అప్గన్ లో మహిళలకు కొత్త నిబంధనలు

అఫ్గన్‌లో మహిళలపై తాలిబన్ల ఆంక్షల పరంపర కొనసాగుతోంది. రెండు రోజుల కిందట మహిళలకు డ్రైవింగ్ లైసెన్స్‌ల జారీ ప్రక్రియ నిలిపివేసిన విషయం తెలిసిందే. తాజాగా, బయటకు వచ్చినప్పుడు మహిళలు తప్పనిసరిగా బురఖా వేసుకోవాలని ఆదేశాలు జారీచేశారు. తాలిబన్ సుప్రీం నేత ఆదేశం ప్రకారం.. అఫ్గన్ మహిళలు బహిరంగ ప్రదేశాలలో తమ ముఖాలను కప్పి ఉంచాలి. మహిళల విషయంలో తాలిబన్లు అనుసరిస్తున వైఖరిపై అంతర్జాతీయ సమాజంతో పాటు అఫ్గన్ల నుంచి తీవ్ర వ్యతిరేకత వ్యక్తమవుతోంది. అయినాసరే, తాలిబన్లు మాత్రం వెనక్కు తగ్గడం లేదు.

తాలిబన్ సుప్రీం లీడర్ హిబతుల్లాహ్ అఖుండ్‌జాదా ఆదేశాలను ‘ధర్మ రక్షణ.. అధర్మ నిర్మూలన’ మంత్రిత్వ శాఖ అధికార ప్రతినిధి మీడియా సమావేశంలో చదివి వినిపించారు. బహిరంగ ప్రదేశంలో మహిళ తన ముఖాన్ని కప్పుకోని పక్షంలో ఆమె తండ్రి లేదా భర్త, సమీప బంధువు చివరికి జైలుకు వెళ్లాల్సి ఉంటుంది. ఒకవేళ ప్రభుత్వ ఉద్యోగులైతే వారిని తొలగిస్తామని హెచ్చరించారు.

1996 నుంచి 2001 వరకు సాగిన కరడుగట్టిన పాలనలో గ్లోబల్ సింబల్‌గా మారిన నీలిరంగు బురఖాను ధరించాలని ప్రస్తుతం ఆదేశించారు. వాస్తవానికి అఫ్గన్ మహిళలు మతపరమైన కారణాలతో బురఖా వేసుకుంటారు. అయితే, కాబూల్ వంటి పట్టణ ప్రాంతాల్లో చాలామంది మహిళలు మాత్రం బురఖా ధరించరు. ఈ నేపథ్యంలో తాలిబన్లు బురఖాను తప్పనిసరి చేశారు. మారుతున్న కాలంతో పాటు మహిళల హక్కుల విషయంలో కొన్ని ముస్లిం దేశాలు ఉదారంగా వ్యవహరిస్తున్నాయి. తాలిబన్లు మాత్రం దీనికి భిన్నంగా వ్యవహరిస్తున్నారు.

గత 20 ఏళ్లుగా స్వేచ్ఛా వాయువులు పీల్చుకున్న అఫ్గన్ మహిళలు ప్రస్తుతం గడ్డుకాలాన్ని ఎదుర్కొంటున్నారు. రెండోసారి తాలిబన్ల పాలనలోకి వెళ్లిన తర్వాత వారి పరిస్థితి దయనీయంగా మారింది. షరియా చట్టాల పేరుతో మహిళల స్వేచ్ఛపై తాలిబన్లు ఉక్కుపాదం మోపుతున్నారు. గతేడాది ఆగస్టులో అఫ్గన్‌ను స్వాధీనం చేసుకున్న తర్వాత మహిళ హక్కులను గౌరవిస్తామని చేసిన ప్రకటనలు.. నీటిమూటలుగా మిగిలిపోయాయి. కొద్ది నెలల్లోనే తమ నిజస్వరూపాన్ని బయటపెట్టుకున్న తాలిబన్లు.. యూటర్న్ తీసుకున్నారు.

బాలికలను ఉన్నత విద్య అభ్యసించేందుకు అనుమతించబోమని ఇటీవలే ప్రకటించారు. వారిని ఆరో తరగతి వరకే పరిమితం చేస్తున్నట్లు స్పష్టం చేశారు. మహిళలకు విద్య, ఉద్యోగాల విషయంలో పూర్తి స్వేచ్ఛను ఇవ్వాలన్న అంతర్జాతీయ సమాజం డిమాండ్‌ను అంగీకరించిన తాలిబన్లు.. ఎప్పటిలాగే తమ నిర్ణయాన్ని మార్చుకున్నారు.