గూగుల్ అధిపత్యాన్ని దెబ్బకొట్టేందుకు సిద్దమవుతున్న యాపిల్

మనం నెట్ లో ఏదైనా అంశాన్ని సర్చ్ చేయాలంటే ఎక్కువగా మనం వెతికేది గూగుల్ లోనే.  ఇక ఆ ఆధిపత్యం చెల్లదని  యాపిల్ చాటిచెప్పేందుకు సిద్దమవుతోంది. గూగుల్, యాపిల్ టెక్నాలజీ రంగంలో దిగ్గజ సంస్థలు. స్మార్ట్‌ఫోన్‌లు, ఆపరేటింగ్ సిస్టమ్‌ నుంచి చాలా విషయాల్లో ఈ రెండూ హోరాహోరీగా పోటీపడుతుంటాయి. అయితే మరో విభాగంలో గూగుల్‌తో తలపడేందుకు యాపిల్ సిద్దమైందని సమాచారం. త్వరలోనే యాపిల్ ప్రకటన చేయనున్నట్టు తెలుస్తోంది. గూగుల్ అత్యంత ఆధిపత్యం చెలాయిస్తున్న సెర్చ్ ఇంజిన్ కేటగిరీలోకి యాపిల్ అడుగుపెట్టనుంది. ప్రస్తుతం గూగుల్ సెర్చ్ ఇంజిన్ ఏకచ్ఛత్రాధిపత్యం కొనసాగిస్తోంది. మరే సెర్చ్ ఇంజిన్ కూడా గూగుల్ దరిదాపుల్లో లేదు. అందుకే యాపిల్ ఈ దిశగా అడుగువేస్తోంది. త్వరలోనే యూజర్ సెంట్రిక్ సెర్చ్ ఇంజిన్‌ను యాపిల్ ప్రకటిస్తుందని రిపోర్ట్ వెల్లడైంది.

2023 జనవరిలో సెర్చ్ ఇంజిన్‌ను యాపిల్ ప్రకటించే అవకాశం ఉందని టెక్ బ్లాగర్ రాబర్ట్ స్కోబుల్ వెల్లడించారు. వరల్డ్ వైడ్ డెవలపర్స్ కాన్ఫరెన్స్‌ 2023లో లాంచ్ చేయవచ్చని అంచనా. ఈ విషయానికి సంబంధించిన వివరాలను పేర్కొన్నారు. గూగుల్‌కు పోటీని ఇచ్చేందుకు యాపిల్ సెర్చ్ ఇంజిన్ తీసుకొస్తుందని చెప్పారు. “హో, కొత్త సెర్చ్ ఇంజిన్ కూడా వచ్చేస్తోంది. ఎట్టకేలకు సిరి మరింత స్మార్ట్‌గా మారుతోందా?” అని ట్వీట్ కూడా చేశారు రాబర్ట్.

ఇదిలావుంటే ఈ సంవత్సరం యాపిల్ వరల్డ్ వైడ్ డెవలపర్స్ కాన్ఫరన్స్ 2022 మరో రెండు రోజల్లో అంటే ఈనెల 6న మొదలుకానుంది. ఈ కాన్ఫరెన్స్‌లో ఐఓఎస్‌ 16 (ఐఓఎస్ 16), ఐప్యాడ్ ఓఎస్ 16, వాచ్ఓఎస్, మాక్‌ఓఎస్ 13లకు యాపిల్ ప్రకటిస్తుందని సమాచారం. ఐఓఎస్‌ 16 ద్వారా ఐఫోన్‌లకు చాలా ఫీచర్లు యాడ్ కానున్నాయి. ఆల్‌వేస్ ఆన్ డిస్‌ప్లేపై అందరి దృష్టి ఉంది. ఆ ఫీచర్ ఐఓఎస్ 16 ద్వారా ఐఫోన్ 14 సిరీస్‌లో ప్రో మోడల్స్‌కు వస్తుందని సమాచారం. ఐఫోన్ 14 సిరీస్ మొబైళ్లు ఈ సంవత్సరం సెప్టెంబర్‌లో విడుదల చేసేందుకు యాపిల్ ప్లాన్‌ చేసింది.

ఇదిలావుంటే డబ్ల్యూడబ్ల్యూడీసీ 2022లో ఏఆర్/వీఆర్  హెడ్‌సెట్‌ను యాపిల్ ప్రకటించే అవకాశాలు కనిపించడం లేదు. అయితే దీని గురించి ఏమైనా సమాచారం వెల్లడిస్తుందేమో చూడాలి

ఐఫోన్ 14 సిరీస్‌లో.. ఐఫోన్ 14, ఐఫోన్ 14 మ్యాక్స్ ఐఫోన్ 14 ఐఫోన్ 14 ప్రో, ఐఫోన్ 14 ప్రో మ్యాక్స్ మొబైళ్లు సెప్టెంబర్‌లో రానున్నాయి. ప్రో మోడళ్లు 120Hz రిఫ్రెష్ రేట్ ఉండే ఆల్‌వేస్ ఆన్ డిస్‌ప్లేతో వస్తాయని ఇప్పటికే లీకులు వచ్చాయి. మరోవైపు ఐఫోన్ 14, ఐఫోన్ 14 మ్యాక్స్‌తో బయోనిక్ 15 ప్రాసెసర్‌ ఉంటుందని తెలుస్తోంది. ఐఫోన్ 13లోనూ ఇదే చిప్ ఉంది. అయతే 14 ప్రో, 14 ప్రో మ్యాక్స్‌లో మాత్రం లేటెస్ట్ బయోనిక్ ఏ16 ప్రాసెసర్‌ ఉంటుందని తెలుస్తోంది.