అమెరికాకు రష్యా వార్నింగ్‌

రష్యా-ఉక్రెయిన్ యుద్ధం 100 రోజులు దాటినప్పటికీ గెలుపుపై స్పష్టత రావట్లేదు. ఒకవైపు బలహీనమైన ఉక్రెయిన్‌కు అమెరికాతో పాటు యూరప్ దేశాలు ఇస్తున్న మద్దతు బలాన్ని చేకూరుస్తుంటే, మరోవైపు రష్యా దూకుడు ఏమాత్రం తగ్గట్లేదు.ఉక్రెయిన్‌కు సహాయం చేస్తున్న దేశాలపైన కూడా రష్యా ఆంక్షలు విధిస్తోంది. ఇక, ఇటీవల ఉక్రెయిన్‌కు అమెరికా పంపిన యుద్ధ సామాగ్రిపై రష్యా విరుచుకుపడింది. రష్యా అధ్యక్షుడు వ్లాదిమిర్ పుతిన్ జూన్ 5న ఈ సందర్భంగా అమెరికాకు హెచ్చరికలు పంపారు. ఉక్రెయిన్‌కు సుదూర క్షిపణులను సరఫరా చేస్తే మరింత గట్టిగా దాడి చేస్తామని ప్రతిజ్ఞ చేశారు. ఇరు దేశాల మధ్య "ఘర్షణలను పొడిగించడం" కోసం పాశ్చాత్య దేశాలకు సవాలుగా, రష్యా వైమానికి నిరోధక దళాలు డజన్ల కొద్దీ ఉక్రేనియన్ ఆయుధాలను కాల్చివేసాయని పుతిన్ వెల్లడించారు.

అమెరికా ఉక్రెయిన్‌కు సుదూర క్షిపణులను సరఫరా చేయడం ప్రారంభిస్తే, "మేము ఇంకా దృష్టిపెట్టని టార్గెట్లపైన దాడి చేస్తాం" అని రోసియా-1 స్టేట్ టెలివిజన్ ఛానెల్‌కు ఇచ్చిన ఇంటర్వ్యూలో పుతిన్ పేర్కొన్నారు. రష్యా రక్షణ మంత్రిత్వ శాఖ అధికార ప్రతినిధి ఇగోర్ కొనాషెంకోవ్ మాట్లాడుతూ, "కీవ్ శివార్లలో రష్యన్ ఏరోస్పేస్ దళాలు ప్రయోగించిన హై-ప్రెసిషన్, సుదూర క్షిపణులు తూర్పు ఐరోపా దేశాలు సరఫరా చేసిన T-72 ట్యాంకులను, హ్యాంగర్‌లలో ఉన్న ఇతర సాయుధ వాహనాలను ధ్వంసం చేశాయి" అని అన్నారు. ఇక, రష్యాలోని లక్ష్యాలను చేధించడానికి వాటిని ఉపయోగించమని ఉక్రెయిన్‌ నుండి హామీని తీసుకున్న తర్వాత అమెరికా అధ్యక్షుడు జో బైడెన్ ఉక్రెయిన్‌కు HIMARS రాకెట్ వ్యవస్థలను అందిస్తున్నట్లు ప్రకటించారు. తాజాగా, బ్రిటన్ కూడా ఉక్రెయిన్‌కు సుదూర క్షిపణులను సరఫరా చేయబోతున్నట్లు సమాచారం ఉండగా, ఈ నేపధ్యంలో రష్యా హెచ్చరికలు అంతర్జాతీయంగా ప్రకంపనలు సృష్టిస్తున్నాయి.