క్యూబాలోని ఓ హోటల్లో పేలుడు..32 మంది మరణం

క్యూబా దేశంలో ధారుణం చోటు చేసుకొంది. క్యూబాలోని ఓ హోటల్లో పేలుడు సంభవించి 32 మంది ప్రాణాలు కోల్పోయారు. మరికొంతమంది గాయపడ్డారు. హవానాలోని హోటల్ సరటోగాలో శుక్రవారం ఇది జరిగింది. ఈ పేలుడులో చనిపోయిన వారిలో 11 మంది వరకు కార్మికులు ఉన్నారని, 13 మంది గల్లంతయ్యారని హోటల్‌ను నిర్వహిస్తున్న ప్రభుత్వ సంస్థ గవియెటా వెల్లడించింది. పేలుడుకు గ్యాస్ లీకేజీ వల్ల ఈ ప్రమాదం జరిగినట్టు భావిస్తున్నామని క్యూబా అధ్యక్ష కార్యాలయం ట్వీట్‌లో పేర్కొంది.

ఈ ప్రమాదంలో మరణించినవారిలో ఒక చిన్నారి, గర్భిణి కూడా ఉన్నారు. 64 మంది గాయాలతో ఆస్పత్రి పాలయ్యారు. ఇంకా చాలామంది భవన శిథిలాల కింద చిక్కుకుపోయారు. ఈ పేలుడు ధాటికి రోడ్లపై బస్సులు, కార్లు కూడా ధ్వంసం అయ్యాయి. అగ్నిమాపక సిబ్బంది.. శిథిలాల కింద నుంచి ప్రజలను బయటకు తీయడానికి ప్రయత్నిస్తున్నారు. హోటల్‌కు దాదాపు 300 అడుగుల దూరంలో శిథిలాలు విరిగిపడ్డాయి.

ప్రమాదం జరిగిన హోటల్‌కు క్యూబా అధ్యక్షుడు మిగ్యుల్ డియాజ్ కానెల్ వెళ్లారు. పరిసర ప్రాంతాలను పరిశీలించారు. ఈ ప్రమాదంలో గాయపడిన బాధితులు చికిత్స పొందుతున్న ఆస్పత్రిని సందర్శించారు. అనంతరం ఇది చాలా విషాదకరమైన ఆయన అన్నారు.అలాగే క్షతగాత్రులందరికీ ఆస్పత్రుల్లో చికిత్స జరుగుతుందని, సహాయక చర్యలు ఇంకా కొనసాగుతున్నాయని ఆయన చెప్పారు. ఈ ఘటనపై మెక్సికో విదేశాంగ మంత్రి స్పందించారు. బాధితులందరికీ తన సంఘీభావాన్ని ప్రకటిస్తూ ట్వీట్ చేశారు. ఇదిలావుంటే ప్రమాదం జరిగిన హోటల్‌ను 19వ శతాబ్దం చివరలో నిర్మించారు. 1930ల నాటికి నగరంలోని అత్యంత ముఖ్యమైన హోటళ్లలో ఇది ఒకటి. తర్వాత కాలంలో దీనిని క్లోజ్ చేశారు. అయితే ఈ హోటల్‌ని 2005లో తిరిగి ప్రారంభించారు. ఈ హోటల్లో మొత్తం 96 గదులున్నాయి.