సామాన్యుడిపై పెరిగిన ధరల ముప్పేట దాడి

ఏ వస్తువు పట్టుకొన్న దానిపై ఎంత బాదుతున్నారో  చెప్పలేని అయోమయ స్థితి ప్రస్తుతం మన దేశంలో నెలకొంది. ఏ వస్తువు కొందామన్న ఒకటికి పదిసార్లు ఆలోచించాల్సి వస్తోంది. ధరల పెంపు కారణంగా సామాన్యులపై తీవ్ర ప్రతికూల ప్రభావం పడుతోంది. ఇప్పటికే పెట్రోల్, డీజిల్ ధరల పెంపుతో సతమతమౌతున్న ప్రజల నెత్తిన మరోసారి ధరల పెంపు పిడుగు పడింది. గ్యాస్ సిలిండర్ దగ్గరి నుంచి పాల వరకు పలు ప్రొడక్టుల ధరలు పెరిగిపోయాయి. గత మార్చి 1 నుంచి ధరల పెంపు అమలులోకి వచ్చింది. దీంతో చాలా మందిపై ప్రతికూల ప్రభావం పడబోతోంది.

ఆయిల్ మార్కెటింగ్ కంపెనీలు గ్యాస్ సిలిండర్ ధరలను పెంచేశాయి. కమర్షియల్ గ్యాస్ సిలిండర్ ధరను రూ.105 మేర పెంచాయి. దీని వల్ల ఫాస్ట్‌ఫుడ్ సెంటర్, వీధుల్లో చిరు వ్యాపారులపై ప్రభావం పడనుంది. ధరల పెంపు వల్ల వీళ్లు కూడా ధరలు పెంచొచ్చు. దీని వల్ల అంతిమంగా సామాన్యులపైనే ప్రభావం పడుతుంది. అలాగే ఆయిల్ మార్కెటింగ్ కంపెనీలు 5 కేజీల సిలిండర్ ధరను కూడా పెంచుతూ నిర్ణయం తీసుకున్నాయి. ఈ సిలిండర్ ధర రూ.27 మేర పెరిగింది.

కేవలం గ్యాస్ సిలిండర్ రేట్లు మాత్రమే కాకుండా పాల ధరలు కూడా పెరిగాయి. అమూల్ పాల ధరలు పైకి చేరాయి. ధర లీటరుకు రూ.2 మేర ధర పెరిగింది. మార్చి 1 నుంచి ఈ పెంపు అమలులోకి వస్తుంది. అమూల్ గోల్డ్ అర్ద లీటరు పాలు ధర రూ.30కు చేరింది. అర్ద లీటరు అమూల్ టాజా పాల ధర రూ.24కు, అమూల్ శక్తి పాల ధర రూ.27కు ఎగసింది. ద్రవ్యోల్బణాన్ని పరిగణలోకి తీసుకుంటే పెంపు చాలా తక్కువ అని కంపెనీ పేర్కొంటోంది.

అంతేకాకుండా హిందుస్తాన్ యూనిలీవర్ కంపెనీ పలు ప్రొడక్టుల ధరలను ఇప్పటికే పెంచేసింది. సబ్బులు, పౌడర్ వంటి వాటి ధరలు ఏకంగా 9 శాతం మేర ధరలు పెరిగాయి. సర్ఫ్ ఎక్సెల్ మ్యాటిక్, కంఫర్ట్ ఫ్యాబ్రిక్ కండీషనర్, డవ్ బాడీ వాష్, లైఫ్ బాయ్, లక్స్, పియర్స్ వంటి వాటి ధరలు ఫిబ్రవరి నెలలో రెండు సార్లు పెరిగాయి. ముడి పదార్థాల ధరలు పెరగడం వల్ల కంపెనీ ఈ నిర్ణయం తీసుకున్నట్లు తెలుస్తోంది. ఏదేమైనా ధరల పెంపు వల్ల సామాన్యులపై మాత్రం తీవ్ర ప్రతికూల ప్రభావం పడుతోందని చెప్పుకోవాలి. కరోనా వల్ల ఆదాయం తగ్గితే.. ఖర్చులు మాత్రం పెరిగాయి.