పదవుల కోసం నేను పోరాటాలు చేయలేదు: ఆర్.కృష్ణయ్య

బీసీలు బాగుండాలి, బీసీలు ఎదగాలని పోరాటాలు చేసే తాను పదవుల కోసం పని చేస్తారనేది అపోహ మాత్రమే అని బీసీ ఉద్యమ నేత, వైఎస్సార్ కాంగ్రెస్ పార్టీ రాజ్యసభ అభ్యర్థి ఆర్.కృష్ణయ్య  అన్నారు. తాను దివంగత ఎన్టీఆర్ హయాంలోనే మంత్రి పదవిని వదులకున్నానని చెప్పారు. తాను ఏనాడూ పదవుల కోసం పని చేయలేదన్నారు. తనకు రాజ్యసభ పదవి రావడం వల్ల బీసీల ఔన్నత్యం పెరుగుతుందని చెప్పారు. రెండు తెలుగు రాష్ట్రాల బీసీల సమస్యలు రాజ్యసభలో ప్రస్తావిస్తానన్నారు.

తెలుగు దేశం పార్టీ 2014 ఎన్నికల్లో తనను వాడుకుని గెలిచిందని.. ఒక్కోసారి తానే కొన్ని పార్టీలను వాడుకున్నానని ఆయన వ్యాఖ్యానించారు. ఈ మేరకు ఓ మీడియా ఛానల్‌కు ఇచ్చిన ఇంటర్వ్యూలో ఆర్.కృష్ణయ్య ఆసక్తికర వ్యాఖ్యలు చేశారు. రాజకీయ పార్టీలను బీసీల అభివృద్ధి కోసం వాడుకుంటున్నానని చెప్పారు. తెలంగాణ ముఖ్యమంత్రి కేసీఆర్ తనను గుర్తించారని.. కానీ, ముందుగా ఏపీ సీఎం వైఎస్ జగన్మోహన్ రెడ్డి అవకాశం ఇచ్చారని చెప్పారు.

తనకు పదవి ఇచ్చి సీఎం జగన్ ఇబ్బందులు పడుతున్నారనేది అపోహ మాత్రమే అని కృష్ణయ్య అన్నారు. తనకు పదవి ఇవ్వడం సరైనదేనా అని మీరు కూడా సర్వే చేయండని.. ఎవరైనా తప్పంటే తాను గుండు గీయించుకుంటానని వ్యాఖ్యానించారు. 1976 నుంచి తాను ఉద్యమంలో ఉన్నానని.. తనను వాడుకుని టీడీపీ గెలిచిందన్నారు. ఒక్కోసారి తానే పార్టీలను వాడుకున్నానని స్పష్టం చేశారు.

అయితే, వైసీపీ మాత్రం బీసీలకు అన్ని రంగాల్లో సముచిత స్థానం ఇచ్చిందని కృష్ణయ్య చెప్పారు. అలాగే, బడుగు నేతలు బాడుగ నేతలు అవుతున్నారన్న విమర్శల్ని తప్పుబట్టారు. కొంతమంది బీసీ నేతలు జాతి అభివృద్ధి కోసం తమ ఆస్తులు అమ్ముకుంటున్నారని వ్యాఖ్యానించారు. తాను పార్టీలు మారలేదని.. పార్టీలనే ఉద్యమం వైపు తిప్పుకుంటున్నానని చెప్పారు. గతంలో దమ్మున్న నేతలు కూడా బీసీలకు ఎక్కువ పదవులు ఇవ్వలేదన్నారన్నారు. బీసీల నుంచి రాజ్యసభలో అడుగుపెడుతున్న తాను బడుగు, బలహీనవర్గాల స్వరంగా మారతానని వెల్లడించారు.