ఎముకలను బలంగా ఉంచుకోండిలా
Life style | Suryaa Desk | Published : Thu, May 05, 2022, 04:47 PM
శరీరంలో ఎముకలు నిస్సత్తువగా మారితే ఆ తర్వాత వాటి ప్రభావం ఆరోగ్యంపై పడుతుంది. ఏ చిన్న పని చేసినా, ఏదో ఒక శరీర భాగంలో తీవ్రమైన నొప్పి వస్తుంది. ముఖ్యంగా 40 ఏళ్లు దాటిన మహిళలు, పురుషులలో ఈ పరిస్థితి కనిపిస్తుంది. ఆస్టియోపోరోసిస్ వంటివి కారణంగా ఎముకలు గుల్లబారుతాయి. ఏ చిన్న బరువు ఎత్తినా ఎముకలు విరిగే ప్రమాదం కూడా ఎదురవుతుంది. అయితే 60 ఏళ్లు దాటినా ఎముకలు పటిష్టంగా ఉండాలంటే తినే ఆహారంలో కాల్షియం తగిన మోతాదులో ఉండాలి. ఎముకలు బలంగా ఉండేందుకు అవసరమైన ఇతరత్రా పోషకాలను కూడా తీసుకోవాలి. విటమిన్-సి ఉన్న ఆహారాన్ని ఎక్కువగా తీసుకుంటున్న వారిలో ఎముకలు పటిష్టంగా ఉన్నట్లు ఓ అధ్యయనంలో తేలింది. నారింజ, బత్తాయి, నిమ్మ, ఉసిరికాయ, జాంపండు, మిరపకాయలలో విటమిన్-సి పుష్కలంగా ఉంటుంది. వాటిని తీసుకోవడం ద్వారా ఎంతో ప్రయోజనం ఉంటుంది.
తీసుకునే ఆహారంలో ప్రొటీన్లు తగు మోతాదులో ఉండాలి. ఎముకలను బలంగా ఉంచే కాల్షియాన్ని సంగ్రహించే శక్తి ప్రొటీన్లకు ఉంది. చేపలు, రొయ్యలు, పీతలు, పప్పులలో ప్రొటీన్లు అధిక మొత్తంలో ఉంటాయి. అంతేకాకుండా శరీరానికి అవసరమైన కాల్షియాన్ని ఎక్కువగా తీసుకున్నా, దానిని శరీరం స్వీకరించలేదు. శరీరానికి విటమిన్-డి తోడైతే కాల్షియాన్ని శరీరం స్వీకరించుకోగలుగుతుంది. ఎండ తగిలేటప్పుడు శరీరం విటమిన్-డిని శోషించుకుంటుంది. ఎముకలను బలంగా ఉంచడంలో విటమిన్-కె కూడా ప్రధాన పాత్ర పోషిస్తుంది. క్యాబేజీ, పాలకూర, తోటకూర, చేపలు, కాలేయం వంటి వాటిలో విటమిన్-కె పుష్కలంగా ఉంటుంది.
|
|