భారీగా పెరిగిన డవ్, పియర్స్, లైఫ్ బాయ్ సబ్బుల ధరలు

ఇష్టమైన సబ్బులు ఇపుడు కాస్త చూసి ఒళ్లు  రుద్దుకొనేలా చేస్తున్నాయి. తాజాగా ఎఫ్‌ఎంసీజీ దిగ్గజం ప్రతి నెలలోనూ తన వినియోగదారులకు షాకిస్తోంది. గత ఆరు నెలలుగా ప్రతి నెలలో కూడా ప్రొడక్టుల రేట్లు పెంచింది. రా మెటీరియల్ ధరలు పెరుగుతుండటంతో... ఖర్చులు అధికమవుతున్నాయని, దీంతో రేట్లు పెంచాల్సి వస్తుందని కంపెనీ చెబుతోంది. తాజాగా మరోసారి సోపులు, డిటర్జెంట్ల రేట్లను హెచ్‌యూఎల్ పెంచింది. పెంచిన రేట్లతో డవ్, పియర్స్, లైఫ్ బాయ్ సోపుల ధరలు పెరిగాయి. దీంతో సామాన్లు కొనుగోలు చేసే కస్టమర్లు పెరిగిన ధరలను దృష్టిలో ఉంచుకోవాల్సి ఉంటుంది.

హిందూస్తాన్ యూనీలివర్ మళ్లీ తన ఉత్పత్తులపై ధరలను పెంచింది. సోపుల నుంచి డిటర్జెంట్ల వరకు ప్రతి వస్తువుపై 3 శాతం నుంచి 20 శాతం వరకు రేట్లు పెంచుతున్నట్టు కంపెనీ ప్రకటించింది. ఖర్చులు పెరుగుతుండటంతో.. తన ప్రొడక్టులను ధరలను కంపెనీ కంటిన్యూగా పెంచుతోంది. గత ఆరు నెలల్లో ఆరుసార్లు రేట్లు పెంచింది కంపెనీ. డిసెంబర్ మినహా మిగతా అన్ని నెలల్లో రేట్లు పెరిగాయి. డవ్, పియర్స్ సోపుల ధరలను ఈ ఎఫ్‌ఎంసీజీ దిగ్గజం భారీగా పెంచింది. వీటి ధరలను దాదాపు 20 శాతం వరకు పెంచింది. ఒక్కో యూనిట్ 25 గ్రాములుండే డవ్, పియర్స్ ప్యాక్ ధర రూ.12 వరకు పెరిగింది. అంతేకాక, 4 లైఫ్ బాయ్ సోపు ప్యాకెట్ల ధర రూ.124 నుంచి రూ.136కు పెరిగింది.

కంపెనీ 500 గ్రాముల వీల్ డిటర్జెంట్ ధరను కూడా రూ.32 నుంచి రూ.33కు పెంచింది. 1 కేజీ ప్యాకెట్ ధరను రూ.63 నుంచి రూ.65కు పెంచింది. విమ్ లిక్విడ్ ధర రూ.5 పెరిగి రూ104 చేరుకుంది. గతేడాది చివరి క్వార్టర్ నుంచి కంపెనీ తన ఉత్పత్తుల ధరలను పెంచుతోంది. అదేవిధంగా ఈ ఏడాది కూడా జనవరి, ఫిబ్రవరి, మార్చిలో రేట్లు పెరిగాయి. ఫిబ్రవరిలోనే సోప్‌లు, డిటర్జెంట్లు, కిసాన్ జామ్, పెప్సోడెంట్, హార్లిక్స్ వంటి ధరలు 1 శాతం నుంచి 3 శాతానికి పెరిగాయి.

రూ.1, రూ.5, రూ.10 ప్రొడక్టుల నుంచే కంపెనీకి 30 శాతం బిజినెస్‌లు వస్తున్నాయని హెచ్‌యూఎల్ తన క్వార్టర్ ఫలితాల సందర్భంగా వెల్లడించింది. ఈ ప్యాక్‌లపై రేట్లను పెంచడం కంటే వీటి బరువును తగ్గిస్తున్నామని కంపెనీ పేర్కొంది. రా మెటీరియల్ ఖర్చులు అధికంగా ఉండటంతో.. కంపెనీ తన పోర్టుఫోలియోలోని ప్రొడక్టుల ధరలను పెంచుతోంది.

హెచ్‌యూఎల్ ప్రొడక్టుల కొత్త ధరలు..

4 లైఫ్ బాయ్ సోపు ప్యాకెట్ల ధర రూ.124 నుంచి రూ.136కు పెంపు

500 గ్రాముల వీల్ డిటర్జెంట్.. రూ.32 నుంచి రూ.33కు పెంపు

కేజీ వీల్ డిటర్జెంట్.. రూ.63 నుంచి రూ.65కు పెంపు

25 గ్రాముల డవ్ సోపు.. రూ.12కు పెంపు

25 గ్రాముల పియర్ సోపు.. రూ.12కు పెంపు

విమ్ లిక్విడ్ ధర రూ.99 నుంచి రూ.104కు పెరిగింది