఇన్‌సైట్.. అదే ఏడాది నవంబరు 26న అంగారకుడి ఉపరితలంపై విజయవంతంగా దిగింది. అప్పటి నుంచి మూడేళ్లలో మార్క్ గురించి అనేక విషయాలను చేరవేస్తోంది. నాసా సైన్స్ డిస్కవరీ ప్రోగ్రామ్‌లో భాగమైన ఇన్‌సైట్‌ను మార్షల్ స్పేస్ ఫ్లైట్ సెంటర్ నిర్వహిస్తోంది. క్రూయిజ్ స్టేజ్, ల్యాండర్‌తో సహా ఇన్‌సైట్ అంతరిక్ష నౌకను డెన్వర్‌లోని లాక్‌హీడ్ మార్టిన్ స్పేస్ నిర్మించింది.

దీని నిర్మాణంలో ఫ్రాన్స్ సెంట్రల్ నేషనల్ డ్యుడెస్ స్పేసియల్ (సీఎన్ఈఎస్), జర్మన్ ఏరోస్పేస్ సెంటర్ (డీఎల్ఆర్) సహా ఐరోపాకు చెందిన పలు అంతరిక్ష సంస్థలు భాగస్వాములయ్యాయి. సెస్మిక్ ఎక్స్‌పెర్మింట్ ఫర్ ఇంటీరియల్ స్ట్రక్టర్‌ను సీఎన్ఈఎస్ సమకూర్చింది. జర్మనీలోని మ్యాక్స్ ప్లాంక్ ఇన్‌స్టిట్యూట్ ఫర్ సోలార్ సిస్టమ్స్, స్విస్ట్ ఫెడరల్ ఇన్‌స్టిట్యూట్ టెక్నాలజీ, ఇంపీరియల్ కాలేజ్ లండర్, ఆక్స్‌ఫర్డ్ యూనివర్సిటీలు తమ వంత సహకారం అందజేశాయి.

అంగార‌కుడిపై పరిశోధ‌న‌లకు 2006లో నాసా పంపిన మార్స్ రికనైసెన్స్ ఆర్బిటార్ (ఎంఆర్ఓ) అక్కడ నీటి జాడ‌లు ఉన్న‌ట్టు గుర్తించింది. సుమారు 200 కోట్ల సంవత్సరాల కిందటే నీటి ప్ర‌వాహం ఉందని, ఆ నీరు ఆవిరైపోగా మిగిలిన క్లోరైడ్ సాల్ట్‌‌గా ఏర్పడిందని ఎమ్ఆర్‌వో తెలిపింది. ఉప్పు నిల్వ‌లు ఉన్న ప్రాంతాల్లో నీటి కుంట‌లు ఉండేవ‌ని నాసా పేర్కొంది. అయితే, ఇప్పుడు మార్స్‌పై నీరు లేక‌పోవ‌డానికి కార‌ణాలు ఏంటి అనే దిశగా ప‌రిశోధ‌న‌లు కొనసాగుతున్నాయి.