రష్యా అణ్వాయుధ దళాలు డ్రిల్..మున్ముందు ముప్పు పొంచివుందా

ఉక్రెయిన్ కు అణ్వాయుధ  ముప్పు తప్పదా...? రష్యా  చర్యలు అదే రీతిలో కొనసాగుతున్నాయా అన్న చర్చ మొదలైంది. ఉక్రెయిన్‌‌పై రష్యా యుద్ధం మొదలుపెట్టి మూడు నెలలు దాటిపోయింది. ఉక్రెయిన్‌లో రష్యా దళాలు భీకర దాడులు కొనసాగుతున్నాయి. ఈ నేపథ్యంలో రష్యా అణ్వాయుధ బలగాలు డ్రిల్ నిర్వహించడం ఆందోళనకు గురిచేస్తోంది. రాజధాని మాస్కోకు ఈశాన్యంగా ఉన్న ఇవనోవో ప్రావిన్సుల్లో అణ్వాయుధ దళాలు డ్రిల్ చేపట్టినట్టు రష్యా రక్షణ శాఖ బుధవారం వెల్లడించిందని ఇంటర్‌ఫ్యాక్స్ న్యూస్ ఏజెన్సీ తెలిపింది. ఖండాంతర బాలిస్టిక్ క్షిపణి లాంచర్ల సహా 1,000 మంది సైనికులు, 100 సైనిక ఆయుధ వాహనాలు ఈ డ్రిల్‌లో పాల్గొన్నట్టు పేర్కొంది.

మరోవైపు, ఉక్రెయిన్‌కు ఆయుధాలు పంపేందుకు అమెరికా సిద్ధమైంది. అత్యాధునిక, మీడియం రేంజ్‌ రాకెట్‌ వ్యవస్థలను పంపాలని బైడెన్ యంత్రాంగం నిర్ణయించినట్లు సమాచారం. రష్యా దండయాత్ర మొదలైనప్పటి నుంచి ఉక్రెయిన్‌ చేస్తున్న అభ్యర్థనను అమెరికా అంగీకరించినట్లు తెలుస్తోంది. రాకెట్‌ వ్యవస్థలను ఉక్రెయిన్‌కు పంపే అంశంపై త్వరలోనే అమెరికా ఓ ప్రకటన చేయనుందనే ప్రచారం సాగుతోంది.

కానీ రష్యా భూభాగంపైకి ప్రయోగించేందుకు ఉక్రెయిన్‌కు ఆయుధాలను పంపబోమని అమెరికా అధ్యక్షుడు జో బైడెన్‌ సోమవారం ప్రకటించారు. ఈ నేపథ్యంలో తేలికపాటి సామర్థ్యం ఉన్న రాకెట్లను మాత్రమే పంపాలని అమెరికా అధికారులు భావిస్తున్నారు. గరిష్ఠంగా 70 కిలోమీటర్లలోని లక్ష్యాలను చేధించే రాకెట్లను మాత్రమే ఉక్రెయిన్‌కు అందజేయాలనే నిర్ణయానికి వచ్చినట్లు తెలుస్తోంది. వాటిని డాన్‌బాస్‌ ప్రాంతంలో భీకర దాడులు చేస్తున్న రష్యా సైన్యాన్ని నిలువరించేందుకు మాత్రమే ఉక్రెయిన్‌ వినియోగించాలే షరతు పెట్టే అవకాశాలు ఉన్నాయి.

ఇదిలా ఉండగా, ఉక్రెయిన్‌- రష్యా యుద్ధం దౌత్యం ద్వారా ముగుస్తుందని, అయితే చర్చల ప్రక్రియలో ఉక్రెయిన్‌ పరపతిని పెంచేలా ఆయుధాలు, మందుగుండు సామగ్రిని అందించాలని అధ్యక్షుడు బైడెన్ అన్నారు. ‘‘అందుకే యుద్దభూమిలో కీలక లక్ష్యాలను మరింత ఖచ్చితంగా చేధించడానికి వీలు కల్పించే అధునాతన రాకెట్ వ్యవస్థలు.. ఆయుధాలను ఉక్రేనియన్‌లకు అందించాలని నేను నిర్ణయించుకున్నాను’’ అని బైడెన్ న్యూయార్క్ టైమ్స్‌కు ఇచ్చిన ఇంటర్వ్యూలో వెల్లడించారు.