వణుకుతున్న కేరళ...తాజాగా టమాటో ఫీవర్

కరోనా నుంచి అత్యధికంగా విపత్తును ఎదుర్కొన్న కేరళ రాష్ట్రానికి కొత్త  వ్యాధి రూపంలో మరో సమస్య వచ్చిపడింది. దేశంలో ఓ వైపు కరోనా విజృంభిస్తూనే ఉంది. కోవిడ్ వైరస్ వ్యాప్తి చెందుతూనే ఉంది. ప్రతి రోజూ రాష్ట్రాల్లో వైరస్ కేసులు నమోదవుతూనే ఉన్నాయి. ఇంతలోనే కేరళలో మరో వ్యాధి భయాందోళనలు సృష్టిస్తుంది. అదే టమాటో ఫీవర్ ( Tomato flu) ఇప్పటి వరకూ అక్కడ 80 మందికిపైగా చిన్నారులు ఈ వ్యాధి బారినపడ్డారు. ఐదేళ్ల కంటే తక్కువ వయస్సున్న పిల్లలకు ఈ వైరస్ సోకింది. ఈ సంఖ్య ఇంకా పెరిగే అవకాశం ఉందని అక్కడి అధికారులు అభిప్రాయపడుతున్నారు.

ఈ వైరస్ కారణంగా కేరళ, తమిళనాడు సరిహద్దుల్లో అధికారులు అప్రమత్తమయ్యారు. తమిళనాడులో కూడా ఈ వైరస్ వ్యాప్తి చెందుతుందేమోననే కారణంతో సరిహద్దుల్లో పరీక్షలు నిర్వహిస్తున్నారు. కోయంబత్తూర్‌లోకి ప్రవేశించే వారికి ముమ్మరంగా టెస్ట్‌లు చేస్తున్నారు. ఇద్దరు వైద్యాధికారులతో కూడిన బృందం అటువైపుగా వెళ్తున్న వాహనాల్లోని పిల్లలను పరీక్షిస్తున్నారు. అలాగే అంగన్‌వాడీల్లో ఐదేళ్లలోపు పిల్లలను తనిఖీ చేసేందుకు 24 మంది సభ్యులతో కూడిన టీమ్‌ను ఏర్పాటు చేసినట్టు తెలుస్తుంది.

టమాటో ఫ్లూ లక్షణాలు ఏంటి..? 

ఈ వ్యాధి సోకిన పిల్లల్లో గుర్తు తెలియని జ్వరంతో బాధపడతారు. శరీరంపై దద్దుర్లు, ఎర్రటి బొబ్బలు వస్తుంటాయి. అందుకే దీనికి టమాటో ఫ్లూ అని పేరు వచ్చింది. అలాగే పిల్లలు డీహైడ్రేషన్‌కు గురవుతారు. వీటితోపాటు దగ్గు, జలుబు, ఒళ్లు నొప్పులు, వికారం, వాంతులు, విపరీతమైన నీరసం, కడుపు నొప్పి వంటివి ఉంటాయి. అయితే టమాటో ఫీవర్... వైరల్ ఫీవరా..? కాదా..? అనేదానిపై చర్చ జరుగుతోంది. అయితే ఈ వ్యాధి ఎందుకు వస్తుందనే దానికి కచ్చితమైన కారణాలు తెలియలేదు. ఇది కొత్త వైరల్ ఇన్ఫెక్ష‌నా..? డెంగ్యూ, చికెన్‌గున్యా వ్యాధుల అనంతర ప్రభావమా అనేది ఇప్పటికీ చర్చానీయాంశంగా ఉంది. పిల్లల్లో ఈ లక్షణాలు కనిపించిన వెంటనే డాక్టర్ దగ్గరకు తీసుకెళ్లాలని నిపుణులు చెబుతున్నారు.