రాజకీయాలలోకి దాదా ఎంట్రీ...బీసీసీఐ పదవికి రాజీనామా చేయనున్నారా

రాజకీయలలోకి దాదా సౌరవ్ గంగూలీ  ఎంట్రీ ఇవ్వనున్నారా...ఆయన  ఇటీవల చేసిన ట్వీట్  సారాంశం ఇదేనా..? ప్రస్తుతం రాజకీయ వర్గాల్లోసాగుతున్న పెద్ద చర్చ. ఇదిలావుంటే బీసీసీఐ అధ్యక్షుడు సౌరవ్ గంగూలీ కీలక నిర్ణయం తీసుకున్నట్లు తెలుస్తోంది. అధ్యక్ష పదవికి రాజీనామా చేసే యోచనలో గంగూలీ ఉన్నట్లు సమాచారం. త్వరలో ఆయన పొలిటికల్ ఎంట్రీ ఇచ్చే అవకాశం ఉన్నట్లు వార్తలు వినిపిస్తున్నాయి. బుధవారం (జూన్ 1)న గంగూలీ చేసిన ట్వీట్ చర్చనీయాంశంగా మారింది. ‘నేను కొత్త జీవితం ప్రారంభించేదుకు ప్రణాళికలు వేస్తున్నాను. నా నిర్ణయం ద్వారా మరింత ఎక్కువ మందికి ప్రయోజనం అందుతుందని భావిస్తున్నా’ అని గంగూలీ ట్వీట్ చేశారు.

‘1992లో నేను నా క్రీడా జీవితాన్ని ప్రారంభించా. 2022 నాటికి 30 ఏళ్లు గడిచాయి. క్రికెట్ నాకు ఎంతో ఇచ్చింది. ముఖ్యంగా మీ అందరి ఆదరాభిమానాలు పొందగలిగాను. నా ఈ జర్నీలో భాగమైన అందరికీ ఈ సందర్భంగా థ్యాంక్స్ చెప్పదలుకున్నా. ఈ రోజు నేను ఈ స్థానంలో ఉండేందుకు నా వెన్నుతట్టి, నాకు అండగా నిలిచిన, నాతో పాటు ఉన్న ప్రతి ఒక్కరికీ ధన్యవాదాలు. ఎక్కువ మంది ప్రజలకు సాయపడేలా ఇకపై కొత్తగా ఏదైనా చేయాలని భావిస్తున్నా. ఈ కొత్త ప్రయాణంలో మీరు నాకు ఇలాగే మద్దతు ఇస్తారని భావిస్తున్నా..’ అని సౌరవ్ గంగూలీ ట్వీట్ చేశారు.

ప్రతిష్టాత్మక టోర్నీల్లో భారత్‌కు ట్రోఫీలు దక్కడంలో కీలక పాత్ర పోషించిన టీమిండియా మాజీ సారథి గంగూలీ.. బీజేపీలో చేరే అవకాశం ఉన్నట్లు తెలుస్తోంది. కేంద్ర హోం శాఖ మంత్రి అమిత్ షాతో ఇప్పటికే ఆయన రెండుసార్లు భేటీ అయ్యారు. గంగూలీ బీజేపీలో చేరతారనే ఊహాగానాలకు ఇది మరింత ఊతం ఇస్తోంది. కొన్ని రోజుల కిందట బీజేపీ నేతలు గంగూలీ నివాసానికి వెళ్లి, చర్చలు జరిపినట్లు సమాచారం. పశ్చిమ బెంగాల్‌ ముఖ్యమంత్రి మమతా బెనర్జీకి చెందిన తృణమూల్ కాంగ్రెస్ పార్టీ నేతలు కూడా గంగూలీతో టచ్‌లో ఉన్నట్లు తెలుస్తోంది.

సౌరవ్ గంగూలీ ట్వీట్‌పై పలువురు ఆసక్తికరంగా స్పందిస్తున్నారు. గంగూలీకి రాజకీయాల్లో చేరాలనే ఆకాంక్ష ఉన్నట్లు కనిపిస్తోందని తాను ఇంతకుముందే చెప్పానని ఎంటర్‌ప్రెన్యూయర్ నందన్ పండిట్ ట్వీట్ చేశారు. ‘గంగూలీ బీజేపీలో చేరబోతున్నారు’ అంటూ పలువురు నెటిజన్లు కామెంట్లు పెడుతున్నారు. గంగూలీ రాజీనామా వార్తలపై బీసీసీఐ సెక్రటరీ జై షా స్పందించారు. బీసీసీఐ అధ్యక్షుడిగా గంగూలీ ఇంకా రాజీనామా చేయలేదని స్పష్టం చేశారు.