పాకిస్తాన్ లో కొండెక్కిన నిత్యవసర ధరలు...అక్కడా శ్రీలంక పరిస్థితులు తప్పవా

శ్రీలంక దుస్థితి ఏమిటో మనం చూస్తున్న విషయం తెలిసిందే. తాజాగా ఆ జాబితాలో పాకిస్తాన్ చేరుతుందా అన్న రీతిలో ఆదేశ పరిస్థితులు  నెలకొంటున్నాయి. ఆర్థిక సంక్షోభం ముసురుకుంటున్న వేళ పాకిస్థాన్ కూడా శ్రీలంక బాటలో నడుస్తుందేమోననే అనుమానాలు వ్యక్తం అవుతున్నాయి. దాయాది దేశంలో నెయ్యి, వంట నూనె ధరలు అసాధారణ స్థాయిలో పెరిగాయి. పాకిస్థాన్‌లో కిలో వంట నూనె ధర రూ.213 పెరగ్గా.. నెయ్యి ధర రూ.208 మేర పెరిగింది. దేశంలో వంట నూనె, నెయ్యి ధరలు ఆల్ టైం గరిష్టానికి చేరాయని.. లీటర్ నూనె ధర రూ.555, లీటర్ నెయ్యి ధర రూ.605కి చేరిందని యుటిలిటీ స్టోర్స్ కార్పొరేషన్ (యూఎస్సీ) అధికారి ఒకరు వెల్లడించారు. ‘జూన్ 1 నుంచి ధరల పెంపు అమల్లోకి వస్తుందని యూఎస్సీ ప్రకటించింద’ని డాన్ వార్తాపత్రిక తెలిపింది. ఈ స్థాయిలో ధరల పెరుగుదలకు కారణమేంటనే విషయాన్ని మాత్రం పాకిస్థాన్ ప్రభుత్వం గానీ, యూఎస్సీగానీ వెల్లడించలేదు.

యూఎస్సీ ప్రకటించిన ధర కంటే.. రిటైల్ మార్కెట్లో నెయ్యి. వంట నూనె ధరలు ఎక్కువగా పెరిగే అవకాశం ఉందని పాకిస్థాన్ వనస్పతి ఉత్పత్తిదారుల సంఘం సెక్రటరీ జనరల్ ఉమర్ ఇస్లాం ఖాన్ అభిప్రాయపడ్డారు. వంట నూనె, నెయ్యి ఉత్పత్తిదారులకు యూఎస్సీ రూ.200-300 కోట్లు బకాయిలు చెల్లించకపోవడంతో.. రుణం రూపంలో తమ ఉత్పత్తులను యూఎస్పీకి విక్రయించడం మానేశారని ఉమర్ తెలిపారు.

ఇండోనేసియా నుంచి పామాయిల్ దిగుమతులు సైతం నిలిచిపోవడం కూడా వంట నూనెల ధరలు పెరగడానికి దారి తీసిందని ఉమర్ తెలిపారు. దేశంలో వంట నూనెల సరఫరా, డిమాండ్ గురించి విశ్లేషించడానికి పాక్ ప్రధాని నేతృత్వంలోని టాస్క్‌ఫోర్స్ కమిటీ నిరంతరం జూమ్ మీటింగులు నిర్వహిస్తోందన్నారు. ఇండోనేసియా పామాయిల్ ఎగుమతులపై నిషేధాన్ని ఎత్తివేసినప్పటికీ.. మే 23 తర్వాత ఆ దేశం నుంచి పాకిస్థాన్‌కు ఒక్క పామాయిల్ నౌకను కూడా రాలేదని ఇస్లాం తెలిపారు. ఇండోనేసియా పామాయిల్ ధర టన్నుకు 1900-2000 డాలర్ల నుంచి 1700 డాలర్లకు తగ్గినప్పటికీ.. పాకిస్థాన్ రూపాయి పతనం, రవాణాకు అత్యధిక ధర ఉండటంతో పామాయిల్ ధరలు తగ్గడం లేదన్నారు. పాకిస్థాన్ రూపీ విలువ మరింత పతనమయ్యే అవకాశం ఉంది. మే నెలలో పాకిస్థాన్ రూపాయి 5 శాతం పడిపోయింది. 2020 మార్చి నుంచి ఇదే అత్యధిక పతనం కావడం గమనార్హం.

2.29 కోట్ల జనాభా ఉన్న పాకిస్థాన్‌ పామాయిల్ అవసరాల కోసం ఎక్కువగా ఇండోనేసియా (87 శాతం), మలేసియా (13 శాతం) దిగుమతులపై ఆధారపడుతోంది. కరాచీలోని రెండు పోర్టుల్లో 1.60 లక్షల టన్నుల పామాయిల్ అందుబాటులో ఉంది. ఇది మూడు వారాలకు సరిపోతుందని అధికారులు తెలిపారు. ద్రవ్యోల్బణం భారీగా పెరుగుతుండటంతో.. పాకిస్థాన్‌లో గోధుమ పిండి ధరలు సైతం కిలోకు రూ.65 మేర పెరిగాయి. ఇక్కడ గ్యాస్ ధరలు కూడా ఎక్కువగా ఉన్నాయి. రష్యా-ఉక్రెయిన్ యుద్ధం కారణంగా గ్యాస్ ధరలు పెరిగాయని పాకిస్థాన్ ప్రభుత్వం చెబుతోంది. కానీ వాస్తవానికి గత ఏడాది నుంచి ఆ దేశంలో గ్యాస్ ధరలు ఎక్కువగా ఉన్నాయి. ధరలను తగ్గిస్తానని పాకిస్థాన్ ప్రధాని షెహబాజ్ షరీఫ్ ప్రజలకు హామీ ఇచ్చారు. నా దుస్తులు విక్రయించైనా సరే పిండి ధరలు తగ్గిస్తానని ఆయన చెప్పడం గమనార్హం. అప్పుల ఊబిలో కూరుకుపోతున్న పాకిస్థాన్ దివాలా ముప్పు నుంచి తప్పించుకోవడం కోసం అంతర్జాతీయ ద్రవ్య నిధి, మిత్ర దేశాల సాయం కోరుతోంది.