కస్టమర్లకు నెట్ ఫ్లిక్స్ బంపర్ ఆఫర్లు

కస్టమర్లను ఆకట్టుకోవడమే కాదు ఉన్న వారిని కాపాడుకోవడం కూడా ఓ ఛాలేంజింగ్ జాబే.  ఓటీటీ ప్లాట్‌ఫామ్ నెట్‌ఫ్లిక్స్ (Netflix) ప్రపంచవ్యాప్తంగా ఎంతో పాపులర్. సబ్‌స్క్రైబర్ల పరంగా అత్యధిక సంఖ్య ఉన్నది ఆ ప్లాట్‌ఫామ్‌కే. అయితే కొంతకాలంగా నెట్‌ఫ్లిక్స్ గడ్డు పరిస్థితిని ఎదుర్కొంటోంది. కొన్ని క్వార్టర్లుగా ఆదాయాన్ని కోల్పోతోంది. యూజర్ల సంఖ్య కూడా తగ్గుతోంది. దీంతో భారీ మార్పులకు నెట్‌ఫ్లిక్స్ సిద్ధమైంది. బిజినెస్ మోడల్‌ను మార్చేందుకు రెండు కీలక నిర్ణయాలు తీసుకుంది. అయితే వీటిని ఈ సంవత్సరమే అమలులోకి తీసుకురానున్నట్టు తాజాగా సమాచారం బయటికి వచ్చింది. అడ్వర్టైజ్‌మెంట్లతో కూడిన చౌకైన ప్లాన్‌లను ప్రవేశపెట్టడంతో పాటు ఇతరులతో పాస్‌వర్డ్ షేర్ చేసుకుంటే అదనంగా చార్జ్ చేయడమే ఆ రెండు డెసిషన్స్. అయితే 2022 ముగిసేలోగానే వీటిని నెట్‌ఫ్లిక్స్ ఆచరణలోకి తీసుకురానుందని తేలింది. న్యూయార్క్ టైమ్స్ ఈ విషయాలను వెల్లడించింది. నెట్‌ఫ్లిక్స్ ఇంటర్నెల్ మెమో లభించడంతో ఆ విషయాలతో ఓ కథనాన్ని వెల్లడించింది. పూర్తి వివరాలు ఇవే.

యాడ్స్‌తో చీపెస్ట్ ప్లాన్లు

ప్రస్తుతం ఉన్న ప్లాన్‌లు కాకుండా అడ్వర్టైజ్‌మెంట్‌లతో కూడిన ప్లాన్‌లను వచ్చే ఏడాది లేదా 2024లో తీసుకొచ్చే ఆలోచన ఉందని నెట్‌ఫ్లిక్స్ సీఈవో రీడ్ హాస్టింగ్స్ నెలక్రితం చెప్పారు. అయితే ఈ ఏడాదే నెట్‌ఫ్లిక్స్.. యాడ్ బేస్డ్ ప్లాన్‌లను తీసుకొస్తుందని తాజాగా వెల్లడైంది. ఈ సంవత్సరం అక్టోబర్ - డిసెంబర్ మధ్యలోనే ఇలాంటి ప్లాన్స్ రానున్నాయని ఇంటర్నల్ నోట్ ద్వారా తేలింది. భారత్‌లో ఇప్పటికే డిస్నీ+ హాట్‌స్టార్, సోనీలివ్, ఎరోస్ నౌ, జీ5, వూట్ ఓటీటీ ప్లాట్‌ఫామ్‌లు యాడ్స్‌తో కూడిన ప్లాన్‌లను అందుబాటులో ఉంచాయి. యాడ్స్‌తో కూడిన ప్లాన్‌లను తీసుకురావడం వల్ల సబ్‌స్క్రిప్షన్‌లతో పాటు ప్రకటనల నుంచి భారీ ఆదాయం వస్తుందని అంచనా. అలాగే తక్కువ ధరకు ప్లాన్స్ ఇస్తే యూజర్ల సంఖ్య కూడా పెరుగొచ్చని నెట్‌ఫ్లిక్స్ భావిస్తోంది. ఎందుకంటే కొన్ని క్వార్టర్స్‌గా వరుసగా సబ్‌స్క్రైబర్లను నెట్‌ఫ్లిక్స్ కోల్పోతోంది.

షేర్ చేస్తే అదనపు చార్జ్

ఎలాంటి డబ్బు ఖర్చు చేయకుండా దాదాపు 10కోట్ల మంది నెట్‌ఫ్లిక్స్ సేవలు పొందుతున్నారని ఆ సంస్థ ఇటీవల చెప్పింది. వారి ఫ్రెండ్స్, బంధువుల వద్ద లాగిన్ కోసం అవసరమైన పాస్‌వర్డ్‌లు తీసుకొని ఇలా ఉచితంగా వాడుతున్నారని చెప్పింది. దీని వల్ల భారీగా ఆదాయం కోల్పోతున్నామని పేర్కొంది. అందుకే ఇతరులతో పాస్‌వర్డ్ షేర్ చేసుకోవాలనుకునే వారికి అదనపు చార్జీలతో ప్లాన్‌లను తీసుకురావాలని నెట్‌ఫ్లిక్స్ నిర్ణయించుకుంది. ఇలాంటి విభిన్న ప్లాన్‌లు ఇప్పటికే డిస్నీ+, HBO మ్యాక్స్‌తో పాటు మరికొన్ని OTT ప్లాట్‌ఫామ్స్ అందిస్తున్నాయి.

పాస్‌వర్డ్ షేరింగ్‌కు అదనపు చార్జీలతో ప్లాన్‌లను కూడా ఈ ఏడాది ముగిసేలోగానే ప్రవేశపెట్టాలని నెట్‌ఫ్లిక్స్ నిర్ణయించినట్టు ఇంటర్నల్ నోట్‌ ద్వారా తెలుస్తోంది. కాగా, పాస్‌వర్డ్ షేరింగ్ కోసం అదనంగా చెల్లించే పద్ధతిని ఇప్పటికే చిలీ, కోస్టారికా, పెరూలో మార్చి నుంచి ప్రయోగాత్మకంగా చేపడుతోంది నెట్‌ఫ్లిక్స్. దీన్నే అన్ని దేశాలకు విస్తరించనుంది. అయితే ప్లాన్‌ల విధానం, ధరలు మారవచ్చు. పాస్‌వర్డ్ షేర్ చేస్తే సబ్ అకౌంట్లుగా ఉంటాయని సమాచారం.