టీ..కాఫీ ఇక వెరీ కాస్ట్లీ...3 నుంచి 7 శాతం వరకు ధరల పెంపుదల

ఎక్కడికి వెళ్లిన ఏ ఇంటికి వెళ్లిన టీ తాగుతారా...కాఫీ తాగుతారా అని మనం అతిధులకు ఆఫర్ చేస్తాం. ఇపుడు అలా ఆఫర్ చేయాలన్న ఆలోచించే పరిస్థితి వస్తోంది. సామాన్యులకు ఝలక్. ఇప్పటికే పెట్రోల్, డీజిల్, ఎల్‌పీజీ గ్యాస్, పాల ధరల పెంపుతో ఇబ్బందులు పడుతున్న ప్రజలపై మళ్లీ ప్రతికూల ప్రభావం పడుతోంది. హిందూస్తాన్ యూనిలీవర్ (హెచ్‌యూఎల్) తాజాగా పలు ప్రొడక్టుల ధరలు పెంచినట్లు తెలుస్తోంది. మీడియా నివేదికల ప్రకారం.. ధరల పెరుగుదల 14 శాతం వరకు ఉంది. దీంతో వినియోగదారులపై నేరుగా ప్రతికూల ప్రభావం పడనుంది.

బ్రూ కాఫీ ధర 3 నుంచి 7 శాతం మేర పెరిగింది. బ్రూ గోల్డ్ కాఫీ జార్ ధర 3 నుంచి 4 శాతం పైకి చేరింది. బ్రూ ఇన్‌స్టంట్ కాఫీ పౌచ్ ధర 3 నుంచి 6.6 శాతం వరకు పెరిగింది. తాజ్ మహల్ టీ ధర 3.7 శాతం నుంచి 5.8 శాతం వరకు పైకి చేరింది. బ్రూక్ బాండ్ ధర 1.4 శాతం నుంచి 14 శాతం వరకు పెరిగింది. ముడి పదార్థాల ధరలు పెరుగుదల, ద్రవ్యోల్బణ ఒత్తిళ్లు నేపథ్యంలో కంపెనీ ఈ ధరల పెంపు నిర్ణయం తీసుకున్నట్లు తెలుస్తోంది.

హెచ్‌యూఎల్ కంపెనీ ఫిబ్రవరి నెలలో పలు ప్రొడక్టుల ధరలను రెండు సార్లు పెంచిన విషయం తెలిసిందే. డిటర్జంట్ పౌడర్, సోప్ ధరలు గత నెలలో రెండు సార్లు పెరిగాయి. దాదాపు 9 శాతం మేర పైకి చేరాయి. సర్ఫ్ ఎక్సెల్, కంఫర్ట్ ఫ్యాబ్రిక్ కండీషనర్, డవ్ బాడీ వాష్ వంటి వాటి ధరలు కూడా పైకి చేరాయి. హోమ్, పర్సనల్ కేర్ ఉత్పత్తులపై ధరల పెంపు 1 నుంచి 9 శాతం వరకు జరిగిందని బ్రోకరేజ్ సంస్థ ఎడిల్‌వీజ్ సెక్యూరిటీస్ తెలిపింది.

హిందుస్తాన్ యూనిలీవర్ కంపెనీ ఒకేసారి కాకుండా క్రమక్రమంగా ధరలు పెంచుకుంటూ వస్తోంది. దీని వల్ల కొనుగోలుదారులపై ఒకేసారి ప్రభావం పడటం లేదని చెప్పుకోవచ్చు. హెచ్‌యూఎల్ కంపెనీ బ్యూటీ అండ్ పర్సనల్‌ కేర్, ఫుడ్ అండ్ రిఫ్రెష్‌మెంట్, హౌస్‌హోల్డ్ కేర్ వంటి కేటగిరిల కింద పలు రకాల ప్రొడక్టులను మార్కెట్‌లో విక్రయిస్స్తోంది. కంపెనీ అమ్మకాలు డిసెంబర్ త్రైమాసికంలో వార్షిక ప్రాతిపదికన 10.4 శాతం మేర పెరిగాయి.

మరోవైపు నెస్లే ఇండియా కూడా ధరలు పెంచేసింది. మ్యాగీ నూడిల్స్ దర 9 నుంచి 16 శాతం మేర పెరిగింది. మిల్క్, కాఫీ పౌడర్ ధరలను కూడా నెస్లే ఇండియా పెంచింది. మ్యాగీ మసాలా నూడిల్స్ 70 గ్రాముల ధర రూ.12 నుంచి రూ.14కు చేరింది. మ్యాగీ మసాల నూడిల్స్ 140 గ్రాముల ధర రూ.3 పైకి చేరింది. 560 గ్రాముల ప్యాక్ ధర రూ.96 నుంచి రూ.105కు చేరింది. అలాగే ఏ ప్లస్ మిల్క్ 1 లీటర్ కార్టోన్ ధర రూ.75 నుంచి రూ.78కు ఎగసింది. నెస్కెఫై క్లాసిక్ కాఫీ పౌడర్ ధర 7 శాతం వరకు పెరిగింది.